ନୂଆଦିଲ୍ଲୀ, ୧୫/୦୯: ତେଲ କିଣାକୁ ନେଇ ଭାରତକୁ ପୁଣି ଥରେ ଆମେରିକା ନାଲିଆଖି ଦେଖାଇଛି । ଆମେରିକା କୃଷି ସାମଗ୍ରୀର ଭାରତ ବଜାର ପ୍ରବେଶ ସୁଯୋଗ ଅଭାବକୁ ନେଇ ଏବେ ଟାର୍ଗେଟ କରିଛନ୍ତି ବାଣିଜ୍ୟ ସଚିବ ହୋୱାର୍ଡ ଲୁଟ୍ନିକ । ଲୁଟ୍ନିକ କହିଛନ୍ତି ଯେ, ୧୪୦ କୋଟି ଜନସଂଖ୍ୟା ଥିବା ସତ୍ତେ୍ୱ ଭାରତ ଆମେରିକାର କିଞ୍ଚିତ ପରିମାଣର ମକା କିଣୁନାହିଁ । ଭାରତ ଆମେରିକା ମକା କିଣିବ ନ ହେଲେ ଉଚ୍ଚ ପରିମାଣର ଟାରିଫ୍ ସାମ୍ନା କରିବ ।
ଭାରତ, କାନାଡା, ବ୍ରାଜିଲ୍ ଭଳି ଦେଶ ଆମେରିକାକୁ ସାମଗ୍ରୀ ବିକି ବେଶ ଫାଇଦା କମାଉଛନ୍ତି । ଆମେ ସେମାନଙ୍କୁ ବଜାର ଖୋଲା କରିଛୁ । ମାତ୍ର ନିଜ ଦେଶରେ ସେମାନେ ଆମେରିକା ସାମଗ୍ରୀକୁ ପୁରାଇ ଦେଉନାହାନ୍ତି ବୋଲି ଲୁଟନିକ ଅଭିଯୋଗ କରିଛନ୍ତି । ଟାରିଫ୍ ଲଦି ଆମେରିକା ବଡ଼ କ୍ଷତି ସହିବ ବୋଲି ଏକ ପ୍ରଶ୍ନର ଉତ୍ତରରେ ଲୁଟ୍ନିକ କହିଲେ, ଆମେ ବହୁତ ଅର୍ଥ ଖର୍ଚ୍ଚ କରୁଛୁ । ଗୋଟିଏ ପଟେ ଆମକୁ ସେମାନେ ବହୁତ କିଛି ସାମଗ୍ରୀ ବିକୁଛନ୍ତି ମାତ୍ର ଆମେରିକା ସାମଗ୍ରୀ ଏତେଟା କିଣୁନାହାନ୍ତି । ଭାରତ ୧୪୦ କୋଟି ଲୋକଙ୍କ ଦେଶ ବୋଲି ନିଜକୁ କହୁଛି, ମାତ୍ର କିଛି ପରିମାଣର ମକା ନେବାକୁ ସକ୍ଷମତା ଦେଖାଉନି ।
ଯାହା ବି କିଣୁଛନ୍ତି ସେଥିରେ ବଡ଼ ପରିମାଣର ଟାରିଫ୍ ମଧ୍ୟ ଲାଗୁ କରୁଛନ୍ତି । ଏହି ଟାରିଫ୍ କମାଇବାକୁ ରାଷ୍ଟ୍ରପତି ଟ୍ରମ୍ପ ଦେଶ ଗୁଡ଼ିକୁ କହିଥିଲେ । ଆମେରିକା ପ୍ରଦାନ କରୁଥିବା ବଜାର ସୁବିଧା ଅନ୍ୟ ଦେଶ ଦିଅନ୍ତୁ ବୋଲି କୁହାଯାଇଥିଲା । ମାତ୍ର ଦେଶ ଗୁଡ଼ିକ ଏହା ମାନି ନ ଥିଲେ । ଫଳରେ ସବୁ କିଛି ଠିକ୍ ନ ହେବା ଯାଏ ଟାରିଫ୍ ଲଗାଯାଇଛି । ଏହାକୁ ଦେଶ ଗୁଡ଼ିକ ଗ୍ରହଣ ନ କଲେ ଆମେରିକା ସହ କାରବାରରେ ଚ୍ୟାଲେଞ୍ଜ ସାମ୍ନା କରିବେ । ଏହା ରାଷ୍ଟ୍ରପତି ଟ୍ରମ୍ପଙ୍କ ମଡେଲ୍ ବୋଲି ଲୁଟ୍ନିକ ଉଲ୍ଲେଖ କରିଛନ୍ତି ।
ଟ୍ରମ୍ପଙ୍କ ଟାରିଫ ବୋମା ପରେ ବିଭିନ୍ନ ଦେଶ ଏବେ ଆମେରିକା ସହ ବାଣିଜ୍ୟ ଚୁକ୍ତି କରୁଛନ୍ତି । ତେବେ ଭାରତ ଏବଂ ଆମେରିକା ଦ୍ୱିପାକ୍ଷିକ ବାଣିଜ୍ୟ ଚୁକ୍ତି ଏଯାଏ ସ୍ୱାକ୍ଷରିତ ହୋଇପାରିନି । ଆମେରିକା କୃଷିଜାତ ସାମଗ୍ରୀ ଏବଂ ଦୁଗ୍ଧଜାତୀୟ ଉତ୍ପାଦକୁ ଘରୋଇ ବଜାରରେ ପ୍ରବେଶ ନେଇ ଭାରତ ସହମତ ହେଉନାହିଁ । ଫଳରେ ଉଭୟ ଦେଶ ମଧ୍ୟରେ ବାଣିଜ୍ୟ ଚୁକ୍ତିରେ ଏହା ବାଧକ ସାଜିଛି ।
ରୁଷ ତେଲ କିଣା ବାଦ୍ ଏଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଭାରତ ଉପରେ ଉଚ୍ଚ ପରିମାଣର ଟାରିଫ୍ ଲାଗି ଦାୟୀ ବୋଲି ଲୁଟ୍ନିକ ଦୋହରାଇଛନ୍ତି । କୃଷି ଓ ଦୁଗ୍ଧଜାତୀୟ ସାମଗ୍ରୀ କ୍ଷେତ୍ରରେ ଆମେରିକାର ପ୍ରବେଶ ହେଲେ ଦେଶର ଏହି କ୍ଷେତ୍ର ବଡ଼ ମାତ୍ରାରେ କ୍ଷତିଗ୍ରସ୍ତ ହେବ ବୋଲି କେନ୍ଦ୍ର ସରକାର ଆଶଙ୍କା କରୁଛନ୍ତି । ଫଳରେ ଏ କ୍ଷେତ୍ରରେ ଆମେରିକାର ପ୍ରବେଶ ଚାହୁଁନି ଭାରତ । ତେବେ ଏ ନେଇ ଆମେରିକା ଜିଦ୍ଦିରେ ରହିଛି ।
ଅନ୍ୟପଟେ ରୁଷ-ୟୁକ୍ରେନ ଯୁଦ୍ଧ ବନ୍ଦ କରିବା ଲାଗି ଆମେରିକା ରାଷ୍ଟ୍ରପତି ଡୋନାଲ୍ଟ ଟ୍ରମ୍ପ ମଧ୍ୟ ରୁଷ ତେଲ କିଣୁଥିବା ଦେଶ ଗୁଡ଼ିକୁ ଟାର୍ଗେଟ କରୁଛନ୍ତି । ରୁଷ ତେଲ କିଣାକୁ ନେଇ ଭାରତକୁ ଆମେରିକା ବାରମ୍ବାର ନାଲିଆଖି ଦେଖାଉଛି । ଏହି ତେଲ କିଣି ଯୁଦ୍ଧରେ ରୁଷକୁ ସମର୍ଥନ କରୁଥିବା ଟ୍ରମ୍ପଙ୍କ ସମେତ ତାଙ୍କ ସହଯୋଗୀ ମାନେ ଭାରତକୁ ସମାଲୋଚନା କରୁଛନ୍ତି ।
ପୂର୍ବରୁ ବାଣିଜ୍ୟିକ ଘାଟା ଦର୍ଶାଇ ଭାରତ ଉପରେ ୨୫% ଟାରିଫ ଲାଗିଥିଲା । ମାତ୍ର ରୁଷ ତେଲ କ୍ରୟକୁ ନେଇ ଅତିରିକ୍ତ ୨୫% ଟାରିଫ ଲଗାଇଛି ଆମେରିକା । ଫଳରେ ଭାରତ ଉପରେ ମୋଟ ୫୦% ଟାରିଫ ଲାଗିଛି । ଏହା ଦ୍ୱାରା ଆମେରିକାରକୁ ଭାରତର ରପ୍ତାନି ବଡ଼ ମାତ୍ରାରେ ପ୍ରଭାବିତ ହେବ ବୋଲି ଆଶଙ୍କା କରାଯାଉଛି । ଦେଶର ସ୍ୱାର୍ଥ ଏବଂ ଇନ୍ଧନ ସୁରକ୍ଷା ଲାଗି ରୁଷ ତେଲ କିଣାଯାଉଛି ବୋଲି କହୁଛି ଭାରତ । ସେହିଭଳି ଚୀନ ଭଳି ଦେଶ ଉପରେ ୧୦୦% ଟାରିଫ ଧମକ ଦେଇଛନ୍ତି ଟ୍ରମ୍ପ । ରୁଷ ତେଲ କିଣା ବନ୍ଦ କରିବା ଲାଗି ନାଟୋ ଦେଶ ସମୂହକୁ ମଧ୍ୟ କହିଛନ୍ତି ଟ୍ରମ୍ପ।
