ନୂଆଦିଲ୍ଲୀ: ଇଟାଲୀର ପ୍ରଧାନମନ୍ତ୍ରୀ ଜର୍ଜିଆ ମେଲୋନି ବୁଧବାର ତାଙ୍କର ୪୮ ତମ ଜନ୍ମଦିନକୁ ଏକ ନିଆରା ଢଙ୍ଗରେ ପାଳନ କରିଛନ୍ତି। ଏହି ଅବସରକୁ ସ୍ମରଣୀୟ କରିବାରେ ଆଲବାନିଆର ପ୍ରଧାନମନ୍ତ୍ରୀ ଏଡି ରାମାଙ୍କ ଭୂମିକା ଗୁରୁତ୍ୱପୂର୍ଣ୍ଣ ଥିଲା । ସେ ଆବୁଧାବିରେ ଅନୁଷ୍ଠିତ ଓ୍ବାର୍ଲଡ ଫ୍ୟୁଚର ଏନର୍ଜି ସମିଟ୍ ସମୟରେ ମେଲୋନିଙ୍କ ପାଇଁ ଆଣ୍ଠୁରେ ବସି ଏକ ଗୀତ ଗାଇ ଏବଂ ଏକ ସ୍ୱତନ୍ତ୍ର ଉପହାର ଦେଇ ତାଙ୍କୁ ଜନ୍ମଦିନର ଶୁଭେଚ୍ଛା ଜଣାଇଥିଲେ।
ସୂଚନା ମୁତାବକ ଶିଖର ସମ୍ମିଳନୀ ସମୟରେ, ଏଡି ରାମା ଇଟାଲୀ ପ୍ରଧାନମନ୍ତ୍ରୀଙ୍କୁ ଜନ୍ମଦିନର ଶୁଭେଚ୍ଛା ଜଣାଇବା ପାଇଁ ଆଣ୍ଠୁମାଡ଼ି ବସିଥିଲେ ଏବଂ "ତାଣ୍ଟି ଅଗୁରି" (ଇଟାଲୀୟ ଭାଷାରେ ଜନ୍ମଦିନର ଶୁଭେଚ୍ଛା) ଗାଇଥିଲେ। ଏହା ପରେ ସେ ମେଲୋନିଙ୍କୁ ଏକ ହାଲୁକା ସ୍କାର୍ଫ ଉପହାର ଦେଇଥିଲେ । ବିଶେଷ କଥା ହେଉଛି ସେ ଏହି ସ୍କାର୍ଫକୁ ନିଜ ହାତରେ ମେଲୋନିଙ୍କ ଉପରେ ପିନ୍ଧାଇଥିଲେ, ଯାହା ଯୋଗୁଁ ସେଠାରେ ଉପସ୍ଥିତ ଅନ୍ୟ ନେତାମାନେ ବହୁତ ପ୍ରଭାବିତ ହୋଇଥିଲେ ଏବଂ ତାଳି ବଜାଇ ଏହି ମୁହୂର୍ତ୍ତକୁ ସ୍ୱାଗତ କରିଥିଲେ।
ଗଣମାଧ୍ୟମ ରିପୋର୍ଟ ଅନୁସାରେ, ଉପହାର ଦେବା ପରେ, ରାମା ମେଲୋନିଆଙ୍କୁ ଏହା ମଧ୍ୟ କହିଥିଲେ ଯେ ଏହାକୁ ଜଣେ ଇଟାଲୀୟ ଡିଜାଇନର୍ ଡିଜାଇନ୍ କରିଛନ୍ତି, ଯିଏ ବର୍ତ୍ତମାନ ଆଲବାନିଆରେ ରହୁଛନ୍ତି। ଏହି ଉପହାର ଦୁଇ ନେତାଙ୍କ ମଧ୍ୟରେ ଦୃଢ଼ କାର୍ଯ୍ୟ ସମ୍ପର୍କକୁ ପ୍ରତିଫଳିତ କରିବ । ତଥାପି, ରାମା ଏବଂ ମେଲୋନିଙ୍କ ରାଜନୈତିକ ବିଚାରଧାରା ଭିନ୍ନ। ମେଲୋନି ଦକ୍ଷୀଣପନ୍ଥୀ ପାର୍ଟୀ ବ୍ରଦର୍ସ ଅଫ୍ ଇଟାଲୀର ନେତୃତ୍ୱ ନେଉଥିବା ବେଳେ ରାମା ଆଲବାନିଆର ସୋସାଲିଷ୍ଟ ପାର୍ଟିର ନେତୃତ୍ୱ ନେଉଛନ୍ତି।
