ନୂଆଦିଲ୍ଲୀ ୧୪/୦୬: ‘ଅହମ୍ମଦାବାଦ ବିମାନ ଦୁର୍ଘଟଣାରେ ପ୍ରାଣ ହରାଇଥିବା ମୃତକଙ୍କ ପରିଜନଙ୍କୁ ଏକ କୋଟି ଲେଖାଏଁ କ୍ଷତିପୂରଣ ଦେବାକୁ ଘୋଷଣା କରିଛି ଏୟାର ଇଣ୍ଡିଆ । ମୁଁ ଏୟାର ଇଣ୍ଡିଆକୁ ୨ କୋଟି ଟଙ୍କା ଦେବି, ବଦଳରେ କଂପାନି ମୋ’ ବାପାଙ୍କୁ ଫେରାଉ । ଟଙ୍କା ଦେଇ କ’ଣ କେବେ ମଣିଷ କିଣିହେବ । ସେ ଟଙ୍କାରେ ଆମେ ପଲଙ୍କ କିଣିପାରିବୁ । କିନ୍ତୁ ସେଥିରେ ଆମକୁ ନିଦ କେମିତି ହେବ । ମୋ ବାପା ମୋତେ ଯେଉଁ ଭଲପାଇବା ଦେଉଥିଲେ ତାକୁ କେଉଁଠୁ ପାଇବି ।’ ଏହି ଶାଣିତ ଶବ୍ଦ ହେଉଛି ଫାଲ୍ଗୁନିଙ୍କର । ବିମାନ ଦୁର୍ଘଟଣାରେ ନିଜ ବାପାଙ୍କୁ ହରାଇବା ପରେ କୋହଭରା କଣ୍ଠରେ ଏହା କହିଛନ୍ତି ସେ ।
ଫାଲ୍ଗୁନିଙ୍କ ଅନୁସାରେ, ତାଙ୍କ ବାପା ଜଣେ ଦେଶଭକ୍ତ ଥିଲେ । ନିଜକୁ ଏୟାର ଇଣ୍ଡିଆର ଗୌରବଶାଳୀ ଯାତ୍ରୀ ବୋଲି ମନେ କରୁଥିଲେ। ଏୟାର ଇଣ୍ଡିଆ ଆମର ଗର୍ବ, ଦେଶର ସମ୍ମାନ ବୋଲି ଅଧିକାଂଶ ସମୟରେ କହୁଥିଲେ । ତାଙ୍କ ବାପାଙ୍କୁ ଦେଶପ୍ରେମର କ’ଣ ଏହି ଫଳ ମିଳିଲା । ଏୟାର ଇଣ୍ଡିଆ ବିମାନରେ ଯାତ୍ରା କରିବା କ’ଣ ତାଙ୍କର ଭୁଲ୍ ଥିଲା । ସୁରକ୍ଷିତ ଉଡ଼ାଣ ଭରିବାରେ ଅସମର୍ଥ ହେଉଥିବାରୁ ଏୟାର ଇଣ୍ଡିଆ ତା’ର ସେବା ବନ୍ଦ କରିଦେଉ । ଏହା କିଛି ମଜା କଥା ନୁହେଁ । କାହାର ଜୀବନଠାରୁ ବଡ଼ ଆଉ କିଛି ନାହିଁ ବୋଲି ସେ କହିଛନ୍ତି । ସେହିପରି ଦୁର୍ଘଟଣା ପରେ ଏୟାର ଇଣ୍ଡିଆ ପକ୍ଷରୁ ଯାତ୍ରୀମାନଙ୍କ ପରିଜନଙ୍କ ପ୍ରତି କୌଣସି ପ୍ରକାର ସମବେଦନା ବ୍ୟକ୍ତ କରାଯାଇନଥିବା ଫାଲ୍ଗୁନି ଅଭିଯୋଗ ଆଣିଛନ୍ତି ।
