ଚାନ୍ଦବାଲି ୧୫/୫: ବିପଦ କେତେବେଳେ ଯେ କାହା ପାଇଁ ଆସିବ, ତାହା କହିବା ମୁସ୍କିଲ୍  l ଏଇ ଯେମିତି ଗାଁ ଦାଣ୍ଡରେ ତାସ ଖେଳୁଥିବା ବେଳେ ଚଢ଼ିଗଲା କାର। ଦୁର୍ଘଟଣାରେ ୪ ଜଣ ଗୁରୁତର ଆହତ ହୋଇଛନ୍ତି l ସେମାନଙ୍କୁ କଟକ ସ୍ଥାନାନ୍ତରିତ କରାଯାଇଛି । ଡ୍ରାଇଭରକୁ ଅଟକ ରଖି ଗାଡ଼ିକୁ ଜବତ କରିଛି ପୋଲିସ । ଏମିତି ଏକ ଅଭାବନୀୟ ଘଟଣା ଘଟିଛି ଭଦ୍ରକ ଜିଲ୍ଲା ଚାନ୍ଦବାଲି ଥାନା ବେତଦହଣ ଗାଁରେ।

ଗୁରବାର ସନ୍ଧ୍ୟାରେ ଗାଁ ମୁଣ୍ଡରେ ୪ଜଣ ତାସ ଖେଳୁଥିବା ବେଳେ କିଛି ଲୋକ ଛିଡା ହୋଇ ଦେଖୁଥିଲେ। ହଠାତ ଗାଁ ରାସ୍ତାରେ ଦୃତ ଗତିରେ ଆସୁଥିବା କାରଟି ତାଙ୍କ ଉପରେ ମାଡି ଯାଇଥିଲା । ତାସ ଖେଳୁଥିବା ୪ ଜଣ ଗାଡି ତଳେ ଚାପି ହୋଇ ରହିଥିଲେ । ଗାଁ ଲୋକେ କାରକୁ ଟେକି ସେମାନଙ୍କୁ ଉଦ୍ଧାର କରି ଚାନ୍ଦବାଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିଲେ । କାହାର ଗୋଡ଼ ଭାଙ୍ଗିଛି ତ, କାହାର ହାତ ପୁଣି ଛାତିରେ ଗଭୀର ଆଘାତ ହୋଇଛି । ଆହତ ମାନେ ହେଲେ ସନାତନ ସାହୁ ,ତ୍ରିଲୋଚନ ସାହୁ , ଶ୍ରୀକାନ୍ତ ସାହୁ ,କ୍ଷେତ୍ରବାସୀ ସାହୁ । ସେମାନଙ୍କ ଅବସ୍ଥା ଗୁରୁତର ହେବାରୁ କଟକ ସ୍ଥାନାନ୍ତରିତ କରାଯାଇଛି । ଡ୍ରାଇଭର ନିଶାସକ୍ତ ଅବସ୍ଥାରେ ଏମିତି ଦୁର୍ଘଟଣା ଘଟାଇଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତି । ଘଟଣା ସ୍ଥଳରେ ଚାନ୍ଦବାଲି ପୋଲିସ ପହଞ୍ଚି ଗାଡିକୁ ଜବତ କରିବା ସହିତ ଡ୍ରାଇଭରକୁ ଅଟକ ରଖିଛି ।