ଭୁବନେଶ୍ୱର ୦୧/୧୧: ରାଜମହଲ ଛକରେ ଥିବା ଏକ ଘରୋଇ ମେସରେ ରୁମମେଟ୍ଙ୍କ ବର୍ବରକାଣ୍ଡ ସାମ୍ନାକୁ ଆସିଛି । ୩ ରୁମ୍ମେଟ୍ ସଂଘବଦ୍ଧ ଭାବେ ଜଣେ ଯୁବତୀଙ୍କୁ ଜିଅନ୍ତା ଜାଳିବାକୁ ଉଦ୍ୟମ କରିଛନ୍ତି । ଏମିତିକି ଘଣ୍ଟାଏ ଧରି ନିସ୍ତୁକ ମାଡ଼ ମାରିଛନ୍ତି । ଜୀବନରୁ ମାରିଦେବାକୁ ସବୁ ପ୍ରକାର ଉଦ୍ୟମ କରିଛନ୍ତି ।
ଆକ୍ରମଣର ଶିକାର ଯୁବତୀଙ୍କ ଘର ଜଗତସିଂହପୁର ଅଭୟଚନ୍ଦ୍ରପୁର ଥାନା ଅଞ୍ଚଳରେ । ସେ ୪ ବର୍ଷ ଧରି ଅଶୋକ ନଗରରେ ଥିବା ଏକ ହୋମ ଡେକର ସୋ ରୁମ୍ରେ ଚାକିରି କରିଛନ୍ତି । ସଂସ୍ଥାଠାରୁ କିଛି ଦୂରରେ ଥିବା ଏକ ଘରୋଇ ମେସ୍ରେ ୩ ବର୍ଷ ଧରି ଅଛନ୍ତି । ଉକ୍ତ ମେସ୍ରେ ତାଙ୍କୁ ମିଶାଇ ମୋଟ ୯ଜଣ ଯୁବତୀ ରୁହନ୍ତି । ଉକ୍ତ ମେସର ଉପର ମହଲାରେ ଘର ମାଲିକ ମଧ୍ୟ ସପରିବାରେ ରହୁଛନ୍ତି । ଆକ୍ରମଣ କରିଥିବା ଯୁବତୀଙ୍କ ଘର ନୟାଗଡ଼ରେ । ଉଭୟେ ୬ ମାସ ହେଲା ଏକାଠି ଗୋଟିଏ ରୁମ୍ରେ ରହୁଛନ୍ତି ।
କିଛି ଦିନ ଧରି ତାଙ୍କୁ ରୁମ୍ମେଟ୍ମାନେ ମିଶିକି ସବୁବେଳେ ହଇରାଣ କରୁଥିଲେ । ନାନା କଥାରେ ଅଶ୍ଲୀଳ ଭାଷାରେ ଗାଳିଗୁଲଜ କରୁଥିଲେ । ଗତ ବୁଧବାର ଯୁବତୀଜଣକ ନିଜ କର୍ମକ୍ଷେତ୍ରରୁ ସନ୍ଧ୍ୟାରେ ବାହାରି ମେସ୍ରେ ପହଞ୍ଚିଲେ । ରାତିରେ ସମସ୍ତେ ମିଶିକି ଭାତ, ଚିକେନ ରୋଷେଇ କଲେ । ରାତ୍ରିଭୋଜନ ସରିବା ପରେ ୩ଜଣ ରୁମମେଟ୍ ବସି ନିଜ ପୁରୁଷବନ୍ଧୁମାନଙ୍କ ସହ ଫୋନ୍ରେ ଗପିବାକୁ ଲାଗିଲେ । ରାତିରେ ଶୋଇବାକୁ ଅସୁବିଧା ହେବାରୁ ଯୁବତୀଜଣକ ଏହାକୁ ବିରୋଧ କଲେ । ୩ଜଣ ରୁମ୍ମେଟ୍ ପୁଣି ତାଙ୍କୁ ଅଶ୍ଲୀଳ ଭାଷାରେ ଗାଳିଗୁଲଜ କରିବା ଆରମ୍ଭ କଲେ । କିନ୍ତୁ ଏଥର ଯୁବତୀଜଣକ ଆଉ ସହିବା ମୁଡ୍ରେ ନଥିଲେ । ଏହାକୁ ବିରୋଧ କଲେ । ସିଧା ପୁଲିସ୍ରେ ଜଣାଇବେ ବୋଲି ଚେତାଇଲେ । ଏତିକିରେ ୩ ରୁମମେଟ୍ଙ୍କ ମୁଣ୍ଡକୁ ପିତ୍ତ ଚଢ଼ିଗଲା । ସେମାନେ ସମ୍ପୃକ୍ତ ଯୁବତୀଙ୍କୁ ସଂଘବଦ୍ଧ ଭାବେ ଆକ୍ରମଣ କଲେ । ୨ଜଣ ତାଙ୍କର ୨ଟି ହାତକୁ ଜାବୁଡ଼ି ଧରିଲେ । ନୟାଗଡ଼ର ଯୁବତୀଜଣକ ତାଙ୍କୁ ଲଗାତର ଚାପୁଡ଼ା ମାରିଚାଲିଲେ ।
ଏତିକିରେ ମନ ବୁଝିଲାନି ଯେ, ରୋଷେଇ ଘରୁ ଏକ ଛୁରୀ ଆଣି ତାଙ୍କ ବେକକୁ କାଟିବାକୁ ଉଦ୍ୟମ କରିଥିଲେ । ୩ଜଣ ମିଶିକି ତାଙ୍କୁ ତଳେ ପକାଇ ନିସ୍ତୁକ ମାଡ଼ ମାରିଥିଲେ ଶେଷରେ ରୋଷେଇ ଘରେ ଥିବା ଗ୍ୟାସ୍ ସିଲିଣ୍ଡରକୁ ୩ଥର ଖୋଲି ନିଆଁ ଲଗାଇବାକୁ ଉଦ୍ୟମ କରିଥିଲେ । ଯୁବତୀଜଣକ ଖୁବ୍ ଜୋରରେ ଚିତ୍କାର କରିଥିଲେ । ଘର ମାଲିକଙ୍କୁ ଡାକିଥିଲେ । କିନ୍ତୁ କେହି ଶୁଣିଲେନି । ଶେଷରେ ଡାଏଲ୍-୧୧୨କୁ ଫୋନ୍ କରି ଅଭିଯୋଗ କରିବାରୁ ପିସିଆର ଭ୍ୟାନ ଆସି ଉକ୍ତ ମେସ୍ରେ ପହଞ୍ଚିଲା । ୩ ରୁମ୍ମେଟଙ୍କ କବଳରୁ ଯୁବତୀଙ୍କୁ ଉଦ୍ଧାର କରିଥିଲା । ଯୁବତୀଜଣକ ଗୁରୁବାର ସକାଳେ କ୍ୟାପିଟାଲ ଥାନାର ଦ୍ୱାରସ୍ଥ ହୋଇଥିଲେ । ୩ ରୁମ୍ମେଟଙ୍କ ନାଁରେ ଏତଲା ଦେଇଛନ୍ତି। ପୁଲିସ ୬୮୦/୨୫ରେ ଏକ ମାମଲା ରୁଜୁ କରି ଚୁପ୍ ହୋଇ ବସିପଡି଼ଛି । କାର୍ଯ୍ୟାନୁଷ୍ଠାନ ତ ଦୂର କଥା, ଆକ୍ରମଣକାରୀମାନଙ୍କୁ ଥରଟିଏ ବି ଥାନାକୁ ଡାକିଲାନି । ୩ ରୁମ୍ମେଟ୍ ଆଜି ଯୁବତୀଙ୍କୁ ଜୀବନରୁ ମାରିଦେବାକୁ ଧମକ ଦେଇଛନ୍ତି ।
