ଅହମ୍ମଦାବାଦ,୧୮/୦୭: ଅହମ୍ମଦାବାଦରେ ଜୁନ୍ ୧୨ରେ ଘଟିଥିବା ଏୟାର ଇଣ୍ଡିଆ ବିମାନ ଦୁର୍ଘଟଣାକୁ ନେଇ ପ୍ରତିଦିନ ନୂଆ କଥା ଶୁଣିବାକୁ ମିଳୁଛି । ଏହାକୁ ନେଇ ବିବାଦ ବି ସୃଷ୍ଟି ହେଉଛି । ଆମେରିକାର ୱାଲ୍ ଷ୍ଟ୍ରିଟ୍ ଜର୍ଣ୍ଣାଲ୍ରେ ଏ ନେଇ ପ୍ରକାଶିତ ଏକ ସଦ୍ୟ ରିପୋର୍ଟକୁ କେନ୍ଦ୍ରକରି ବିବାଦ ଉପୁଜିଛି । ପତ୍ରିକାର ଏକ ରିପୋର୍ଟରେ କୁହାଯାଇଛି ଯେ ଏୟାର ଇଣ୍ଡିଆ ବିମାନର କ୍ୟାପ୍ଟେନ୍ ସୁମିତ ସଭରୱାଲ ହିଁ ଇଞ୍ଜିନ୍ର ଇନ୍ଧନ ସୁଇଚ୍କୁ ବନ୍ଦ କରିଦେଇଥିଲେ । ଫଳରେ ଇଞ୍ଜିନ୍ଦ୍ୱୟ ବନ୍ଦ ହୋଇ ଦୁର୍ଘଟଣା ଘଟିଥିଲା ।
ରିପୋର୍ଟ ଦର୍ଶାଇଛି ଯେ ଦୁଇ ପାଇଲଟ୍ଙ୍କ କକ୍ପିଟ୍ ରେକର୍ଡିଂରୁ ହିଁ ଏହାର ଖୁଲାସା ହୋଇଛି । ରେକର୍ଡିଂରୁ ଜଣାପଡ଼ିଛି ଯେ ବୋଇଂ ବିମାନ ଉଡ଼ାଉଥିବା କୋ-ପାଇଲଟ୍ କ୍ଲାଇଭ୍ କୁନ୍ଦର କ୍ୟାପ୍ଟେନ୍ ସୁମିତ ସଭରୱାଲଙ୍କୁ ପଚାରୁଛନ୍ତି, ‘ଆପଣ ଫୁଏଲ୍ ସୁଇଚ୍କୁ ‘କଟ୍ଅଫ୍’ ପୋଜିସନ୍କୁ କାହିଁକି ଆଣିଲେ?’ ଏହି ପ୍ରଶ୍ନ କଲା ବେଳେ କୋ- ପାଇଲଟ୍ ଅତ୍ୟନ୍ତ ଘାବରେଇ ଯାଇଥିଲେ । କିନ୍ତୁ କ୍ୟାପ୍ଟେନ୍ ସୁମିତ ଶାନ୍ତ ଥିଲେ । କ୍ୟାପ୍ଟେନ୍ ସୁମିତ୍ଙ୍କ ପାଖରେ ୧୫ ହଜାର ୬୩୮ ଘଣ୍ଟା ଓ କ୍ଲାଇଭ୍ କୁନ୍ଦରଙ୍କ ପାଖରେ ୩ ହଜାର ୪୦୩ ଘଣ୍ଟାର ଉଡ଼ାଣ ଅଭିଜ୍ଞତା ଥିଲା। ତଦନ୍ତ ସହ ଜଡ଼ିତ ଆମେରିକୀୟ ସୂତ୍ରକୁ ଆଧାର କରି ୱାଲ୍ ଷ୍ଟ୍ରିଟ୍ ଜର୍ଣ୍ଣାଲ୍ ଏହି ରିପୋର୍ଟ ପ୍ରକାଶ କରିଛି ।
ଏହି ରିପୋର୍ଟକୁ ନେଇ ଭାରତୀୟ ଏଜେନ୍ସିଗୁଡ଼ିକ ତରଫରୁ କୌଣସି ଜବାବ ଦିଆଯାଇ ନାହିଁ । କିନ୍ତୁ ବେସାମରିକ ବିମାନ ଚଳାଚଳ ବିଶେଷଜ୍ଞ ସଞ୍ଜୟ ଲଜାର୍ ତଦନ୍ତ ରିପୋର୍ଟ ଲିକ୍ ହେବାକୁ ନେଇ ଗଭୀର ଚିନ୍ତାବ୍ୟକ୍ତ କରିଛନ୍ତି । ସେ କହିଛନ୍ତି, ଅତ୍ୟନ୍ତ ଆଶ୍ଚର୍ଯ୍ୟ ଲାଗୁଛି ଯେ ଆମେରିକୀୟ ଗଣମାଧ୍ୟମ ଭାରତର ସଂସଦ ଓ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଠାରୁ ଅଧିକ ତଥ୍ୟ ରଖିଛି । ପ୍ରଧାନମନ୍ତ୍ରୀ ଏହି ମାମଲାର ତଦନ୍ତ କୌଣସି ହାଇକୋର୍ଟ ବିଚାରପତିଙ୍କ ଦ୍ୱାରା କରାଇବା ଉଚିତ । ସଞ୍ଜୟ ଲଜାର୍ କହିଛନ୍ତି, ଭାରତର ଏଏଆଇବି ରିପୋର୍ଟରେ କେବଳ ଗୋଟିଏ ବୟାନ ସାମ୍ନାକୁ ଆସିଥିଲା । ଏହା ଥିଲା, ‘ତୁମେ ଏହାକୁ ବନ୍ଦ କରିଛ କି? ଆଉଜଣେ ପାଇଲଟ୍ କହିଥିଲେ, ନା, ମୁଁ କରିନାହିଁ ।’ କେବଳ ଏହି ବୟାନ ଆଧାରରେ କୌଣସି ନିଷ୍କର୍ଷରେ ପହଞ୍ଚିବା ଉଚିତ ନୁହେଁ ।
