ପୁରୀ,୧୨/୦୯: ସୁସ୍ଥ କ୍ରାନ୍ତି ନେପାଳରୁ ସୃଷ୍ଟି ହେବ । ଭାରତ ଓ ସମଗ୍ର ବିଶ୍ୱ ଏଥିରୁ ଶିକ୍ଷା ନେବ । ପୁରୀ ଗୋବର୍ଦ୍ଧନ ପୀଠାଧୀଶ ଶଙ୍କରାଚାର୍ଯ୍ୟ ନିଶ୍ଚଳାନନ୍ଦ ସରସ୍ୱତୀ ୨୦୧୮ରେ ଦେଇଥିବା ଏଭଳି ଏକ ବକ୍ତବ୍ୟର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । ନେପାଳର ରାଜଧାନୀ କାଠମାଣ୍ଡୁଠାରେ ଏକ ଧାର୍ମିକ ସଭାରେ ସେ ରଖିଥିବା ସମ୍ବୋଧନରେ ଏଭଳି ଚେତାବନୀପୂର୍ଣ୍ଣ ଭବିଷ୍ୟବାଣୀ କରିଥିଲେ । ଶାସନ ଓ ଦଣ୍ଡ କିପରି ହେବା ଉଚିତ୍ ସେ ଉଲ୍ଲେଖ କରିଥିଲେ ।
ନେପାଳ ପ୍ରଧାନମନ୍ତ୍ରୀଙ୍କୁ ସେ କହିଥିଲେ, ନେପାଳର ରାଜା ପଶୁପତିନାଥ । ଏଠାରେ ପଶୁପତିନାଥଙ୍କ ଶାସନ ଚାଲେ । ତେଣୁ ବେଦ ଅନୁଯାୟୀ ସଂସ୍କାର ଓ ସୁରକ୍ଷିତ ଶାସନ ହେବା ଉଚିତ୍ । ବିଶ୍ୱରେ ସନାତନ ବୈଦିକ ଶାସନତନ୍ତ୍ର ସ୍ଥାପିତ ହେଲେ ସମସ୍ତଙ୍କ ପୋଷକ ହେବ । କାହାରି ଶୋଷଣ ହେବନି । ଏହା ଅପେକ୍ଷାରେ ମୁଁ ରହିଛି ବୋଲି ଶଙ୍କରାଚାର୍ଯ୍ୟ କହିଥିଲେ ।
ଭାରତର ତତ୍କାଳୀନ ପ୍ରଧାନମନ୍ତ୍ରୀ ଓ ରାଷ୍ଟ୍ରପତିଙ୍କୁ ପରାମର୍ଶ ଦେଇ କହିଥିଲେ, ବିଶ୍ୱରେ ସୁସ୍ଥ କ୍ରାନ୍ତିର ଆରମ୍ଭ ନେପାଳରୁ ହେବ । ଏହା ସମସ୍ତଙ୍କ ଉପଯୋଗରେ ଆସିବ । ସନାତନ ବୈଦିକ ଶାସନ ତନ୍ତ୍ର ନିଜ ସ୍ୱରୂପରେ ପ୍ରତିଷ୍ଠା ହେଲେ ଅନ୍ୟ ତନ୍ତ୍ରର ଶାସନ ଆବଶ୍ୟକ ପଡ଼ିବନି । ସେହିପରି ଚୀନ୍, ରୁଷ, ଆମେରିକା, ଇଂଲଣ୍ଡଙ୍କୁ ଚେତାବନୀ ଦେଇ ଭାଗବତ ସପ୍ତମ ସ୍କନ୍ଦରେ ବର୍ଣ୍ଣିତ ଯୁଧିଷ୍ଠିରଙ୍କୁ ନାରଦ ଦେଇଥିବା ଉପଦେଶର ଉଦାହରଣ ଦେଇଥିଲେ । ଦେହ ଢାଙ୍କିବାକୁ ବସ୍ତ୍ର, ପେଟ ପୂରିବାକୁ ଖାଦ୍ୟ, ବୈଦିକ କାର୍ଯ୍ୟ, ଋଷି ଓ ଅତିଥିଙ୍କ କାର୍ଯ୍ୟ ନିମନ୍ତେ ଆବଶ୍ୟକ ଧନଠାରୁ ଅଧିକ ଉପରେ କେହି ଅଧିକାର କଲେ ସେ ଚୋର । ସେ ଦଣ୍ଡର ପାତ୍ର । ସେହିପରି ଦୁଇ ଜଣ ଦଣ୍ଡର ପାତ୍ର ବୋଲି ବିଦୂର ଧୃତରାଷ୍ଟ୍ରଙ୍କୁ କହିଥିଲେ ।
ସେ କହିଥିଲେ, ଦଣ୍ଡଧାରୀର କର୍ତ୍ତବ୍ୟ ଅନୁଯାୟୀ ଧନ ରଖିବ । କେହି ଧନୀ ଥିଲେ ନିଜର ଧନର ସଦୁପଯୋଗ ଅନ୍ୟର ହିତରେ କରିବ । ଧନକୁ ନିଜ ଉପଭୋଗ ନିମନ୍ତେ ବ୍ୟବହାର କଲେ ସେ ଦଣ୍ଡର ପାତ୍ର । ସେହିପରି ସ୍ୱସ୍ଥ ଶରୀର ଥାଇ କେହି କାର୍ଯ୍ୟ ନ କଲେ ବା ବିଳାସୀ ହେଲେ ସେ ଦଣ୍ଡର ପାତ୍ର ବୋଲି ଶଙ୍କରାଚାର୍ଯ୍ୟ କହିଥିଲେ ।
ନିଜ ଧର୍ମ ପାଳନରେ ପ୍ରମାଦ ହେବାରୁ କମ୍ୟୁନିଷ୍ଟଙ୍କ ପ୍ରାଦୁର୍ଭାବ ଦେଖାଦେଇଛି । ସନାତନ ବୈଦିକ ଆର୍ଯ୍ୟ ଧର୍ମ ପ୍ରତିଷ୍ଠାରେ ଅବହେଳା ପାଇଁ ସେ ନିଜ ଗାଦିକୁ ଦୋଷ ଦେଇଛନ୍ତି । ସନାତନ ବୈଦିକ ଆର୍ଯ୍ୟ ସିଦ୍ଧାନ୍ତ ପ୍ରତିଷ୍ଠା ହୋଇଥିଲେ ସମଗ୍ର ବିଶ୍ୱ ଆମର ଓ ଆମେ ସମସ୍ତଙ୍କର ହୋଇଥାଆନ୍ତେ ବୋଲି ଶଙ୍କରାଚାର୍ଯ୍ୟ ସେତେବେଳେ କହିଥିଲେ ।
