ନୂଆଦିଲ୍ଲୀ ୧୧/୦୯: ଦେଶର ୪୦ ଆଞ୍ଚଳିକ ଦଳ ୨୦୨୩- ୨୪ରେ ମୋଟ୍ ୨୫୩୨.୦୯ କୋଟି ଟଙ୍କା ଆୟ କରିଛନ୍ତି । ତନ୍ମଧ୍ୟରୁ ୭୦% ବା ୧୭୯୬.୦୨୪ କୋଟି ଟଙ୍କା ନିର୍ବାଚନୀ ବଣ୍ଡ୍ରୁ ପ୍ରାପ୍ତ ହୋଇଛି । ଆସୋସିଏସନ୍ ଫର୍ ଡେମୋକ୍ରାଟିକ୍ ରିଫର୍ମସ (ଏଡିଆର୍)ର ନୂଆ ରିପୋର୍ଟରୁ ଏହା ଜଣାପଡ଼ିଛି ।
ରିପୋର୍ଟ ଅନୁସାରେ, ଭାରତ ରାଷ୍ଟ୍ର ସମିତି (ବିଆର୍ଏସ୍) ଆଲୋଚ୍ୟ ବର୍ଷରେ ସର୍ବାଧିକ ୬୮୫.୫୧ କୋଟି ଟଙ୍କା ଆୟ କରିଛି । ଏହା ପଛକୁ ଦ୍ୱିତୀୟ ସ୍ଥାନରେ ଥିବା ତୃଣମୂଳ କଂଗ୍ରେସ (ଟିଏମ୍ସି) ୬୪୬.୩୯ କୋଟି ଟଙ୍କା ଆୟ କରିଛି । ବିଜୁ ଜନତା ଦଳ (ବିଜେଡି) ୨୯୭.୮୧ କୋଟି ଟଙ୍କା ଆୟ କରିଛି । ସେହିଭଳି ତେଲୁଗୁ ଦେଶମ୍ ପାର୍ଟି (ଟିଡିପି) ୨୮୫.୦୭ କୋଟି ଟଙ୍କା ଆୟ କରିଥିବା ବେଳେ ୱାଇଏସ୍ଆର୍ କଂଗ୍ରେସ ୧୯୧.୦୪ କୋଟି ଟଙ୍କା ହାସଲ କରିଛି ।
୪୦ ଆଞ୍ଚଳିକ ଦଳ ଦ୍ୱାରା ଘୋଷିତ ମୋଟ ଆୟର ୮୩.୧୭% ଏହି ୫ଟି ଦଳଙ୍କୁ ପ୍ରାପ୍ତ ହୋଇଛି । ଏଡିଆର୍ ଦର୍ଶାଇଛି ଯେ ୨୦୨୨-୨୩ ତୁଳନାରେ ଏହି ଦଳଗୁଡ଼ିକର ଆୟ ୪୫.୭୭% ବୃଦ୍ଧି ପାଇଛି । ୨୦୨୨-୨୩ରେ ସେମାନଙ୍କ ଆୟ ୧୭୩୬.୮୫ କୋଟି ଟଙ୍କା ଥିଲା । ସେତେବେଳେ ଟିଏମ୍ସି ସର୍ବାଧିକ ୩୧୨.୯୩ କୋଟି ଟଙ୍କା ଆୟ କରିଥିଲା।
