ଲେଖନପୁର, ୦୮/୦୬: ଶନିବାର ବିଳମ୍ୱିତ ରାତିରେ ୨ ଟି ଘରୁ ଲକ୍ଷାଧିକ ଟଙ୍କାର ଅଳଙ୍କାର ସମେତ ନଗଦ ଟଙ୍କା ଲୁଟ୍ ହୋଇଥିବା ଥାନାରେ ଅଭିଯୋଗ ହୋଇଛି । ଭୁବନେଶ୍ୱର ଉପକଣ୍ଠ ଲେଖନପୁର ଗାଁର ଗୋବର୍ଦ୍ଧନ ପଟ୍ଟନାୟକ ଏବଂ ଭୋବନି ଦାସଙ୍କ ଘରୁ ଏହି ଲୁଟ୍ ହୋଇଛି ।
ସୂଚନା ମୁତାବକ, ଲେଖନପୁର ଗାଁର ଗୋବର୍ଦ୍ଧନ ପଟ୍ଟନାୟକଙ୍କ ପରିବାର ଖାଇପିଇ ଶୋଇଥିଲେ । ରାତି ପ୍ରାୟ ୩ଟାରେ ଦୁର୍ବୃତ୍ତମାନେ ଝରକା କାଟି ଘରେ ପଶିଥିଲେ । ଘରେ ପଶି ଆଲମିରା ଭାଙ୍ଗି ହାର, ଚେନ୍ , କାନଫୁଲ, ଝରା, ମୁଦି, ପାଉଁଜି ସହ ନଗଦ ୧୨ହଜାର ଟଙ୍କା ଲୁଟି ନେଇଥିଲେ । ସକାଳ ହେବା ପରେ ଘରୁ ଲୁଟ୍ ହୋଇଥିବା ବିଷୟରେ ପରିବାର ଲୋକେ ଜାଣିଥିଲେ । ଏନେଇ ବାଘମାରୀ ଥାନାରେ ଗୋବର୍ଦ୍ଧନ ଅଭିଯୋଗ କରିଥିଲେ । ଅଭିଯୋଗ ଆଧାରରେ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛି । ପରେ ସାଇଣ୍ଟିଫିକ ଟିମ ଘଟଣାସ୍ଥଳରେ ପହଞ୍ଚି ସନ୍ଧାନୀ କୁକୁର ସହାୟତାରେ ତଦନ୍ତ ଜାରି ରଖିଛି ।
ସେହିପରି ଉକ୍ତ ଗାଁରେ ରହୁ ନଥିବା ଭୋବନି ଦାସଙ୍କ ଘର କବାଟ ଭାଙ୍ଗି ଦୁର୍ବୃତ୍ତମାନେ ଲୁଟ୍ କରିଛନ୍ତି । ଦୁର୍ବୃତ୍ତମାନଙ୍କୁ ପଡୋଶୀ ଦେଖି ଭୋବନିକୁ ଜଣାଇଛନ୍ତି । ଭୋବନି ଗାଁରେ ପହଞ୍ଚି ନଥିବା ବେଳେ କଣ କଣ ଲୁଟ୍ ହୋଇଛି, ତାହାର ସୂଚନା ମିଳିପାରି ନାହିଁ ।
