ନୂଆଦିଲ୍ଲୀ: ରବିବାର ତୁର୍କୀର ସର୍ବବୃହତ ସହର ଇସ୍ତାନବୁଲରେ ପାକିସ୍ତାନ ଏବଂ ଆଫଗାନିସ୍ତାନ ମଧ୍ୟରେ ହୋଇଥିବା ଆଲୋଚନା ଆଗକୁ ବଢିପାରିନାହିଁ। ଆଫଗାନ ତାଲିବାନ ପ୍ରତିନିଧି ଦଳ ତେହେରିକ-ଏ-ତାଲିବାନ ପାକିସ୍ତାନ (ଟିଟିପି) ଏବଂ ଅନ୍ୟାନ୍ୟ ଆତଙ୍କବାଦୀ ଗୋଷ୍ଠୀ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବାକୁ ପ୍ରତିଶ୍ରୁତି ଦେବାକୁ ମନା କରିଦେଇଥିଲେ। ଯାହାଫଳରେ ଉଭୟ ପକ୍ଷ ମଧ୍ୟରେ ଆଲୋଚନା ଆଗକୁ ବଢିପାରିନଥିଲା।
ଏନେଇ ପାକିସ୍ତାନର ଡନ୍ ଖବରକାଗଜ ପ୍ରକାଶ କରିଛି ଯେ, ଆଲୋଚନାର ଦ୍ୱିତୀୟ ଦିନରେ ମଧ୍ୟ ଉଭୟ ପକ୍ଷ ଆତଙ୍କବାଦୀ ସଂଗଠନଗୁଡ଼ିକୁ ନିପାତ କରିବା ପାଇଁ ଏକ ସହମତିରେ ପହଞ୍ଚିପାରି ନାହାନ୍ତି। ପ୍ରାୟ ନଅ ଘଣ୍ଟାର ଆଲୋଚନା ପରେ, ପାକିସ୍ତାନୀ ସୁରକ୍ଷା ଅଧିକାରୀମାନେ କହିଛନ୍ତି ଯେ ସେମାନଙ୍କ ଦଳ ଆଫଗାନିସ୍ତାନକୁ ତାଙ୍କର ଚୂଡ଼ାନ୍ତ ସ୍ଥିତି ଉପସ୍ଥାପନ କରିଛି। ତାଲିବାନ ଶାସନ ସୀମା ପାର ଏବଂ ଆଫଗାନିସ୍ତାନ ମଧ୍ୟରେ ଆତଙ୍କବାଦକୁ ନିପାତ କରିବା ପାଇଁ ଠୋସ୍ ଏବଂ ବିଶ୍ୱସନୀୟ ପଦକ୍ଷେପ ନେବାକୁ ପଡିବ ବୋଲି ପାକିସ୍ତାନ ଆଫଗାନିସ୍ତାନ ନିକଟରେ ଦାବି କରିଛି।
ରିପୋର୍ଟ ଅନୁଯାୟୀ, ଜଣେ ବରିଷ୍ଠ ପାକିସ୍ତାନୀ ସୁରକ୍ଷା ଅଧିକାରୀ କହିଛନ୍ତି ଯେ ଆଫଗାନ ତାଲିବାନର ଆତଙ୍କବାଦୀଙ୍କୁ ପୃଷ୍ଠପୋଷକତା ଗ୍ରହଣୀୟ ନୁହେଁ। ସେ କହିଛନ୍ତି ଯେ ଏ କ୍ଷେତ୍ରରେ ତାଲିବାନର ପ୍ରତିକ୍ରିୟା ଅଯୌକ୍ତିକ ଏବଂ ବାସ୍ତବତାଠୁ ବିପରୀତ ରହିଛି। ଅଧିକାରୀ ଏହା ମଧ୍ୟ ଅଭିଯୋଗ କରିଛନ୍ତି ଯେ ତାଲିବାନ ପ୍ରତିନିଧି ଦଳ ଏକ ଭିନ୍ନ ଏଜେଣ୍ଡା ଅନୁସରଣ କରୁଥିବା ପରି ମନେ ହେଉଛି।
ସବୁଠୁ ଆଶ୍ଚର୍ଯ୍ୟଜନକ ଘଟଣାକ୍ରମେ ଇସ୍ତାନବୁଲରେ ଚାଲୁଥିବା ଏହି ଆଲୋଚନା ସମୟରେ ପାକ୍ ଅଧିକୃତ କାଶ୍ମୀର (ପିଓକେ)ର ଲିପା ସେକ୍ଟରରେ ଅସ୍ତ୍ରବିରତି ଉଲ୍ଲଂଘନ ହୋଇଥିବା ଜଣାପଡ଼ିଛି। ତେବେ ଏଥିରେ କୌଣସି ସରକାରୀ କ୍ଷତିର ରିପୋର୍ଟ ମିଳିନାହିଁ, କିନ୍ତୁ ସ୍ଥାନୀୟ ଲୋକମାନେ ରବିବାର ସନ୍ଧ୍ୟାରେ ପ୍ରବଳ ଗୁଳିଗୋଳା ମାଡ଼ ହୋଇଥିବା ସୂଚନା ପ୍ରଦାନ କରିଛନ୍ତି। ପାକିସ୍ତାନୀ ଅଧିକାରୀମାନେ ଚେତାବନୀ ଦେଇଛନ୍ତି ଯେ ତାଲିବାନର ଆଭିମୁଖ୍ୟ ଉଭୟ ଆଫଗାନିସ୍ତାନ ଏବଂ ପାକିସ୍ତାନକର ସ୍ୱାର୍ଥରେ ନାହେଁ। ସେମାନେ କହିଛନ୍ତି ଯେ ଆଲୋଚନାରେ ଆହୁରି ଅଗ୍ରଗତି ଆଫଗାନ ତାଲିବାନର କଥାବର୍ତ୍ତା ଉପରେ ନିର୍ଭର କରିବ।
ରବିବାର ଆଫଗାନ ତାଲିବାନ ପ୍ରତିନିଧି ଦଳ ପାକିସ୍ତାନର ଦାବିର ଲିଖିତ ଉତ୍ତର ଦେଇଥିଲା, ଯାହା ପରେ ଇସଲାମାବାଦ ନିଜର ପ୍ରତିକ୍ରିୟା ପ୍ରକାଶ କରିଥିଲା। ଆଜି ଅପରାହ୍ନରେ ତୁର୍କୀ ଏବଂ କାତାରର ଭଳି ଦେଶର ମଧ୍ୟସ୍ଥିଙ୍କ ଯୋଗଦାନରେ ଅନୁଷ୍ଠିତ ଦ୍ୱିତୀୟ ବୈଠକ ପ୍ରାରମ୍ଭରେ ଆଶା ସୃଷ୍ଟି କରିଥିଲା। ତେବେ, ଦୀର୍ଘ ଆଲୋଚନା ପରେ, ଆଫଗାନ ତାଲିବାନ ପ୍ରତିନିଧି ଦଳ କୌଣସି ଲିଖିତ ପ୍ରତିଶ୍ରୁତି ଦେବାକୁ ମନା କରିଦେଇଥିଲେ।
ପାକିସ୍ତାନୀ ପ୍ରତିନିଧି ଦଳରେ ISI, ସାମରିକ ଅଭିଯାନ ନିର୍ଦ୍ଦେଶାଳୟ ଏବଂ ବୈଦେଶିକ ବ୍ୟାପାର ମନ୍ତ୍ରଣାଳୟର ବରିଷ୍ଠ ସୁରକ୍ଷା ଏବଂ ଗୁପ୍ତଚର ଅଧିକାରୀମାନେ ସାମିଲ ଥିଲେ। ଆଫଗାନିସ୍ତାନ ପକ୍ଷର ନେତୃତ୍ୱ ଉପ-ସ୍ୱରାଷ୍ଟ୍ର ମନ୍ତ୍ରୀ ମୌଲଭି ରହମତୁଲ୍ଲା ନଜିବ ନେଇଥିଲେ ଏବଂ ବରିଷ୍ଠ ତାଲିବାନ ନେତା ଅନସ ହକ୍କାନି, ସୁହେଲ ଶାହିନ, ନୁରୁର ରେହମାନ ନୁସରତ ଏବଂ ଅବଦୁଲ କାହାର ବଲଖି ସାମିଲ ଥିଲେ।
ସୂଚନା ମୁତାବକ, କାବୁଲରେ ବିସ୍ଫୋରଣ ପାଇଁ ତାଲିବାନ ସରକାର ପାକିସ୍ତାନକୁ ଦାୟୀ କରିବା ପରେ ଏହି ସଂଘର୍ଷ ଆରମ୍ଭ ହୋଇଥିଲା। ଏହା ପରେ ଉଭୟ ଦେଶ ସୀମା ପାର ଆକ୍ରମଣ ଆରମ୍ଭ କରିଦେଇଥିଲେ। ଦୁଇ ଦେଶ ପ୍ରଥମେ ୪୮ ଘଣ୍ଟାର ଅସ୍ତ୍ରବିରତି ପାଇଁ ରାଜି ହୋଇଥିଲେ, କିନ୍ତୁ ଏହା ପରେ କିଛି ସମୟ ପରେ ଭାଙ୍ଗି ଯାଇଥିଲା। ରବିବାର ଦିନ କାତାର ଏବଂ ତୁର୍କୀ ଦ୍ୱାରା ଦ୍ୱିତୀୟ ଅସ୍ତ୍ରବିରତି ହୋଇଥିଲା, ଯାହା ଏପର୍ଯ୍ୟନ୍ତ ବଳବତ୍ତର ରହିଛି।
