ଭୁବନେଶ୍ୱର ୦୯/୧୧: ଆସନ୍ତା ମାସ ୧୫ ତାରିଖରେ କାର୍ତ୍ତିକ ପୂର୍ଣ୍ଣିମା । ସେହିଦିନ ବିନ୍ଦୁସାଗରରେ ଏକ ହଂସ ଆକୃତିର ବୋଇତ ଭାସିବ ଯାହାର ଲମ୍ବ ୧୪ ଫୁଟ ଓ ଉଚ୍ଚା ୮ ଫୁଟ ରହିବ । ଏହାକୁ ନିର୍ମାଣ କରୁଛନ୍ତି ପୁରୁଣା ଭୁବନେଶ୍ୱର ନଳାମୁହଁ ସାହିର କାରିଗର ହୃଷିକେଶ ବେହେରା । ଏଥିରେ ୭ ସାଧବଙ୍କର ଦେଢଫୁଟିଆ ମାଟିର ମୂର୍ତ୍ତି ଅକର୍ଷଣ ସାଜିବ । ବୋଇତର ମୂଲ୍ୟ ୨୦ ହଜାର ଟଙ୍କା ରହିଛି । ହୃଷିକେଶଙ୍କୁ ସହଯୋଗ କରୁଛନ୍ତି ସୌଦାମିନୀ ସାମଲ । ହୃଷିକେଶ ମଧ୍ୟ ଚନ୍ଦ୍ରଶେଖରପୁର ବୋଇତ ବନ୍ଦାଣ ପାଇଁ ଆଉ ଏକ ବୋଇତ ପ୍ରସ୍ତୁତ କରୁଛନ୍ତି ଯାହାର ଲମ୍ବ ସାଢେ ୭ ଫୁଟ ଓ ଉଚ୍ଚତା ୫ ଫୁଟ ରହିଛି । ଏହି ବୋଇତର ମୂଲ୍ୟ ୧୨ ହଜାର ଟଙ୍କା ।
ହୃଷିକେଶ ବୋଇତ ପ୍ରସ୍ତୁତ କରିବା ପାଇଁ ବାଉଁଶ, ସୋଲ, ନଡ଼ା, ଚୁମୁକି, ରଙ୍ଗିନ କାଗଜ, କଣ୍ଟା, ମାଟି, ସୁତୁଲି, ରଙ୍ଗ ବ୍ୟବହାର କରନ୍ତି । ହୃଷିକେଶ କହନ୍ତି, ସେ ବର୍ଷକୁ କେବଳ ଏହି ୨ଟି ବୋଇତ ପ୍ରସ୍ତୁତ କରିଥାନ୍ତି । ଏଥିପାଇଁ ତାଙ୍କୁ ୧୫ ଦିନ ଲାଗିଥାଏ । ବିନ୍ଦୁସାଗର ପାଇଁ ସେ ୨୦୦୫ ମସିହାରୁ ବୋଇତ କରିଆସୁଥିବା ବେଳେ ଗତ ୪ ବର୍ଷ ହେବ ଚନ୍ଦ୍ରଶେଖରପୁର ପାଇଁ ବୋଇତ ପ୍ରସ୍ତୁତ କରୁଛନ୍ତି । ସେ ମୁଖ୍ୟତଃ ୩ ପ୍ରକାର ବୋଇତ ପ୍ରସ୍ତୁତ କରିଥାନ୍ତି ଯଥା-ମୟୁର, ହଂସ ଏବଂ ଚିଲ । ପୂର୍ବ ବର୍ଷ ବିନ୍ଦୁସାଗର ପାଇଁ ମୟୁର ଆକୃତିର ବୋଇତ ହୋଇଥିବାରୁ ଚଳିତ ବର୍ଷ ହଂସ ଆକୃତିର ବୋଇତ ବିନ୍ଦୁସାଗରରେ ଭାସିବ ବୋଲି ସେ କହିଛନ୍ତି ।
