ଭୁବନେଶ୍ୱର,୦୪/୧୧: ପବିତ୍ର କାର୍ତ୍ତିକ ପୂର୍ଣ୍ଣିମା ଅବସରରେ ବୋଇତ ବନ୍ଦାଣ ଉତ୍ସବ ପାଇଁ ଏକାମ୍ର କ୍ଷେତ୍ରରେ ହୋଇଛି ଜୋରଦାର ପ୍ରସ୍ତୁତି । ଏଠାରେ ଥିବା ବିଭିନ୍ନ ମନ୍ଦିର, ପବିତ୍ର ସରୋବର, ନଦୀ ଘାଟ ଆଦି ସ୍ଥାନରେ ବୋଇତ ବନ୍ଦାଣ ନିମନ୍ତେ ସମସ୍ତ ବ୍ୟବସ୍ଥା ହୋଇଛି । ମୁଖ୍ୟତଃ ବିନ୍ଦୁସାଗର ଏବଂ କପିଳେଶ୍ୱରଙ୍କ ମଣିକର୍ଣ୍ଣିକା ପୁଷ୍କରିଣୀ ସହିତ କୂଆଖାଇ ଓ ଦୟାନଦୀରେ ସର୍ବାଧିକ ଶ୍ରଦ୍ଧାଳୁ ବୁଡ଼ ପକାଇବା ସହ ବୋଇତ ବନ୍ଦାଣ କରିବେ । ଚଳିତ ବର୍ଷ ଏହି କ୍ଷେତ୍ରର ବାଙ୍କୁଆଳ ସ୍ଥିତ କୂଆଖାଇ ନଦୀ ଘାଟରେ ଅନୁଷ୍ଠିତ ହେବାକୁ ଥିବା ବାଲିଯାତ୍ରା ଓ ସେଠାକାର ବୋଇତ ବନ୍ଦାଣ ମଧ୍ୟ ଅନେକଙ୍କୁ ଆକୃଷ୍ଟ କରିବ ।
କାର୍ତ୍ତିକ ପୂର୍ଣ୍ଣିମାରେ ଭୋର ୩ଟା ବେଳେ ଶୀଲିଙ୍ଗରାଜଙ୍କ ମନ୍ଦିର ପହୁଡ ଖୋଲିବ । ପରେ ଠାକୁରଙ୍କ ମଙ୍ଗଳ ଆଳତୀ ଓ ଅବକାଶ ବଢିବା ପରେ ଶ୍ରଦ୍ଧାଳୁଙ୍କୁ ସକାଳ ୧୦ଟା ପର୍ଯ୍ୟନ୍ତ ସାହାଣମେଲା ଦର୍ଶନ ପାଇଁ ଅନୁମତି ରହିଛି । ଏହା ପରେ ମନ୍ଦିରରେ ଦିଅଁଙ୍କ ଦିନର ଅବଶିଷ୍ଟ ନୀତିକାନ୍ତି କରାଯିବ ବୋଲି ସୋମବାର କାର୍ଯ୍ୟ ନିର୍ବାହୀ ଅଧିକାରୀଙ୍କ ଅଧ୍ୟକ୍ଷତାରେ ଏକ ପ୍ରସ୍ତୁତି ବୈଠକରେ ଚୁଡାନ୍ତ ହୋଇଛି । ଏଠାରେ ଉଭୟ ଶ୍ରୀଲିଙ୍ଗରାଜ ମନ୍ଦିର ଏବଂ ସମଗ୍ର ବିନ୍ଦୁସାଗର ନିମନ୍ତେ ସାଢେ୫ ପ୍ଳାଟୁନ ଫୋର୍ସ, ୧୧ ଅଫିସର, ୨ ଇନ୍ସପେକ୍ଟର ଏବଂ ଜଣେ ଏସିପି ସୁରକ୍ଷା ଦାୟିତ୍ୱରେ ରହିବେ । ଏହା ବ୍ୟତିତ ଅଗ୍ନିଶମ, ଓଡ୍ରାଫ ଏବଂ ଆମ୍ବୁଲାନ୍ସ ସେବା ମଧ୍ୟ ଉପଲବ୍ଧ ରଖିବାକୁ ଚୁଡାନ୍ତ ହୋଇଛି । ଏଠାରେ ବିନ୍ଦୁସାଗର ସରୋବରର ଉତ୍ତରେଶ୍ୱର ଘାଟରେ ଭୁବନେଶ୍ୱର ସାଂସ୍କୃତିକ ପରିଷଦ ପକ୍ଷରୁ ପୂର୍ବତନ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡାଙ୍କ ନେତୃତ୍ୱରେ ବୋଇତ ବନ୍ଦାଣ ଉତ୍ସବ ହେବ । ଭୋର ୩ଟାରେ ନିମାକାନ୍ତ ରାଉତ ଓ ସାଥୀମାନେ ଭଜନ ପରିବେଷଣ କରିବେ । ପରେ ସାଧବ ସାଧବାଣୀଙ୍କ ଉପସ୍ଥିତିରେ ଏକ ବଡ଼ ବୋଇତ ବିଭିନ୍ନ ବ୍ୟକ୍ତି ବିଶେଷଙ୍କ ଉପସ୍ଥିତିରେ ବନ୍ଦାଇ ଭଷା ଯିବ । ଏହି ମଞ୍ଚରେ ଏଥର ୬ ଜଣଙ୍କୁ ସାମାଜିକ ଅବଦାନ ପାଇଁ ‘ଏକାମ୍ର ସାଂସ୍କୃତିକ ସମ୍ମାନ’ରେ ସମ୍ମାନିତ କରାଯିବ ।
