ମାଲକାନଗିରି,୧୫/୧୧:କାର୍ତ୍ତିକ ପୂର୍ଣ୍ଣମୀରେ ପୋଖରୀରେ ବୁଡ଼ିଯାଇ ଜଣେ ୧୨ ବର୍ଷର ନାବାଳିକାର ମୃତ୍ୟୁ ଘଟିଛି । ମୃତ ନାବାଳିକା ଚମ୍ପାନଗର ଗ୍ରାମର ୧୨ବର୍ଷର ନାବାଳିକା ସାବିତ୍ରୀ ହନ୍ତାଳ ବୋଲି ଜଣାପଡିଛି । ମାଲକାନଗିରି ଜିଲ୍ଲା ଚାଲାଣଗୁଡା ପଞ୍ଚାୟତ ଚମ୍ପାନଗର ଗ୍ରାମରେ ଏପରି ଦୁଃଖଦ ଘଟଣା ଘଟିଛି ।
ସୂଚନା ମୁତାବକ, ଶୁକ୍ରବାର ଭୋରୁ ଗ୍ରାମବାସୀମାନେ ନିକଟସ୍ଥ ରକ ବଡ଼ ପୋଖରୀରେ ଡଙ୍ଗା ଭସାଇ ଘରକୁ ପଳାଇଥିଲେ । ଡଙ୍ଗାରେ ରଖା ଯାଇ ଭସା ଯାଇଥିବା ଟଙ୍କିକିଆ ଓ ଦୁଇଟିଙ୍କିଆ କଏନ୍ ଆଣିବା ପାଇଁ କିଛି ଛୋଟ ପିଲାଙ୍କ ସହିତ ସାବିତ୍ରୀ ପୋଖରୀ ଭିତରକୁ ପଶି ଯାଇଥିଲା । ସେଠାରେ ତାଙ୍କ ଗୋଡ ଖସି ଯାଇଥିଲା । ଗୋଡ଼ ଖସିବାରୁ ପୋଖରୀର ଗଭୀର ପାଣିରେ ସାବିତ୍ରୀ ବୁଡି ଯାଇଥିଲେ । ଏହା ଦେଖି ସାଥିରେ ଥିବା ପିଲାମାନେ ଗ୍ରାମରେ ଆସି କହିବା ପରେ ପରିବାର ଲୋକେ ଓ ଗ୍ରାମବାସୀ ପୋଖରୀ ନିକଟକୁ ଯାଇ ଖୋଜିଥିଲେ । ବହୁତ ଖୋଜିବା ପରେ ନପାଇବାରୁ ପୋଲିସ ଓ ଅଗ୍ନିଶମ ବାହିନୀକୁ ଫୋନ କରିଥିଲେ । ଖବର ପାଇ ଘଟଣାସ୍ଥଳରେ ଅଗ୍ନିଶମ ବାହିନୀର କର୍ମଚାରୀ ପହଞ୍ଚି ପୋଖରୀରୁ ସାବିତ୍ରୀକୁ ଉଦ୍ଧାର କରିଥିଲେ । ସେଠାରୁ ଉଦ୍ଧାର କରି ତୁରନ୍ତ ଆମ୍ବୁଲାନ୍ସ ଯୋଗେ ମାଲକାନଗିରି ଜିଲ୍ଲା ହସ୍ପିଟାଲକୁ ନେଇ ଯାଇଥିଲେ । ସେଠାରେ ଡାକ୍ତର ସାବିତ୍ରୀକୁ ମୃତ ଘୋଷଣା କରିଥିଲେ । ପୋଲିସ ମୃତଶରୀର ଜବତ କରି ଶବ ବ୍ୟବଚ୍ଛେଦ ପରେ ପରିବାରକୁ ମୃତ ଶରୀର ହସ୍ତାନ୍ତର କରିବା ସହ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଲାଇଛନ୍ତି।
ପବିତ୍ର କାର୍ତ୍ତିକ ପୂର୍ଣ୍ଣିମାରେ ସବୁଠି ଆଜି ଆନନ୍ଦ ଉଲ୍ଲାସର ମାହୋଲ । ଡଙ୍ଗା ଭସାଇ ପୂଣ୍ୟ ଅର୍ଜନ କରିବାକୁ ସବୁ ଜଳାଶୟରେ ଭିଡ଼ । ମାତ୍ର ଏପରି ସମୟରେ ଆଜି ସକାଳେ ମାଲକାନଗିରି ଜିଲ୍ଲା ସଦର ଚମ୍ପାନଗରରେ ଘଟି ଯାଇଛି ଏକ ଦୁଃଖଦ ଘଟଣା । ଭସା ଯାଇଥିବା ଡଙ୍ଗାରୁ ଟଙ୍କା ସଂଗ୍ରହ କରିବାକୁ ଯାଇ ପାଣିରେ ବୁଡ଼ି ମୃତ୍ୟୁ ବରଣ କରିଛନ୍ତି ନାବାଳିକା ସାବିତ୍ରୀ । ସାବିତ୍ରୀଙ୍କ ବାପା ତିରୁପତି ହନ୍ତାଳଙ୍କ ଗତ ଏକ ବର୍ଷ ତଳେ ମୃତ୍ୟୁ ଘଟିଥିଲା । ବିଧବା ମା କୁମାରୀ ହନ୍ତାଳ ପରଘରେ ମୂଲ ମଜୁରି ଲାଗି ଝିଅକୁ ସ୍କୁଲରେ ପାଠ ପଢ଼ାଉଥିଲେ । ହେଲେ କିଏ ଜାଣିଥିଲା ହସ ଖୁସିରେ ସାଙ୍ଗଙ୍କ ମେଳରେ ଡଙ୍ଗା ଭସାଇ ଡଙ୍ଗାରୁ ପଇସା ସଂଗ୍ରହ କରିବାକୁ ଯାଇ ନିରୀହ ନାବାଳିକାର ଜୀବନ ଚାଲିଯିବ। ସାବିତ୍ରୀର ମୃତ୍ୟୁ ଖବର ପାଇ ଚମ୍ପାନଗର ଗ୍ରାମରେ ଶୋକର ଛାୟା ଖେଳିଯାଇଛି ।
