ନୀଳଗିରି,୨୪/୧୧(ବ୍ରଜକିଶୋର ପାଣି): ପ୍ରକୃତିପ୍ରେମୀ ଓ ପର୍ଯ୍ୟଟକଙ୍କ ପାଇଁ ଖୁସି ଖବର । ବର୍ଷାଋତୁ ପାଇଁ ପର୍ଯ୍ୟଟକଙ୍କ ସୁରକ୍ଷା ଦୃଷ୍ଟିରୁ ଗତ ଜୁନ ୧୫ରୁ ବନ୍ଦ ରହିଥିଲା କୁଲଡିହା ଅଭୟାରଣ୍ୟ । ପୁଣି ପର୍ଯ୍ୟଟନ ଋତୁ ଆସିବାରୁ ପ୍ରତ୍ୟେକ ବର୍ଷ ଭଳି ନଭେମ୍ବର ୧ରୁ ଖୋଲିବ କୁଲଡିହା ଅଭୟାରଣ୍ୟ । ପ୍ରାକୃତିକ ସୌନ୍ଦର୍ଯ୍ୟ ଭରା କୁଲଡିହା ଅଭୟାରଣ୍ୟରେ ପର୍ଯ୍ୟଟକମାନଙ୍କୁ ଆକୃଷ୍ଟ କରୁଥିବା ନେଚର୍ସ କ୍ୟାମ୍ପ ଜରାଜୀର୍ଣ୍ଣ ଅବସ୍ଥାରେ ପଡି ରହିଥିବା ଦେଖାଯାଇଛି ।
ସୂଚନାରୁ ପ୍ରକାଶ, ନୀଳଗିରି ଅଞ୍ଚଳରେ ଥିବା ୨୭୨.୭୫ ବର୍ଗ କିମି ବିଶିଷ୍ଟ କୁଲଡିହା ଅଭୟାରଣ୍ୟ ଚଳିତ ବର୍ଷ ପର୍ଯ୍ୟଟକଙ୍କୁ କିପରି ଅଧିକ ଆକୃଷ୍ଟ କରିବ ବନ ବିଭାଗ ପାଇଁ ଚିନ୍ତାର କାରଣ ପାଲଟିଛି । ଅଭୟାରଣ୍ୟରେ ହାତୀ, ବାଘ, ଭାଲୁ, ସମ୍ବର, ହରିଣ, ଠେକୁଆ, ଗୟଳ, ନୀଳଗାଈ, ବଳିଆ କୁକୁର, ବଜ୍ରକାପ୍ତା, ବେଲୋରା ମୂଷା, ମୟୂର ଇତ୍ୟାଦି ବନ୍ୟପ୍ରାଣୀ ଦେଖାଯାଆନ୍ତି । ସେହିପରି ନନ୍ଦନକାନନରୁ ଜଡ଼ାଚୁଆ ବିଟ ଅଧୀନ ଅସକଲପଦା ଠାରେ ହରିଣ ଆଣି ବର୍ଷକ ତଳୁ କ୍ୱାରେଣ୍ଟାଇନ ସେଣ୍ଟରରେ ରଖାଯାଇ ପରେ ଜଙ୍ଗଲରେ ଛଡ଼ା ଯିବାରୁ ହରିଣ ବଂଶ ଆଶାତୀତ ବୃଦ୍ଧି ହୋଇଛି । କୁଲଡିହାକୁ ଲାଗି ରହିଥିବା ଡ୍ୟାମ୍ ସାତଘାଟି, ଋଷିଆ, ପୁରୁଣାପାଣି, ଜଡ଼ାଚୁଆ, ମୁଖଚତୁରି, କଇମଚତୁରୀ ଅଞ୍ଚଳରେ ୨୫୦ରୁ ଅଧିକ ସଂଖ୍ୟାରେ ଦେଶୀ, ବିଦେଶୀ ପକ୍ଷୀ ଦେଖିବାକୁ ମଧ୍ୟ ମିଳିଥାଏ । ପ୍ରାକୃତିକ ସୌନ୍ଦର୍ଯ୍ୟ ଭରା ଏହି ଅଭୟାରଣ୍ୟରେ ଝରଣାର ଦୃଶ୍ୟ ମଧ୍ୟ ନିଆରା । ପର୍ଯ୍ୟଟନର ବିକାଶ ଲାଗି ଗୋହିରାଭୋଳଠାରେ "ଋଷିଆ ପ୍ରକୃତି ନିବାସ’ ମଧ୍ୟ ଖୋଲାଯାଇଛି । ରାତ୍ର ରହଣି ନିମନ୍ତେ ୯ଟି ତମ୍ବୁଘର ହୋଇଛି । ଏହା ସହ ନେଚର୍ସ କ୍ୟାମ୍ପ କରାଯାଇ ଖାଦ୍ୟ, ପିଇବା ପାଣି ଏବଂ ଶୌଚାଳୟ ବ୍ୟବସ୍ଥା କରାଯାଇଛି । ଅନ୍ୟପକ୍ଷେ ମାଦକଦ୍ରବ୍ୟ ଉପରେ କଟକଣା ରହିଛି । ବନ୍ୟପ୍ରାଣୀ ପଶି ନ ଆସିବା ପାଇଁ ଚାରି ପାଖରେ ଟ୍ରେଞ୍ଚ ମଧ୍ୟ ଖୋଳାଯାଇଛି । ଏହି ନେଚର୍ସ କ୍ୟାମ୍ପରେ ରାତ୍ରିଯାପନ କରି ପର୍ଯ୍ୟଟକମାନେ ବୁଲିବା ସମୟରେ ୪ଟି କୃତ୍ରିମ ସଲ୍ଟପିଟ, ୫ଟି ୱାଚ ଟାୱାରରୁ କୁଲଡିହା ଅଭୟାରଣ୍ୟର ପଶୁପକ୍ଷୀଙ୍କୁ ଦେଖିବା ସହ ପ୍ରକୃତିର ମଜା ନେଇପାରିବେ । ନେଚର୍ସ କ୍ୟାମ୍ପରେ ରାତ୍ରିଯାପନ ପାଇଁ ଅନ୍ଲାଇନରେ ବୁକିଂର ବ୍ୟବସ୍ଥା ରହିଛି । ଏପରିକି ଏହି ବିଷୟରେ ଅଧିକ ଜାଣିବା ପାଇଁ ୱେବସାଇଟ୍ ecotourodisha.com ରହିଛି ।
ପୂର୍ବାହ୍ନ ୯ଟା ୩୦ରୁ ଅପରାହ୍ନ ୧ଟାରେ ପ୍ରବେଶ ସହ ୫ଟା ପର୍ଯ୍ୟନ୍ତ ପରିଭ୍ରମଣର ସୁବିଧା ରଖାଯାଇଛି । ଏଠାରେ ଜଣେ ବ୍ୟକ୍ତି ପାଇଁ ୪୦ଟଙ୍କା, କ୍ୟାମେରା ପାଇଁ ୫୦ଟଙ୍କା, ଚାରିଚକିଆ ଯାନ ପାଇଁ ୧୦୦ ଟଙ୍କା ଓ ନେଚର୍ସ କ୍ୟାମ୍ପରେ ରାତ୍ରିଯାପନ ପାଇଁ ୩ ହଜାର ୮୫୪ ଟଙ୍କା ବନବିଭାଗ ଧାର୍ଯ୍ୟ କରିଛି । ହେଲେ ସେହି ନେଚର୍ସ କ୍ୟାମ୍ପର ତମ୍ବୁ ଘର ଜରାଜୀର୍ଣ୍ଣ ଅବସ୍ଥାରେ ଗତି କରୁଛି । କେଉଁଠି ତମ୍ବୁ ପଚି ଯାଇ ପାଣି ଗଳିବା ମଧ୍ୟ ଦେଖାଯାଇଛି । ଫଳରେ ଭିତରେ ପଡ଼ିଥିବା ବ୍ୟାଡ୍ ମଧ୍ୟ ଖରାପ ହୋଇଯାଇଥିବା ଜଣାପଡିଛି । ଭିତରେ ଦୁର୍ଗନ୍ଧ ହେଉଥିବା ବେଳେ ପରିବେଶ ମଧ୍ୟ ଭଲ ନାହିଁ । ବାହାରେ ଅନାବନା ଘାସ ଓ ଗଛ ଉଠି ଜଙ୍ଗଲ ଭଳି ହୋଇଛି । ଅବଶ୍ୟ ଆଗକୁ କୁଲଡିହା ଖୋଲାଯିବା ପାଇଁ ସଫେଇ କାର୍ଯ୍ୟ ଚାଲୁ ରହିଛି । ହେଲେ କ୍ୟାମ୍ପର ଅବସ୍ଥା ଜାଣିଲେ ପର୍ଯ୍ୟଟକମାନେ ମୁହଁ ମୋଡିବା ନିଶ୍ଚିତ । ଋଷିଆ ଡ୍ୟାମ୍କୁ ବାହାରି ଥିବା ଝରଣା ନିକଟରେ ନଦୀଟି ପୋତି ହୋଇ ଯାଇଥିବା ବେଳେ ପୂର୍ବରୁ ବୋଟିଂ ଫେସିଲିଟି ଆଉ ଦେଖିବା ପାଇଁ ମିଳିବ ନାହିଁ । ନେଚର୍ସ କ୍ୟାମ୍ପ ବନାଇବା ବେଳେ କୋଟିଏ ଟଙ୍କାରୁ ଊଦ୍ଧ୍ୱର୍ ଏବେ ପାଣିରେ ପଡିଥିବା ବେଳେ ଏହାର ମୁଖ୍ୟ କାରଣ ହେଉଛନ୍ତି ତତ୍କାଳୀନ ଡିଏଫଓ ଖୁଶୱନ୍ତ ସିଂ । ତାଙ୍କ କାର୍ଯ୍ୟକାଳ ସମୟରେ କୁଲଡିହା ପ୍ରତି ଅଣଦେଖା ପାଇଁ ଏଭଳି ସମସ୍ୟା ଉପୁଜିଥିବା ଅଭିଯୋଗ ଉଠିଛି । ତେବେ ଏଭଳି ସମସ୍ୟା ନେଇ ନୂତନ ଡିଏଫଓ ପ୍ରଫୁଲ୍ଲ ମଲ୍ଲିକଙ୍କ ଦୃଷ୍ଟି ଆକର୍ଷଣ ପରେ ସେ ସମସ୍ୟା ନେଇ ସ୍ୱୀକାର କରିଛନ୍ତି । ତେବେ ଏନେଇ ସେ ସରକାରଙ୍କ ଦୃଷ୍ଟି ଆକର୍ଷଣ କରିବା ସହ ଅନୁଦାନ ରାଶି ଆସିଲେ ନେଚର୍ସ କ୍ୟାମ୍ପ ନବକଳେବର ହେବ ବୋଲି କହିଛନ୍ତି ।
