କଟକ,୦୫/୧୧: ଅଦ୍ଭୁତ ଓ ଆକର୍ଷଣୀୟ ଫୁଲ, ଫଳ ଗଛ । ତା ସହିତ ପଣ୍ଡୋରାର ଦୁନିଆରେ ରହୁଥିବା ଏଲିୟନ୍ଙ୍କ ଭଳି ବେଶଭୂଷା ଲୋକ । ଏହି ସବୁ ମଧ୍ୟରେ କାଚ ଓ ଲାଇଟ୍ କାରୁକାର୍ଯ୍ୟରେ ତିଆରି ହେବ ଏକ ନିଆରା ଦୁନିଆ । ଚଳିତ ବର୍ଷ ବାଲିଯାତ୍ରାରେ ପ୍ରଥମ ଥର ପାଇଁ ଅବ୍ତାର୍ ଫିଲ୍ମ ସଦୃଶ ଏଲିଅନ୍ ଦୁନିଆ ବୁଲି ଆନନ୍ଦ ଅନୁଭବ କରିବେ ଦର୍ଶକ । ବାଲିଯାତ୍ରାକୁ ଅଣାଯାଇଛି ଅନନ୍ତ ଦୁନିଆ ବୋଲାଉଥିବା ସ୍ୱତନ୍ତ୍ର ସୋ’ । କଟକ ଇନ୍ କଟକ ଏବଂ ଓରମାସ୍ ମଝିରେ ଏହି ଆକର୍ଷଣୀୟ ଦୁନିଆର ନିର୍ମାଣ କାର୍ଯ୍ୟ ଆରମ୍ଭ ହୋଇଛି ।
ପ୍ରତିବର୍ଷ ବାଲିଯାତ୍ରା ଆସିବା ମାତ୍ରେ ରାଜ୍ୟବାସୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଥାଏ । ଏଥର ବାଲିଯାତ୍ରାରେ କ’ଣ ନୂଆ ରହିଛି ତା ଉପରେ ସମସ୍ତଙ୍କ ନଜର ରହିଥାଏ । ଲୋକଙ୍କ ଆଗ୍ରହକୁ ଦୃଷ୍ଟିରେ ରଖି ଦୋଳି ମହାସଂଘ ପକ୍ଷରୁ ଗତ କିଛି ବର୍ଷ ହେବ ନୂଆ ନୂଆ କାର୍ଯ୍ୟକ୍ରମ କରାଯାଇଥାଏ । ଗତବର୍ଷ ବାଲିଯାତ୍ରାରେ ଟନେଲ୍ ଆକ୍ୱାରିୟମ୍ରେ ପ୍ରବଳ ଭିଡ଼ ହୋଇଥିଲା । ଲୋକମାନେ ପଡିଆରେ ମେଳା ବୁଲିବା ସହିତ ଟନେଲ୍ରେ ଏକ ନିଆରା ଅନୁଭବ ନେଇଥିଲେ । ଏ ବର୍ଷ ଓଡ଼ିଶାକୁ ପ୍ରଥମ ଥର ବାଲିଯାତ୍ରାରେ ଦେଖିବାକୁ ମିଳିବ ଅନନ୍ତ ଦୁନିଆ ତଥା ଏଲିୟନ୍ଙ୍କ ଦୁନିଆ ।
ହଲିଉଡ୍ର ଲୋକପ୍ରିୟ ଫିଲ୍ମ ‘ଅବ୍ତାର୍’ରେ ଦର୍ଶକଙ୍କ ଦେଖାଯାଇଥିବା ପଣ୍ଡୋରା ଭଳି ଏଲିୟନ୍ଙ୍କ ଦୁନିଆକୁ ଏବେ ପରଦା ବଦଳରେ ସତରେ ଲୋକଙ୍କୁ ଦେଖାଇବାକୁ ଉଦ୍ୟମ କରାଯାଉଛି । ଏଥିରେ ସେହି ଦୁନିଆର ଗଛ ଲତା ସହିତ ଲୋକମାନଙ୍କୁ ମଧ୍ୟ ସେହିଭଳି ବେଶଭୂଷା ଦିଆଯିବ । ଯେଉଁଠି ଲୋକମାନେ କିଛି ସମୟ ପାଇଁ ସମ୍ପୂର୍ଣ୍ଣ ଅଲଗା ଦୁନିଆର ଅନୁଭବ କରିବେ । ଏଥିରେ କାଚ ଓ ଲାଇଟ୍ରେ ସ୍ୱତନ୍ତ୍ର କାରୁକାର୍ଯ୍ୟ ରହିଛି । ଏଥିପାଇଁ ପ୍ରସ୍ତୁତି କାର୍ଯ୍ୟ ଅନେକ ଦିନ ଆଗରୁ ଆରମ୍ଭ ହୋଇସାରିଥିଲାବେଳେ ପୂର୍ବରୁ ଏଭଳି କିଛି ପ୍ରଦର୍ଶନୀ ଚେନ୍ନାଇରେ ଦେଖିବାକୁ ମିଳିଛି । ଏହାର ପ୍ରବେଶ ମୂଲ୍ୟ ୧୫୦ଟଙ୍କା ରହିବ ବୋଲି ମୀନାବଜାର ଓ ଦୋଳି ମହାସଂଘର ସମ୍ପାଦକ ଅଭିଷେକ ଜେନା ଓ ଦେବାଶିଷ ରାଉତ ସୂଚନା ଦେଇଛନ୍ତି ।
