ନୂଆଦିଲ୍ଲୀ,୧୦/୧୦: ଆଗାମୀ ମହିଳା ପ୍ରିମିୟର ଲିଗ୍(ଡବ୍ଲ୍ୟୁପିଏଲ୍) ର ମେଗା ନିଲାମ ପାଇଁ ନିୟମାବଳୀ ଘୋଷଣା କରାଯାଇଛି । ଆସନ୍ତା ମାସ ୨୫ରୁ ୨୯ ତାରିଖ ମଧ୍ୟରେ ମେଗା ନିଲାମ ପାଇଁ ସମୟ ଧାର୍ଯ୍ୟ କରାଯାଇଛି । ଏହା ପୂର୍ବରୁ ୫ତାରିଖ ସୁଦ୍ଧା ଫ୍ରାଞ୍ଚାଇଜମାନେ ଚୂଡ଼ାନ୍ତ ଖେଳାଳି ରିଟେନ ତାଲିକା ପ୍ରଦାନ କରିବେ । ୧୮ ତାରିଖ ନିଲାମ ପାଇଁ ଖେଳାଳିଙ୍କ ପଞ୍ଜୀକରଣ ଶେଷ ହେବ । ଏହାପରେ ବିସିସିଆଇ ୨୦ ତାରିଖରେ ସମ୍ପୂର୍ଣ୍ଣ ନିଲାମ ତାଲିକା ଘୋଷଣା କରିବ । ପ୍ରତ୍ୟେକ ଫ୍ରାଞ୍ଚାଇଜ୍ ଅତି ବେଶୀରେ ୫ଜଣ ଖେଳାଳିଙ୍କୁ ରିଟେନ କରିପାରିବେ । ଏଥିରେ ୩ଜଣ ଅନ୍ତର୍ଜାତୀୟ କ୍ରିକେଟ୍ ଖେଳିଥିବା ଭାରତୀୟ ଖେଳାଳି ରହିବେ । ସେହିପରି ୨ଜଣ ବିଦେଶୀ ଖେଳାଳି କିମ୍ବା ୨ଜଣ ଘରୋଇ ଖେଳାଳି ରହିବେ ।
ଯଦି କୌଣସ ଫ୍ରାଞ୍ଚାଇଜ୍ ୫ଜଣ ଖେଳାଳି ରିଟେନ କରନ୍ତି, ତେବେ ଏଥିରେ ଜଣେ ଘରୋଇ ଖେଳାଳି ରହିବା ବାଧ୍ୟତାମୂଳକ । ନିଲାମରେ ଖେଳାଳି କିଣିବା ପାଇଁ ପ୍ରତ୍ୟେକ ଫ୍ରାଞ୍ଚାଇଜ ସର୍ବାଧିକ ୧୫କୋଟି ଟଙ୍କା ଖର୍ଚ୍ଚ କରି ପାରିବେ । କୌଣସି ଫ୍ରାଞ୍ଚାଇଜ ସର୍ବାଧିକ ୫ଜଣ ଖେଳାଳି ରିଟେନ କଲେ ସେମାନଙ୍କ ପର୍ସରୁ ୯.୨୫ କୋଟି ଟଙ୍କା କାଟ୍ କରାଯିବ ।
ସେହିପରି ୪ଖେଳାଳି ରିଟେନ କଲେ ୮.୭୫ କୋଟି ଟଙ୍କା, ୩ ଖେଳାଳିଙ୍କ ପାଇଁ ୭.୭୫କୋଟି ଟଙ୍କା, ୨ ଖେଳାଳିଙ୍କ ପାଇଁ ୬କୋଟି ଓ ଜଣେ ଖେଳାଳି ରିଟେନ କଲେ ୩.୫କୋଟି ଟଙ୍କା କାଟ କରାଯିବ । ୫ଜଣ ଖେଳାଳି ରିଟେନ କରାଗଲେ ପ୍ରଥମ ଖେଳାିଙ୍କ ମୂଲ୍ୟ ୩.୫ କୋଟି ଟଙ୍କା, ଦ୍ୱିତୀୟ ଖେଳାଳିଙ୍କ ମୂଲ୍ୟ ୨.୫କୋଟି ଟଙ୍କା, ତୃତୀୟ ଖେଳାଳିଙ୍କ ମୂଲ୍ୟ ୧.୭୫ କୋଟି, ଚତୁର୍ଥ ଖେଳାଳିଙ୍କ ମୂଲ୍ୟ ୧ କୋଟି ଓ ପଞ୍ଚମ ଖେଳାଳିଙ୍କ ମୂଲ୍ୟ ୫୦ଲକ୍ଷ ଟଙ୍କା ଧାର୍ଯ୍ୟ କରାଯାଇଛି । ନିଲାମରେ ପ୍ରତ୍ୟେକ ଫ୍ରାଞ୍ଚାଇଜ୍ଙ୍କୁ ୫ଟି ଲେଖାଏଁ ଆରଟିଏମ(ରାଇଟ ଟୁ ମ୍ୟାଚ) କାର୍ଡ ଉପଯୋଗ କରିବାର ସୁଯୋଗ ରହିଛି । ଫଳରେ ଏହି କାର୍ଡ ବଳରେ ଉକ୍ତ ଫ୍ରାଞ୍ଚାଇଜ୍ ସେମାନଙ୍କ ପୂର୍ବ ଖେଳାଳିଙ୍କୁ ଫେରାଇ ଆଣି ପାରିବେ । ମାତ୍ର ୫ଜଣ ଖେଳାଳି ରିଟେନ କଲେ ଉକ୍ତ ଫ୍ରାଞ୍ଚାଇଜ୍ ଆରଟିଏମ କାର୍ଡ ବ୍ୟବହାର କରିପାରିବେ ନାହିଁ ।
