ନୂଆଦିଲ୍ଲୀ: ଇରାନ ସହିତ ଚାଲିଥିବା ପରମାଣୁ ଆଲୋଚନା ମଧ୍ୟରେ ଆମେରିକା ଏକ ବଡ଼ ପଦକ୍ଷେପ ନେଇଛି। ଆମେରିକା ଇରାନ ଉପରେ ନୂଆ କଟକଣା ଲଗାଇଛି । ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ ଏହି ପ୍ରତିବନ୍ଧକ ବିଷୟରେ ସୂଚନା ଦେଇଛନ୍ତି। ପରମାଣୁ କାର୍ଯ୍ୟକ୍ରମର ତିନି ଜଣ ବରିଷ୍ଠ ଅଧିକାରୀ ଏବଂ ଏକ ଇରାନୀ କମ୍ପାନୀ, ଫୁୟା ପାର୍ସ ପ୍ରୋସ୍ପେକ୍ଟିଭ୍ ଟେକ୍ନୋଲୋଜିଷ୍ଟସ୍ ଉପରେ ନୂତନ କଟକଣା ଲାଗୁ କରାଯାଇଛି। ଏହି ଅଧିକାରୀ ଏବଂ ୟୁନିଟ୍ ତେହେରାନର ପ୍ରତିରକ୍ଷା ନବସୃଜନ ଏବଂ ଗବେଷଣା ସଂଗଠନ (SPND) ସହିତ ଜଡିତ । ଏହି ପ୍ରତିବନ୍ଧକ ପରେ, ଏହି ତିନି ଜଣଙ୍କ ସଂପତ୍ତି ଏବଂ ଆମେରିକାରେ ଅବସ୍ଥିତ କମ୍ପାନୀର ସମସ୍ତ ସମ୍ପତ୍ତି ଫ୍ରିଜ୍ ହୋଇଯିବ। 

ଏହା ସହିତ ସେମାନଙ୍କ ସହିତ ବ୍ୟବସାୟିକ କାରବାର ଉପରେ ପ୍ରତିବନ୍ଧକ ଲଗାଯିବ। ଇରାନର ପରମାଣୁ କାର୍ଯ୍ୟକ୍ରମ ଉପରେ ଆମେରିକା ଏବଂ ଇରାନ ମଧ୍ୟରେ ଚତୁର୍ଥ ପର୍ଯ୍ୟାୟ ଆଲୋଚନା ଓମାନରେ ହେବା ପରେ ଏହି କଟକଣା ଲାଗୁ କରାଯାଇଛି। ଓମାନର ରାଜଧାନୀ ମସ୍କଟରେ ଓମାନ ଅଧିକାରୀଙ୍କ ମଧ୍ୟସ୍ଥତାରେ ପ୍ରାୟ ତିନି ଘଣ୍ଟା ଧରି ଆଲୋଚନା ଚାଲିଥିଲା। ସରକାରୀ ଟେଲିଭିଜନ ଇରାନର ବୈଦେଶିକ ମନ୍ତ୍ରଣାଳୟର ମୁଖପାତ୍ର ଇସମାଇଲ ବାଘାଇଙ୍କ ପ୍ରତିକ୍ରିୟାକୁ ନେଇ କହିଛି ଯେ, ଆଲୋଚନା ଦୀର୍ଘ ସମୟ ଧରି ଚାଲିଥିଲା ଏବଂ ପରବର୍ତ୍ତୀ ପର୍ଯ୍ୟାୟ ଆଲୋଚନା ପାଇଁ ବିଚାର ହେଉଛି । 

ଯଦି କୌଣସି ଚୁକ୍ତି ନହୁଏ, ତେବେ ଇରାନର କାର୍ଯ୍ୟକ୍ରମକୁ ଟାର୍ଗେଟ କରି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଆକ୍ରମଣ କରିବାକୁ ଧମକ ଦେଇଛନ୍ତି । ଇରାନୀ ଅଧିକାରୀମାନେ ବାରମ୍ବାର ଚେତାବନୀ ଦେଇଛନ୍ତି ଯେ, ସେମାନେ ସେମାନଙ୍କର ୟୁରାନିୟମ ଭଣ୍ଡାରକୁ ଅସ୍ତ୍ର-ଗ୍ରେଡ୍ ସ୍ତରକୁ ସମୃଦ୍ଧ କରି ପରମାଣୁ ଅସ୍ତ୍ର ବିକାଶ ଆଡ଼କୁ ଅଗ୍ରସର ହୋଇପାରିବେ। ଇସ୍ରାଏଲ ଧମକ ଦେଇଛି ଯେ, ଯଦି ସେ ବିପଦ ଅନୁଭବ କରେ ତେବେ ଇରାନର ପରମାଣୁ ପ୍ରତିଷ୍ଠାନ ଉପରେ ଆକ୍ରମଣ କରିବ ।