କୋଣାର୍କ,୨୩।୬(ଆପ୍ର) : କୋଣାର୍କ ସ୍ଥିତ ଏକ ମହାବିଦ୍ୟାଳୟର +୨ ପାସ ସାର୍ଟିଫିକେଟ ପାଇଁ ଛାତ୍ରଛାତ୍ରୀଙ୍କ ଠାରୁ ଅଧ୍ୟାପକ ଚାନ୍ଦା ଆଦାୟ କରୁଥିବା ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି।
ଉକ୍ତ ମହାବିଦ୍ୟାଳୟର + ୨ କଳା, ବିଜ୍ଞାନ ଓ ବାଣିଜ୍ୟର ଉତ୍ତୀର୍ଣ୍ଣ ହୋଇଥିବା ଛାତ୍ରଛାତ୍ରୀମାନଙ୍କ ଠାରୁ ସାର୍ଟିଫିକେଟ ବାବଦରେ ଜନୈକ ଅଧ୍ୟାପକ ବେଆଇନ ଭାବେ ୫୦ଟଙ୍କା ଆଦାୟ କରୁଥିବା ଅଭିଯୋଗ ହୋଇଛି। ଭିଡିଓରେ ଛାତ୍ର ଜଣକ ରସିଦ ନଥାଇ ୫୦ଟଙ୍କା କେମିତି ନେବେ କହୁଛି। ଏହାର ଉତ୍ତରରେ ଅଧ୍ୟାପକ କହୁଛନ୍ତି ବୁଝି ପାରିଲନି କି ଖାଇବା ଓ ଯିବା ଆସିବାରେ ରସିଦ ନଥାଏ। ତାକୁ ଆମେ କେମିତି ସରକାରଙ୍କୁ ଦେଖାଇବୁ। ପିଲାମାନଙ୍କ ସାହାଯ୍ୟରେ ଏସବୁ ସୁରୁଖୁରୁରେ ଚାଲିବ। ଏ ସାର୍ଟିଫିକେଟ ମେନଟନାନସ କିଏ ଦେବ ବୋଲି ଅଧ୍ୟାପକ ବୁଝାଉଛନ୍ତି। ଘଟଣା ସମ୍ପର୍କରେ ମହାବିଦ୍ୟାଳୟର ଅଧ୍ୟକ୍ଷଙ୍କୁ ଯୋଗାଯୋଗ କରିବା ସମ୍ଭବ ହୋଇନଥିଲା। ଏଥିରେ ଅଧ୍ୟାପକଙ୍କ ସହ ଅନ୍ୟ କେଉଁ କର୍ମଚାରୀ ମାନଙ୍କ ସଂପୃକ୍ତି ରହିଛି ତଦନ୍ତ କଲେ ଜଣାପଡ଼ିବ। ତୁରନ୍ତ ଉଚ୍ଚଶିକ୍ଷା ବିଭାଗ ଏହାର ତଦନ୍ତ କରିବା ପାଇଁ ମହାବିଦ୍ୟାଳୟର ଛାତ୍ରଛାତ୍ରୀମାନେ ଦାବି କରିଛନ୍ତି।
