ନୂଆଦିଲ୍ଲୀ: ଅଡୁଆରେ ଅଭିନେତା ଏଜାଜ ଖାନ । ଗତକାଲି (ମଙ୍ଗଳବାର) କଷ୍ଟମ ବିଭାଗ ଡ୍ରଗ୍ସ ସହ ଜଡିତ ଏକ ମାମଲାରେ ତାଙ୍କ କାର୍ଯ୍ୟାଳୟରେ ଚଢାଉ କରିଥିଲା। ଜାତୀୟ ଗଣମାଧ୍ୟମ ରିପୋର୍ଟ ଅନୁଯାୟୀ, ଏଜାଜ ଖାନଙ୍କ କାର୍ଯ୍ୟାଳୟରୁ ୩୫ ଲକ୍ଷ ଟଙ୍କା ମୂଲ୍ୟର ଡ୍ରଗ୍ସ ଜବତ କରାଯାଇଛି । ଏହି ଘଟଣାରେ କଷ୍ଟମ ବିଭାଗ ଏଜାଜ ଖାନଙ୍କ କାର୍ଯ୍ୟାଳୟରେ କାର୍ଯ୍ୟ କରୁଥିବା ବ୍ୟକ୍ତିଙ୍କୁ ମଧ୍ୟ ଗିରଫ କରିଛି । ତେବେ ଏଜାଜ ଖାନ ଏ ସମ୍ପର୍କରେ ଏପର୍ଯ୍ୟନ୍ତ କୌଣସି ପ୍ରତିକ୍ରିୟା ଦେଇନାହାଁନ୍ତି ।
ଗତ ବର୍ଷ ଅର୍ଥାତ ୨୦୨୩ ମସିହାରେ ଏଜାଜ ଖାନ ଜାମିନରେ ମୁକ୍ତ ହୋଇଥିଲେ । କିନ୍ତୁ ଏହି ଚଢାଉ ପରେ ପୁଣିଥରେ ତାଙ୍କ ଅଡୁଆ ବଢିଥିବା କୁହାଯାଉଛି । ଏହି ମାମଲାର ଚେର ୟୁରୋପରୁ ଆମଦାନୀ ହେଉଥିବା ଡ୍ରଗ୍ସ ସହିତ ଜଡିତ ରହିଛି । ତେବେ ପୋଲିସ ଏପର୍ଯ୍ୟନ୍ତ ଏ ସମ୍ପର୍କରେ କୌଣସି ସୂଚନା ଦେଇନାହିଁ।
‘ମିଡ୍-ଡେ’ ରିପୋର୍ଟ ଅନୁଯାୟୀ, ଅନ୍ଧେରୀର ଭେରା ଦେଶାଇ ରୋଡରେ ଅବସ୍ଥିତ କାର୍ଯ୍ୟାଳୟରେ କଷ୍ଟମ ବିଭାଗର ଅଧିକାରୀ ମାନେ ଏହି ଚଢାଉ କରିଛନ୍ତି । ଯେଉଁଠାରେ ଅଧିକାରୀ ମାନେ ୧୦୦ ଗ୍ରାମ MDMA ଉଦ୍ଧାର କରିଛନ୍ତି । ଏହି ଡ୍ରଗ୍ସର ମୂଲ୍ୟ ପ୍ରାୟ ୩୫ ଲକ୍ଷ ଟଙ୍କା ବୋଲି କୁହାଯାଉଛି । ଉକ୍ତ ରିପୋର୍ଟରେ ଏହା ମଧ୍ୟ ଦାବି କରାଯାଇଛି ଯେ ଏହି ଭଡା କାର୍ଯ୍ୟାଳୟ ଏଜାଜ ଖାନଙ୍କ ସମ୍ପର୍କୀୟଙ୍କ ନାମରେ ଲିଜରେ ଦିଆଯାଇଥିଲା। ଯେଉଁଠାରେ ଏଜାଜ ଖାନଙ୍କ କାର୍ଯ୍ୟାଳୟ ସହିତ ଜଡିତ ଜଣେ ବ୍ୟକ୍ତି ୟୁରୋପରୁ ଡ୍ରଗ୍ସ ଅର୍ଡର କରିଥିଲେ । ବର୍ତ୍ତମାନ ସୁରଜ ଗୌର ନାମକ ଏହି ବ୍ୟକ୍ତିଙ୍କୁ ଅଧିକାରୀ ମାନେ ଗିରଫ କରିଛନ୍ତି । ସୂଚନାଥାଉକି, ଏଜାଜ ଖାନ ପୂର୍ବରୁ ଏକ ଡ୍ରଗ୍ସ ମାମଲାରେ ଫସି ରହିଛନ୍ତି । ୨୦୨୧ ମସିହାରେ ପୋଲିସ ତାଙ୍କୁ ମୁମ୍ବାଇ ବିମାନବନ୍ଦରରୁ ଗିରଫ କରିଥିଲା । ଏହା ପରେ ସେ ୨୦୨୩ ମସିହାରେ ଜାମିନ ପାଇଥିଲେ । ଏହା ପୂର୍ବରୁ ୨୦୧୮ ରେ ମଧ୍ୟ ତାଙ୍କ ବିରୋଧରେ ଏପରି ଅଭିଯୋଗ ଆସିଥିଲା ।
