ଖୋର୍ଦ୍ଧା,୨୯/୦୭: ସୋମବାର ଖୋର୍ଦ୍ଧା ଜିଲ୍ଲାର ନୂତନ ଜିଲ୍ଲାପାଳ ଭାବେ ଦାୟିତ୍ବ ଗ୍ରହଣ କଲେ ଅମ୍ରିତ୍ ଋତୁରାଜ । ଭାରପ୍ରାପ୍ତ ଜିଲ୍ଲାପାଳ ସାଫଲ୍ୟ ମଣ୍ଡିତ ପ୍ରଧାନଙ୍କଠାରୁ ସେ ଏହି ଦାୟିତ୍ୱ ଗ୍ରହଣ କରିଛନ୍ତି । ଜିଲ୍ଲାପାଳ ଦାୟିତ୍ବ ଗ୍ରହଣ ପରେ ଅମ୍ରିତ୍ ଋତୁରାଜ କହିଛନ୍ତି, ଜନପ୍ରତିନିଧି ଓ ପ୍ରଶାସନିକ କଳ ସମନ୍ୱୟରେ ଖୋର୍ଦ୍ଧା ଏକ ବିକଶିତ ଜିଲ୍ଲାରେ ପରିଣତ ହେବ । କେନ୍ଦ୍ର ଓ ରାଜ୍ୟ ସରକାରଙ୍କ ଯୋଜନା ଲୋକଙ୍କ ନିକଟରେ ପହଞ୍ଚାଇବା ଏବଂ ଅଭିଯୋଗ ଗୁଡ଼ିକର ତ୍ୱରିତ ସମାଧାନ ଉପରେ ପ୍ରାଥମିକତା ଦିଆଯିବ ।
ସେହିପରି ପାଇକ ସ୍ମାରକୀ କାର୍ଯ୍ୟ ମନ୍ଥର ହେବା ସମ୍ପର୍କରେ ସେ କହିଛନ୍ତି ଯେ, ବୀର ସଂଗ୍ରାମୀଙ୍କ ସ୍ମୃତି ଉଦ୍ଦେଶ୍ୟରେ ଆବଶ୍ୟକ ପଦକ୍ଷେପ ଗ୍ରହଣ କରାଯିବ । ମହାପ୍ରଭୁ ଶ୍ରୀଜଗନ୍ନାଥଙ୍କ ଜମିର ସୁରକ୍ଷା ପ୍ରଶାସନର ପ୍ରଥମ ଦାୟିତ୍ୱ । ସମସ୍ତଙ୍କ ସହଯୋଗ ଓ ସହଭାଗିତାରେ ଜିଲ୍ଲାର ପ୍ରଗତିର ଧାରା ଆଗେଇବ । ବେଗୁନିଆ, ବୋଲଗଡ଼, ଟାଙ୍ଗୀ ଓ ନାଚୁଣୀ ବିଜ୍ଞାପିତ ପରିଷଦ ମାନ୍ୟତା ସମ୍ପର୍କରେ ରାଜ୍ୟ ସରକାରଙ୍କ ସହ ଆଲୋଚନା କରି ସମାଧାନ କରିବା ଏବଂ ପୁଲିସ, ଅବକାରୀ ବିଭାଗର ମିଳିତ ଉଦ୍ୟମରେ ନିଶାମାଫିଆଙ୍କୁ ସାବାଡ଼ କରାଯିବ ବୋଲି ଜିଲ୍ଲାପାଳ ଋତୁରାଜ ପ୍ରକାଶ କରିଛନ୍ତି । ପ୍ରକାଶ ଥାଉକି, ଅମ୍ରିତ୍ ଋତୁରାଜ ଏହା ପୂର୍ବରୁ କନ୍ଧମାଳ ଜିଲ୍ଲାପାଳ ଭାବେ କାର୍ଯ୍ୟରତ ଥିଲେ ।
