କଟକ,୦୭/୧୦: ‘ଭାଇଚାରା’ର ସହର କଟକକୁ ଶାନ୍ତି ଫେରୁଛି । ସହରର ଜୀବନଯାତ୍ରାରେ ସ୍ୱାଭାବିକତା ଫେରାଇ ଆଣିବାକୁ ସବୁ ସ୍ତରରେ, ସବୁ ମହଲରେ ଉଦ୍ୟମ ଜାରି ରହିଛି । ବିଗିଡ଼ି ଯାଇଥିବା ଆଇନ ଶୃଙ୍ଖଳା ସ୍ଥିତିରେ ସୁଧାର ଆଣିବା ପାଇଁ ସହରରେ କର୍ଫ୍ୟୁ ଜାରି ହେବାର ୨୪ ଘଣ୍ଟାରୁ ଅଧିକ ସମୟ ବିତିଛି ଇତିମଧ୍ୟରେ । ସ୍ଥିତିରେ ବେଶ ସୁଧାର ମଧ୍ୟ ଆସିଛି । ସାରା ସହର ପୁଲିସ ଫୋର୍ସ ବଳୟରେ ରହିଥିବା ବେଳେ ପୁଲିସ ଡିଜି ୱାଇ. ବି. ଖୁରାନିଆ, ପୁଲିସ କମିସନର ଏସ୍. ଦେବଦତ୍ତ ସିଂଙ୍କ ସମେତ ବହୁ ବରିଷ୍ଠ ପୁଲିସ ଅଧିକାରୀ କଟକରେ କ୍ୟାମ୍ପ୍ କରି ସ୍ଥିତି ଉପରେ ନଜର ରଖିଛନ୍ତି ।
ଅନ୍ୟପକ୍ଷରେ, ରବିବାର ସନ୍ଧ୍ୟା ୭ଟାରୁ କଟକ ସହରରେ ଇଣ୍ଟରନେଟ୍ ବ୍ୟବସ୍ଥା ସମ୍ପୂର୍ଣ୍ଣ ବନ୍ଦ ରହିଥିବା ବେଳେ ଆହୁରି ୨୪ ଘଣ୍ଟା ଅର୍ଥାତ୍ ମଙ୍ଗଳବାର ସନ୍ଧ୍ୟା ୭ଟା ପର୍ଯ୍ୟନ୍ତ ଏହି କଟକଣାକୁ ବୃଦ୍ଧି କରାଯାଇଛି । ଜିଲ୍ଲାପାଳଙ୍କ ସୁପାରିସ୍ କ୍ରମେ ଗୃହ ବିଭାଗ ପକ୍ଷରୁ ଏ ନେଇ ପଦକ୍ଷେପ ଗ୍ରହଣ କରାଯାଇଛି । ଗତକାଲି ପୁଲିସକୁ ଆକ୍ରମଣ କରିଥିବା ବିଶୃଙ୍ଖଳାକାରୀ ଓ ଉପଦ୍ରବକାରୀଙ୍କୁ ଚିହ୍ନଟ କରି ଉଠାଇବା ମଧ୍ୟ ଆରମ୍ଭ କରିଛି ପୁଲିସ ।
ସୋମବାର ସନ୍ଧ୍ୟା ସୁଦ୍ଧା ୮ ଜଣଙ୍କୁ ଗିରଫ କରାଯାଇଥିବା କମିସନର ଶ୍ରୀ ସିଂ ପ୍ରକାଶ କରିଛନ୍ତି । ଗିରଫଦାରୀ ସଂଖ୍ୟା ଆଗକୁ ବଢ଼ିବ । ସିସିଟିଭି ଫୁଟେଜ୍, ଡ୍ରୋନ୍ ଓ କ୍ୟାମେରା ଭିଡିଓ ଆଧାରରେ ଉପଦ୍ରବକାରୀଙ୍କୁ ଗିରଫ କରିବାକୁ ଜାଲ ବିଛାଇଛି ପୁଲିସ । ସେପଟେ ମଙ୍ଗଳବାର ସକାଳ ୧୦ଟା ପର୍ଯ୍ୟନ୍ତ କର୍ଫ୍ୟୁ ବଳବତ୍ତର ଥିବା ବେଳେ କର୍ଫ୍ୟୁ ଅବଧିକୁ ଆହୁରି ବୃଦ୍ଧି କରିବାକୁ ପୁଲିସ ପ୍ରଶାସନ ଚିନ୍ତା କରୁଛି । ମଙ୍ଗଳବାର ୧୦ଟାରେ ସ୍ଥିତି ଅନୁଧ୍ୟାନ କରାଯିବା ପରେ ଏ ସଂପର୍କରେ ନିଷ୍ପତ୍ତି ନିଆଯିବ । ତେବେ ଯଦି ସ୍ଥିତି ଶାନ୍ତ ରହେ କର୍ଫ୍ୟୁ ଅବଧି ବଢାଯିବ ନାହିଁ ବୋଲି ପୁଲିସ କମିସନର୍ ଶ୍ରୀ ସିଂ କହିଛନ୍ତି ।
ସୋମବାର ସନ୍ଧ୍ୟାରେ କେନ୍ଦ୍ରାଞ୍ଚଳ ରାଜସ୍ୱ ଆୟୁକ୍ତ ଗୁହା ପୁନମ୍ ତାପସ କୁମାର ଦରଘାବଜାରଠାରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି । କର୍ଫ୍ୟୁ ଯୋଗୁଁ ବ୍ୟବସାୟିକ ନଗରୀ କଟକ ପୂରା ଶୂନ୍ଶାନ୍ ପାଲଟି ଯାଇଛି । ଛକବଜାର ସବୁଠି ନିରବତା । ମୁଖ୍ୟରାସ୍ତା ଠାରୁ ଆରମ୍ଭ କରି ଗଳିକନ୍ଦି ସବୁଠି ପୁଲିସ ପଇଁତରା ମାରୁଥିବା ବେଳେ ଲୋକେ ମଧ୍ୟ ପ୍ରଶାସନିକ କଟକଣାକୁ ମାନି ଘରେ ବନ୍ଦୀ ରହିଛନ୍ତି । କର୍ଫ୍ୟୁ ଯୋଗୁଁ ସହରରେ ନିଆଁ ଲଗାଇବା, ବାଣ ଫୁଟାଇବା ଏବଂ ଗୋଟିଏ ସ୍ଥାନରେ ୫ଜଣ ଏକାଠି ହେବାରେ କଟକଣା ଜାରି କରାଯାଇଛି । ନିୟମ ଉଲ୍ଲଂଘନକାରୀଙ୍କ ବିରୋଧରେ ଦୃଢ଼ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି ପୁଲିସ କହିଛି ।
କର୍ଫ୍ୟୁ ଯୋଗୁଁ କଟକରେ ସ୍ୱାସ୍ଥ୍ୟ ଓ ଚିକିତ୍ସା ସେବା ବ୍ୟବସ୍ଥା ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଛି । ଏସ୍ସିବି ମେଡିକାଲ୍ ଠାରୁ ଆରମ୍ଭ କରି ଶିଶୁଭବନ, ସିଟି ହସ୍ପିଟାଲ୍ ଏବଂ ସହରରେ ରହିଥିବା ବିଭିନ୍ନ ଘରୋଇ ହସ୍ପିଟାଲ୍, ନର୍ସିଂହୋମ୍ରେ ରୋଗୀସେବା ପ୍ରଭାବିତ ହୋଇଛି । ଇଣ୍ଟରନେଟ୍ ବ୍ୟବସ୍ଥା ନଥିବାରୁ ବୀମା କାର୍ଡ କାମ କରୁନାହିଁ । ଯାହା ଫଳରେ ଘରୋଇ ହସ୍ପିଟାଲ ଓ ନର୍ସିଂହୋମ୍ ପକ୍ଷରୁ ବୀମା କାର୍ଡରେ ଆଡ୍ମିସନ୍ କରାଯାଇ ପାରୁନଥିବା ଦେଖିବାକୁ ମିଳିଛି । ନେତାଜୀ ବସ୍ ଟର୍ମିନାଲରେ ବସ୍ ସେବା ମଧ୍ୟ ବାଧାପ୍ରାପ୍ତ ହୋଇଛି । କଟକକୁ ଅଧିକ ସଂଖ୍ୟାରେ ବସ୍ ଗଡୁନଥିଲା । ଗତକାଲି ଠାରୁ କର୍ଫ୍ୟୁ ଘୋଷଣା ହୋଇଥିବା ବେଳେ କମ୍ ସଂଖ୍ୟାରେ ଯାତ୍ରୀ ବସ୍ ଟର୍ମିନାଲକୁ ଆସିଥିଲେ । ସହର ଭିତରେ ବସ୍ ଓ ଅଟୋ ଚଳାଚଳ ସମ୍ପୂର୍ଣ୍ଣ ବନ୍ଦ ରହିଥିଲା । କାଁ ଭାଁ ଅଟୋ ରୋଗୀଙ୍କୁ ନେଇ ମେଡିକାଲ୍ ପର୍ଯ୍ୟନ୍ତ ଯାଉଥିବା ଦେଖା ଯାଇଥିଲା ।
କର୍ଫ୍ୟୁ ସତ୍ତେ୍ୱ କଟକ ସହରରେ ସରକାରୀ ଅଫିସ୍, ବ୍ୟାଙ୍କ ଆଦି ଖୋଲା ରହିଥିଲେ ମଧ୍ୟ ନିତିଦିନିଆ କାମ ପ୍ରଭାବିତ ହୋଇଛି । ଇଣ୍ଟରନେଟ୍ ସମସ୍ୟା ଥିବାରୁ ସରକାରୀ କାର୍ଯ୍ୟ ସ୍ୱାଭାବିକ ଢଙ୍ଗରେ ହୋଇପାରିନାହିଁ । ମାଲଗୋଦାମ, ଛତ୍ରବଜାର, ଚୌଧୁରୀବଜାର, ପିଠାପୁର ଆଦି ହୋଲସେଲ୍ ମଣ୍ଡି ବନ୍ଦ ରହିଥିବାରୁ ବଡ଼ ଧରଣର ବ୍ୟବସାୟିକ କ୍ଷତି ହୋଇଛି । ଅନ୍ଲାଇନ୍ କାରବାର ବନ୍ଦ ରହିଥିବାରୁ ଟଙ୍କା ପଠାଇବା, ଆଣିବା ଭଳି କାମ ହୋଇ ପାରିନାହିଁ । ଏମିତିକି ପ୍ରାୟ ଅଧିକାଂଶ ଏଟିଏମ୍ କାର୍ଯ୍ୟ କରୁନଥିବାରୁ ଲୋକଙ୍କ ଆର୍ଥିକ ଦେଣନେଣ ସମସ୍ୟା ବଢ଼ିଯାଇଛି । ସେହିପରି ଗୁଜବ ଓ କାନକୁହା କଥାକୁ ବିଶ୍ୱାସକୁ ନନେବାକୁ ପୁଲିସ ପକ୍ଷରୁ ଜନସାଧାରଣଙ୍କୁ ଅନୁରୋଧ କରାଯାଇଛି । ଗୁଜବ ଖେଳାଉଥିବା ଲୋକଙ୍କ ଉପରେ କଡ଼ା କାର୍ଯ୍ୟାନୁଷ୍ଠାନ ନିଆଯିବାକୁ ଚେତାବନୀ ଦିଆଯାଇଛି । ସାଦା ପୋଷାକରେ ପୁଲିସ ଗଳିକନ୍ଦିରେ ବୁଲୁଥିବା ବେଳେ ଗୁଜବକାରୀଙ୍କୁ ଉଠାଇବାକୁ ମଧ୍ୟ ଯୋଜନା ରହିଥିବା ସୂଚନା ମିଳିଛି ।
