ନୂଆଦିଲ୍ଲୀ,୧୩/୦୯: ହାଇସିକ୍ୟୁରିଟି ଜୋନ୍ ଘୋଷିତ ହୋଇଥିବା ସୁପ୍ରିମକୋର୍ଟର ମୁଖ୍ୟ ପରିସରରେ ଫଟୋଗ୍ରାଫି, ଭିଡିଓଗ୍ରାଫି ଓ ସୋସିଆଲ୍ ମିଡିଆ ରିଲ୍ସ ବନାଇବା ଉପରେ ବ୍ୟାନ୍ ଲଗାଯାଇଛି । ସେପ୍ଟେମ୍ବର ୧୦ରେ ଜାରି ହୋଇଥିବା ଏକ ସର୍କୁଲାରରେ କୋର୍ଟ ଏହା କହିଛନ୍ତି ।
ସେହି ସର୍କୁଲାର ଅନୁସାରେ, ହାଇ ସିକ୍ୟୁରିଟି ଜୋନ୍ର ଲନ୍ରେ ଫଟୋଗ୍ରାଫି ଓ ଭିଡିଓଗ୍ରାଫି ଲାଗି ମୋବାଇଲ୍ ଫୋନ୍ର ବ୍ୟବହାର କରି ହେବନାହିଁ । ଭିଡିଓଗ୍ରାଫି, ରିଲ୍ସ ବନାଇବା ଓ ଫଟୋ ଉଠାଇବା ପାଇଁ ବ୍ୟବହୃତ ହେବାକୁ ଥିବା କ୍ୟାମେରା, ଟ୍ରାଇପଡ୍ ଓ ସେଲ୍ଫି ଷ୍ଟିକ୍କୁ ସେହି ଅଞ୍ଚଳକୁ ନେବା ଉପରେ ପ୍ରତିବନ୍ଧକ ରହିବ । କୌଣସି ଓକିଲ, କୋର୍ଟକୁ ଆସିଥିବା ବାଦୀ, ଇଣ୍ଟର୍ନ ଏହି ନିର୍ଦ୍ଦେଶର ଉଲ୍ଲଂଘନ କଲେ ସମ୍ବନ୍ଧିତ ବାର୍ ଆସୋସିଏସନ୍, ରାଜ୍ୟ ବାର୍ କାଉନସିଲ୍ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବେ । ଯଦି କୌଣସି କର୍ମଚାରୀ ଏହି ନିର୍ଦ୍ଦେଶର ଉଲଂଘନ କରନ୍ତି ତେବେ ତାଙ୍କ ବିଭାଗୀୟ ଅଧିକାରୀ ନିୟମ ଅନୁସାରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ନେବେ । ସୁରକ୍ଷାକର୍ମୀଙ୍କ ନିକଟରେ ଯେକୌଣସି ବ୍ୟକ୍ତି, କର୍ମଚାରୀ, ଓକିଲ ଓ ଅନ୍ୟମାନଙ୍କୁ ହାଇସିକ୍ୟୁରିଟି ଜୋନ୍ରେ ଫଟୋ ଉଠାଇବା କିମ୍ବା ଭିଡିଓ ବନାଇବାରୁ ରୋକିବାର ଅଧିକାର ରହିବ ।
ଏହି ନିୟମ ଗଣମାଧ୍ୟମ କର୍ମୀଙ୍କ ଲାଗି ମଧ୍ୟ ଲାଗୁ ହେବ । ଅପେକ୍ଷାକୃତ କମ୍ ସୁରକ୍ଷାଯୁକ୍ତ ଅଞ୍ଚଳରେ ଗଣମାଧ୍ୟମ କର୍ମୀ ସାକ୍ଷାତକାର ଓ ଖବରର ସିଧା ପ୍ରସାରଣ କରିପାରିବେ ବୋଲି କୋର୍ଟ ନିର୍ଦ୍ଦେଶ ଜାରି କରିଛନ୍ତି । ଯଦି ଗଣମାଧ୍ୟମ କର୍ମୀ ଏହି ନିର୍ଦ୍ଦେଶର ଉଲ୍ଲଂଘନ କରନ୍ତି ତେବେ ସୁପ୍ରିମକୋର୍ଟର ହାଇ ସିକ୍ୟୁରିଟି ଅଞ୍ଚଳ ମଧ୍ୟକୁ ତାଙ୍କର ପ୍ରବେଶ ଉପରେ ମାସେ ଯାଏ ବ୍ୟାନ୍ ଲାଗିପାରେ । ନିକଟରେ ସୁପ୍ରିମକୋର୍ଟଙ୍କ ଆଡ୍ଭୋକେଟ୍ସ ଅନ୍ ରେକର୍ଡ ଆସୋସିଏସନ୍ ସିଜେଆଇ ବିଆର ଗଭଇଙ୍କୁ ଚିଠି ଲେଖି ଓକିଲ ଓ ସାଇବର ଇନ୍ଫ୍ଲୁଏନ୍ସରମାନଙ୍କର କୋର୍ଟ ପରିସରରେ ଫଟୋଗ୍ରାଫି ଓ ଭିଡିଓଗ୍ରାଫିକୁ ନେଇ ଚିନ୍ତା ପ୍ରକଟ କରିଥିଲେ । ସେହିପରି ସୁପ୍ରିମକୋର୍ଟ ବାର୍ ଆସୋସିଏସନ୍ରେ ମଧ୍ୟ ଏକ ପ୍ରସ୍ତାବ ପାସ୍ ହୋଇଥିଲା । ସେଥିରେ ସୁପ୍ରିମକୋର୍ଟ ପରିସର ମଧ୍ୟରେ ଭିଡିଓଗ୍ରାଫି, ରିଲ୍ସ ବନାଇବା ଓ ସୋସିଆଲ୍ ମିଡିଆ କଣ୍ଟେଣ୍ଟ ପ୍ରସ୍ତୁତିରେ ସାମିଲ ଓକିଲଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ସୁପାରିଶ କରାଯାଇଥିଲା ।
