ହେମଗିର,୦୮/୧୧: ହେମଗିର ଥାନା ଅଞ୍ଚଳରେ ବୁଧବାର ବୀଭତ୍ସ ହତ୍ୟାକାଣ୍ଡ ଘଟାଇଥିବା ତଥା ଏକତରଫା ପ୍ରେମିକରୁ ହତ୍ୟାକାରୀ ସାଜିଥିବା ଅଭିଯୁକ୍ତଙ୍କୁ ପୁଲିସ୍ ଗିରଫ କରିଛି । ଏହି ଥାନା ଅଧୀନ ପୂର୍ଣ୍ଣା ଗ୍ରାମର ଅଙ୍ଗନବାଡ଼ି କର୍ମୀ ଦିବ୍ୟାଭାରତୀ ଅଢ଼ା (୨୩)ଙ୍କୁ ଫାର୍ଶାରେ ହାଣି ହତ୍ୟା କରି ଫେରାର ଥିବା ଅଭିଯୁକ୍ତଙ୍କୁ ପୁଲିସ୍ ବିଳମ୍ବିତ ରାତିରେ ହିଁ ଧରିଛି । ଅଭିଯୁକ୍ତ ପୂର୍ଣ୍ଣା ଗ୍ରାମର ଶରତ କଉଡ଼ି (୨୪) । ପୁଲିସ୍ ଅଭିଯୁକ୍ତ ଶରତଙ୍କୁ ପଚରାଉଚରା କରିବା ସହ ଗୁରୁବାର ଦୁର୍ଘଟଣାସ୍ଥଳକୁ ନେଇ ଓ ସାଇଣ୍ଟିଫିକ ଟିମ୍ଙ୍କ ଉପସ୍ଥିତିରେ କିଭଳି ହତ୍ୟାକାଣ୍ଡ ଘଟାଇଥିଲା ତାହାର ସିନ୍ ରିକ୍ରିଏସନ କରିଥିଲା ।
ମିଳିଥିବା ସୂଚନା ଅନୁଯାୟୀ, ଜୁଲୁମବାହାଲ ପଞ୍ଚାୟତ ପୂର୍ଣ୍ଣା ଗ୍ରାମର ଧନୁର୍ଜୟ ଅଢ଼ା ଏବଂ ସଂଯୁକ୍ତା ଅଢ଼ାଙ୍କ ୩ସନ୍ତାନଙ୍କ ମଧ୍ୟରେ ମଝିଆ ଝିଅ ଦିବ୍ୟାଭାରତୀ ଗାଁରେ ଅଙ୍ଗନବାଡ଼ି କର୍ମୀ ଭାବେ କାର୍ଯ୍ୟ କରୁଥିଲେ । ହେଲେ ପ୍ରାୟ ଦେଢ଼ ବର୍ଷ ହେବ ଶରତ ତାଙ୍କୁ ଏକତରଫା ପ୍ରେମ କରି ବିବାହ ପାଇଁ କହିଥିଲେ । କିନ୍ତୁ ଦିବ୍ୟାଭାରତୀ ଏଥିରେ ରାଜି ହୋଇ ନ ଥିଲେ । ଫଳରେ ଶରତ ରାଗ ରଖି ଜୀବନରୁ ମାରିଦେବା ପାଇଁ ଯୋଜନା କରିଥିଲେ । ଫଳରେ ଗୁରୁବାର ଦିବ୍ୟାଭାରତୀ ସ୍କୁଲରୁ କାମ ସାରି ଫେରୁଥିବା ବେଳେ ଗାଁ ମଝିରେ ଏକାକୀ ଦେଖି ଶରତ ଏକ ଫାର୍ସାରେ ଫଛରୁ ତାଙ୍କ ବେକକୁ ଚୋଟ ପକାଇ ଫେରାର ହୋଇଯାଇଥିଲେ । ସ୍ଥାନୀୟ ଲୋକ ଓ ସହକର୍ମୀଙ୍କଠାରୁ ଖବରପାଇ ପରିବାର ଲୋକ ପହଞ୍ଚି ଝିଅକୁ ସ୍ଥାନୀୟ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ ହେଁ ଡାକ୍ତର ମୃତଘୋଷଣା କରିଥିଲେ । ଏହାପରେ ଦିବ୍ୟାଭାରତୀଙ୍କ ମା ସଂଯୁକ୍ତା ଶରତ ହିଁ ମୋ ଝିଅକୁ ମାରିଛି ବୋଲି କହି ଥାନାରେ ଅଭିଯୋଗ କରିଥିଲେ । ଅଭିଯୋଗକ୍ରମେ ପୁଲିସ୍ ହତ୍ୟା ମାମଲା ରୁଜୁ କରି ତଦନ୍ତ କରି ହତ୍ୟାକାଣ୍ଡ ସ୍ଥଳରୁ ଫାର୍ସା ଜବତ କରିଥିଲା । ହେଲେ ବିଳମ୍ବିତ ରାତିରେ ଶରତ ନିଜ ଘରକୁ ଆସିଥିବା ପୁଲିସ୍ ବିଶେଷ ସୂତ୍ରରୁ ଖବରପାଇଥିଲା । ପରେ ଟିମ୍ ସହ ତାଙ୍କ ଘରେ ଚଢ଼ାଉ କରି ଶରତଙ୍କୁ ଗିରଫ କରିଥିଲେ । ଗୁରୁବାର ମାଜିଷ୍ଟ୍ରେଟ ପ୍ରତାପ ଚନ୍ଦ୍ର ଦାସଙ୍କ ଉପସ୍ଥିତି ଓ ସାଇଣ୍ଟିଫିକ ଟିମ୍ ରହି ହତ୍ୟାକାରୀକୁ ପୁଲିସ୍ ସାଙ୍ଗରେ ନେଇ ହତ୍ୟା ଘଟଣାର ସିନ୍ ରିକ୍ରିଏସନ କରାଇଥିଲେ । ଅପରପକ୍ଷେ ଦିବ୍ୟାଭାରତୀଙ୍କ ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି ।
