ଭୁବନେଶ୍ଵର, ୨୨/୯ : ଶକ୍ତିପୀଠରେ ନବରାତ୍ରୀ ପୂଜା ଆରମ୍ଭ, ଚଳଚଞ୍ଚଳ ଦେବୀପୀଠ। ସୋମବାରଠୁ ଶାରଦୀୟ ନବରାତ୍ରୀ ପୂଜା ଆରମ୍ଭ ହୋଇଛି। ୯ ଦିନ ଧରି ମା' ଦୁର୍ଗାଙ୍କ ୯ ସ୍ଵରୂପକୁ ପୂଜା କରାଯିବ। ନବରାତ୍ରୀର ପ୍ରଥମ ଦିନ ଘଟ ସ୍ଥାପନ କରାଯିବା ସହ ମା' ଦୁର୍ଗାଙ୍କ ପ୍ରଥମ ସ୍ଵରୂପ ମା' ଶୈଳପୁତ୍ରୀଙ୍କ ପୂଜା କରାଯିବ। ମା' ଶୈଳପୁତ୍ରୀଙ୍କ ଆରଧନା କଲେ ସାଂସାରିକ ସୁଖ ଓ ପୋକ୍ଷ ପ୍ରାପ୍ତି ହୁଏ, ଜୀବନର ସବୁ କଷ୍ଟ ଦୂର ହୁଏ ଓ ସାଧକ ଉନ୍ନତି ମାର୍ଗରେ ଆଗକୁ ବଢେ ବୋଲି ବିଶ୍ଵାସ ରହିଛି।
ପର୍ବତରାଜ ହିମାଳୟଙ୍କ ପୁତ୍ରୀ ହେଉଛନ୍ତି ମାତା ଶୈଳପୁତ୍ରୀ। ପୂର୍ବଜନ୍ମରେ ସେ ଦକ୍ଷ ରାଜାଙ୍କ କନ୍ୟା ମାତା ସତୀ ଥିଲେ ଓ ଶିବଙ୍କୁ ବିବାହ କରିଥିଲେ। ଦକ୍ଷ ରାଜାଙ୍କ ଦ୍ଵାରା ଆୟୋଜିତ ଯଜ୍ଞରେ ଶିବଙ୍କ ଅପମାନ ସହ୍ୟ କରିନପାରି ମାତା ସତୀ ଆତ୍ମଦାହ କରିଥିଲେ। ଏହାପରେ ଭଗବାନ ଶିବ କ୍ରୋଧିତ ହୋଇ ସତୀଙ୍କ ଶରୀର ନେଇ ସଂସାର ସାରା ବିଚରଣ କରିଥିଲେ। ସେହି ସମୟରେ ଭଗବାନ ବିଷ୍ଣୁ ସୁଦର୍ଶନ ଚକ୍ରରେ ସତୀଙ୍କ ଶରୀରକୁ ୫୧ ଭାଗରେ ବିଚ୍ଛେଦ କରିଥିଲେ। ଏହି ୫୧ଟି ଅଙ୍ଗ ଯେଉଁ ସ୍ଥାନରେ ପଡ଼ିଥିଲା ସେଠାରେ ଶକ୍ତିପୀଠ ଗଢିଉଠିଥିଲା। ଏହାପରେ ସତୀ ହିମାଳୟଙ୍କ କୋଳରେ ଜନ୍ମଗ୍ରହଣ କରି ଶୈଳପୁତ୍ରୀ ଅବତାର ନେଇଥିଲେ।
ସକାଳୁ ସ୍ନାନ କରି ଶୁଭ ସମୟରେ ପୂଜା ଆରମ୍ଭ କରନ୍ତୁ। ଘଟ ସ୍ଥାପନ କରିବା ପରେ, ଏକ ଲାଲ କପଡା ବିଛାଇ ଚାଉଳ ରଖନ୍ତୁ, ଏବଂ ତା' ଉପରେ ଦେବୀ ଶୈଳପୁତ୍ରୀଙ୍କ ଏକ ଫଟୋ କିମ୍ବା ମୂର୍ତ୍ତି ରଖନ୍ତୁ। ତାଙ୍କୁ ଗଙ୍ଗା ଜଳରେ ଅଭିଷେକ କରନ୍ତୁ। ଲାଲ କପଡା, ଲାଲ ଫୁଲ, ଲାଲ ଚନ୍ଦନ ଏବଂ ଲାଲ ଫଳ ଅର୍ପଣ କରିବା ବିଶେଷ ଫଳପ୍ରଦ ବୋଲି ବିବେଚନା କରାଯାଏ। ଦେବୀଙ୍କୁ ସନ୍ତୁଷ୍ଟ କରିବା ପାଇଁ ଆଳତୀ କରନ୍ତୁ। ନବରାତ୍ରୀର ପ୍ରଥମ ଦିନରେ ଦେବୀ ଶୈଳପୁତ୍ରୀଙ୍କୁ ଗାଈ ଘିଅ ଅର୍ପଣ କରିବା ଅତ୍ୟନ୍ତ ଶୁଭ ବୋଲି ବିବେଚନା କରାଯାଏ। ଏହାଦ୍ଵାରା ସମସ୍ତ ରୋଗ ଏବଂ ବ୍ୟାଧି ଦୂର ହୋଇଯାଏ, ଶରୀର ସୁସ୍ଥ ରହିଥାଏ। ଓଁ ଏଁ ହ୍ରିଂ କ୍ଲିଂ ଶୈଳପୁତ୍ରୈ ନମଃ ମନ୍ତ୍ର ଉଚ୍ଚାରଣ କରି ମା'ଙ୍କୁ ପୂଜା କରନ୍ତୁ ଶୁଭଫଳ ମିଳିବ।
