ଶଗଡ଼ଘାଟ, ୧୬/୬(ଆପ୍ର): ଟିଟିଲାଗଡ଼ ସହର ହାଟପଦା ପଡା ଜଣେ ଯୁବକଙ୍କୁ ସାପ କାମୁଡ଼ାରେ ଗୁରୁତର ଅବସ୍ଥାରେ  ଡାକ୍ତରଖାନାରେ ଭର୍ତ୍ତି କରାଯାଇଛି  l ଯୁବକ ଜଣଙ୍କର ନାମ ବ୍ରଜ ବାରିକ ବୋଲି ଜଣାପଡିଛି। 

ସୂଚନା ମୁତାବକ ଆଖପାଖ ଅଞ୍ଚଳରେ କାହା ଘରକୁ କୌଣସି ବିଷାକ୍ତ ସାପ ଘର ଭିତରେ ପଶିଗଲେ ଉକ୍ତ ଯୁବକ ସାପକୁ ଧରି ଜଙ୍ଗଲକୁ ଛାଡି ଦେଇଥାନ୍ତି। ସେ ଦିନ ରାତି ୨୪ ଘଣ୍ଟା ଲୋକଙ୍କ ସେବାରେ ଲାଗିଥାନ୍ତି l ସେହିପରି ଗତକାଲି ରାତି ୨ ଟା ସମୟରେ ସତୀଘାଟ ଗ୍ରାମର ଜୈନିକ ଘରକୁ ଏକ ବିଷାକ୍ତ ନାଗ ସାପକୁ ଉଦ୍ଧାର କରି ଜଙ୍ଗଲରେ ଛାଡି ଦେବାକୁ ନେଉଥିଲେ l ସାପକୁ ଏକ ପ୍ଲାଷ୍ଟିକ ଡବାରେ ରଖି ଥିବାରୁ ସାପଟି ହଠାତ୍ ଅଣ ନିଶ୍ୱାସୀ ହୋଇପଡିଥିଲା। ସାପ ଅଣନିଶ୍ୱାସୀ ନ ହେବା ପାଇଁ ବ୍ରଜ ପ୍ଲାଷ୍ଟିକ ଡବା ଚାରିପଟେ ଛୋଟ ଛୋଟ କଣା କରୁଥିଲେ। କିନ୍ତୁ ହଠାତ୍ ବୋତଲର ଠିପି ଖୋଲି ଯିବାରୁ ଉକ୍ତ ସାପଟି ବୋତଲ ବାହାରକୁ ଆସି ବ୍ରଜ ବାରିକଙ୍କ ଡାହାଣ ଗୋଡ଼ରେ କାମୁଡି ଦେଇଥିଲା।

ସ୍ଥାନୀୟ ଯୁବକମାନେ ତାଙ୍କୁ ଉଦ୍ଧାର କରି ସ୍ଥାନୀୟ ସରକାରୀ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରିଥିଲେ l ବ୍ରଜ ବାରିକ କହିବା ଅନୁସାରେ, ମୁଁ ୧ ଶହରୁ ଉର୍ଦ୍ଧ ସାପ ଉଦ୍ଧାର କରି ଜଙ୍ଗଲରେ ଛାଡ଼ିଛି। ଏହାମଧ୍ୟରେ ମୋତେ ୧୩ ଥର ସାପ କାମୁଡ଼ିଛି l ସାପ କାମୁଡିବାରୁ ମୁଁ ମୋର ଡାହାଣ ହାତ ମଝୀ ଆଙ୍ଗୁଠି ମଧ୍ୟ ହରାଇ ଦେଇଛି। ଯଦି ସରକାର ମତେ ଏନେଇ ସାହାଯ୍ୟ କରନ୍ତି ତେବେ ମୁଁ ପୂର୍ବପରି ଲୋକଙ୍କ ସେବା କରନ୍ତି ବୋଲି ସେ କହିଛନ୍ତି l