କୋଷାଗୁମୁଡା,୨୨/୦୮: ନବରଙ୍ଗପୁର ଜିଲ୍ଲା କୋଡ଼ିଙ୍ଗା ବନାଞ୍ଚଳର ଦେଓ ଡଙ୍ଗରୀ ଫରେଷ୍ଟ ବିଟର କୁସୁମ ଡଙ୍ଗରୀ-ଏକୋରୀ ରାସ୍ତା ଛକରେ ବୁଲୁଛି ବାଘ । ଶୁକ୍ରବାର ସକାଳ ୧୦ଟାରେ ଏକ ମହାବଳ ବାଘ ବୁଲୁଥିବା ଲୋକେ ଦେଖିବାକୁ ପାଇଥିବା ସୂଚନା ମିଳିଛି । କିଛି ମାସର ବ୍ୟବଧାନ ପରେ ପୁଣି ଅଞ୍ଚଳବାସୀଙ୍କୁ ମହାବଳ ବାଘର ଭୟ ଘାରିଛି । ବାଲେଙ୍ଗା ଓ ଲାଣ୍ଡୁଗୁଡା ଗାଁକୁ ଲାଗି ରହିଥିବା ମିରମିଣ୍ଡା ସଂରକ୍ଷିତ ଜଙ୍ଗଲ ଓ ଏକୋରୀ କୁସୁମ ଡଙ୍ଗରୀକୁ ଲାଗିରହିଥିବା ଦେଓ ଡଙ୍ଗରୀ ସଂରକ୍ଷିତ ଜଙ୍ଗଲ ପ୍ରାୟତଃ ପୋଡଶୀ ଛତିଶଗଡ଼ ସଂରକ୍ଷିତ ଜଙ୍ଗଲକୁ ଲାଗି ରହିଛି । ତେଣୁ ପୋଡଶୀ ରାଜ୍ୟର ଜଙ୍ଗଲରୁ ବାଘଟି ଆସିଥିବ ବୋଲି ସାଧାରଣରେ ଆଲୋଚନା ହେଉଛି ।
ସୂଚନା ମୁତାବକ, ଶୁକ୍ରବାର ବାଘଟି କୁସୁମ ଡଙ୍ଗରୀ-ଏକୋରୀ ରାସ୍ତା ଛକଠାରେ ଚଳ ପ୍ରଚଳ କରୁଥିବାର ଫୋଟ ଓ ଭିଡିଓ ଉତ୍ତୋଳନ କରାଯାଇଥିବା ଦେଖିବାକୁ ମିଳିଛି । କିଛି ଦିନ ପୂର୍ବେ ବାଲେଙ୍ଗା ଓ ଲାଣ୍ଡୁଗୁଡା ଗାଁକୁ ଲାଗି ରହିଥିବା ମିରମିଣ୍ଡା ସଂରକ୍ଷିତ ଜଙ୍ଗଲରେ ବାଘ ରଡି ଛାଡୁଥିବା ନେଇ ବହୁ ଚର୍ଚ୍ଚା ହୋଇଥିଲା । ଯାହାକୁ ନେଇ ଲୋକଙ୍କ ମନରେ କୋକୁଆ ଭୟ ସୃଷ୍ଟି ହେଉଥିବା ବେଳେ ଲୋକେ ଜଙ୍ଗଲକୁ ଯିବା ଆସିବା ବନ୍ଦ କରିଦେଇଛନ୍ତି । ଜଙ୍ଗଲକୁ ଲାଗି ଅନେକ ଲୋକଙ୍କ ଚାଷ ଜମି ଥିବାବେଳେ ଲୋକେ ଜମିକୁ ଯାଉନଥିବା ସୂଚନା ମିଳିଛି । ଏପରି କି ସନ୍ଧ୍ୟା ସମୟରେ ଲୋକେ ନିକଟ ଗାଁକୁ ଯିବାକୁ ବି ଭୟ କରୁଥିବା ଗ୍ରାମବାସୀ ପ୍ରକାଶ କରିଛନ୍ତି । ଏନେଇ ବନବିଭାଗ ପକ୍ଷରୁ ଘଟଣା ସ୍ଥଳକୁ ଯାଇ ଅନୁଧ୍ୟାନ କରାଯାଇଛି । ଯାହାର ଭିଡିଓ ଏବଂ ଫୋଟ ଭାଇରାଲ ହେବାରେ ଲାଗିଛି । ବର୍ତ୍ତମାନ ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ଗ୍ରାମବାସୀ ଦାବି କରିଛନ୍ତି । ଏନେଇ ଆମେ କୋଡ଼ିଙ୍ଗା ରେଞ୍ଜର ପୂର୍ଣ୍ଣଚନ୍ଦ୍ର ନନ୍ଦଙ୍କୁ ଯୋଗାଯୋଗ କରିବାରୁ ସେ "ଘଟଣାସ୍ଥଳକୁ ଯାଇ ଅନୁଧ୍ୟାନ କରାଯାଉଛି । ୨ରୁ ୩ ଦିନ ଅବଜର୍ଭେସନ୍ କରାଯାଇ ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ" ବୋଲି କହିଥିଲେ ।
