ଗୌହାଟୀ,୩୦/୦୯: ମଙ୍ଗଳବାରଠୁ ଆରମ୍ଭ ହେଉଛି ମହିଳା ଦିନିକିଆ ବିଶ୍ୱକପ୍ର ୧୩ତମ ସଂସ୍କରଣ । ଉଦ୍ଘାଟନୀ ମୁକାବିଲାରେ ଦୁଇ ଆୟୋଜକ ଦଳ ଭାରତ ଓ ଶ୍ରୀଲଙ୍କା ହେବେ ସାମ୍ନା ସାମ୍ନି । ଆସାମର ଏସିଏ ଷ୍ଟାଡ଼ିୟମ୍ରେ ଖେଳାଯିବ ଏହି ମ୍ୟାଚ । ଉଭୟ ଦଳ ୨ଟି ଲେଖାଏଁ ଅଭ୍ୟାସ ମ୍ୟାଚ ଖେଳିବା ପରେ ଗୌହାଟୀରେ ପହଞ୍ଚିଥିଲେ । ସୋମବାର ଉଭୟ ଦଳ ବର୍ଷାପଡ଼ା ଷ୍ଟାଡ଼ିୟମ୍ରେ ଜୋରଦାର ଅଭ୍ୟାସ କରିଛନ୍ତି ।
ପୂର୍ବ ପ୍ରଦର୍ଶନକୁ ଦେଖିଲେ ଭାରତର ପଲା ଭାରି ରହିବା ନିଶ୍ଚିତ । ମାତ୍ର ଶ୍ରୀଲଙ୍କା ବିପର୍ଯ୍ୟୟ ଘଟାଇବାର କ୍ଷମତା ରଖିଛି । ଉଭୟ ଦଳ ମଧ୍ୟରେ ଖେଳାଯାଇଥିବା ଶେଷ ୫ଟି ଦିନିକିଆରୁ ଭାରତ ୪ଟି ମ୍ୟାଚ ଜିତିଛି । ଗତ ମେ’ ମାସରେ ଶ୍ରୀଲଙ୍କା ଏକ ମ୍ୟାଚ୍ରେ ଭାରତକୁ ହରାଇଥିଲା । ହର୍ଷିତା ସମରବିକ୍ରମା ଓ ନୀଳକ୍ଷିକା ସିଲଭା ଅର୍ଦ୍ଧଶତକ ଅର୍ଜନ କରି ଦଳକୁ ଜିତାଇଥିଲେ । ଉଭୟ ବିଶ୍ୱକପ୍ ଦଳରେ ରହିଛନ୍ତି ଓ ଚମତ୍କାର ଫର୍ମରେ ଅଛନ୍ତି । ହର୍ଷିତା ୧୦ଟି ମ୍ୟାଚ୍ରୁ ୪୮୯ ରନ ସଂଗ୍ରହ କରିଛନ୍ତି ।
ଅଧିନାୟିକା ଚାମରି ଆଟ୍ଟାପଟୁ ବିସ୍ଫୋରକ ବ୍ୟାଟିଂ ପାଇଁ ପରିଚିତ । ମାତ୍ର ବୋଲିଂ କରି ସେ ୱିକେଟ୍ ନେବାରେ ମଧ୍ୟ ସିଦ୍ଧହସ୍ତ । ଶେଷ ୯ଟି ଦିନିକିଆରେ ସେ ୧୨ଟି ୱିକେଟ୍ ନେଇଛନ୍ତି । ଭାରତୀୟ ଦଳ ସନ୍ତୁଳିତ ଓ ଶକ୍ତିଶାଳୀ । ସ୍ମୃତି ମନ୍ଧନା ଚମତ୍କାର ଫର୍ମରେ ରହିଛନ୍ତି । ଶେଷ ୧୦ଟି ମ୍ୟାଚ୍ରେ ମନ୍ଧନା ୬୩.୬ ହାରରେ ୬୩୬ ରନ ସଂଗ୍ରହ କରିଛନ୍ତି । ଗତ ଅଷ୍ଟ୍ରେଲିଆ ବିପକ୍ଷ ଦିନିକିଆ ସିରିଜରେ ସେ ୨ଟି ଶତକ ଅର୍ଜନ କରିଥିଲେ । ମୋଟ ଉପରେ କହିବାକୁ ଗଲେ ତାଙ୍କ ବ୍ୟାଟିଂ ଉପରେ ଦଳର ଭାଗ୍ୟ ନିର୍ଭର କରିବ । ମାତ୍ର ଅଲ୍ରାଉଣ୍ଡର ଦୀପ୍ତି ଶର୍ମାଙ୍କ ଭୂମିକା ଗୁରୁତ୍ୱପୂର୍ଣ୍ଣ ରହିବ ।
ମଙ୍ଗଳବାର ଉଦୀୟମାନ ପେସ୍ ବୋଲର କ୍ରାନ୍ତି ଗୌଡ଼ଙ୍କ ଉପରେ ନଜର ରହିବା ନିଶ୍ଚିତ । ୭ଟି ମ୍ୟାଚ୍ ଖେଳି ସେ ୧୪ଟି ୱିକେଟ୍ ଅକ୍ତିଆର କରିଛନ୍ତି । ବର୍ଷାପଡ଼ା ଷ୍ଟାଡ଼ିୟମ୍ ପ୍ରଥମ କରି ମହିଳା ଦିନିକିଆ ଆୟୋଜନ କରିବାକୁ ଯାଉଛି । ଏଠାକାର ପିଚ୍ ବ୍ୟାଟିଂ ପାଇଁ ଅନୁକୂଳ ରହିବା ଏକ ପ୍ରକାର ନିଶ୍ଚିତ । ଗତ ଆଇପିଏଲ୍ ସମୟରେ ଏହି ପିଚ୍ରେ ସଂଘର୍ଷପୂର୍ଣ୍ଣ ମ୍ୟାଚ୍ ଦେଖିବାକୁ ମିଳିଥିଲା । ରାତ୍ରିରେ କାକର ପ୍ରଭାବ ରହିବ । ତେଣୁ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଆଶା କରାଯାଉଛି ।
ସମ୍ଭାବ୍ୟ ଦଳ
ଭାରତ: ସ୍ମୃତି ମନ୍ଧନା, ପ୍ରତିକା ରାୱଲ, ଜେମିମା ରୋଡ୍ରିଗ୍ସ, ହର୍ମନପ୍ରୀତ କୌର (ଅଧିନାୟିକା), ଦୀପ୍ତି ଶର୍ମା, ରିଚା ଘୋଷ, ଅମନଜୋତ କୌର, ସ୍ନେହ ରାଣା, ରିଣୁକା ସିଂହ, କ୍ରାନ୍ତି ଗୌଡ଼, ରାଧା ଯାଦବ ।
ଶ୍ରୀଲଙ୍କା: ହଂସିନୀ ପେରେରା, ଚାମରୀ ଆଟ୍ଟାପଟୁ (ଅଧିନାୟିକା), ହର୍ଷିତା ସମରବିକ୍ରମା, ଭିଷ୍ମୀ ଗୁଣରତ୍ନେ, ଅନୁଷ୍କା ସଂଜିବନୀ, କବିଶା ଦିଲହାରୀ, ଦେଓମି ବିହଙ୍ଗା, ପିୟୁମି ବତ୍ସଲା, ଅଚିନି କୂଳସୂରିୟା, ଉଦେଶିକା ପ୍ରବୋଧିନୀ, ମଲ୍କି ବଦରା ।
