ନୂଆଦିଲ୍ଲୀ,୩୦/୧୧: ପାକିସ୍ତାନୀ ଗ୍ୟାଙ୍ଗଷ୍ଟରଙ୍କ ଠାରୁ ଅନମୋଲ ବିଷ୍ଣୋଇଙ୍କ ଜୀବନ ପ୍ରତି ବିପଦ। କୋର୍ଟରେ ଦାଖଲ କଲେ ସୁରକ୍ଷା ଆବେଦନ। କୁଖ୍ୟାତ ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇଙ୍କ ଭାଇ ଅନମୋଲ ବିଷ୍ଣୋଇ ତାଙ୍କର ସୋସିଆଲ ମିଡିଆରେ ସାମ୍ପ୍ରତିକ ପୋଷ୍ଟ ଯୋଗୁଁ ତାଙ୍କୁ ପାକିସ୍ତାନୀ ଗ୍ୟାଙ୍ଗଷ୍ଟର ଶହଜାଦ ଭାଟି ଟାର୍ଗେଟ କରି ହତ୍ୟା କରିପାରନ୍ତି ବୋଲି ଆଶଙ୍କା ପ୍ରକାଶ କରିଛନ୍ତି। ଆବେଦନରେ କୁହାଯାଇଛି ଯେ, ନିରନ୍ତର ଧମକ ଯୋଗୁଁ ଆବେଦନକାରୀ ଅନମୋଲ ଏବଂ ତାଙ୍କ ପରିବାର ସଦସ୍ୟମାନେ ନିରନ୍ତର ଭୟ, ମାନସିକ ଚାପ ଏବଂ ଚିନ୍ତାରେ ବଞ୍ଚୁଛନ୍ତି।
ଆବେଦନରେ ଆହୁରି କୁହାଯାଇଛି ଯେ, ଏପରି ଧମକକୁ ହାଲୁକା ଭାବରେ ନିଆଯାଇପାରିବ ନାହିଁ, କାରଣ ସାମ୍ପ୍ରତିକ ଘଟଣାଗୁଡ଼ିକ ସ୍ପଷ୍ଟ ଭାବରେ ଦର୍ଶାଉଛି ଯେ ଅନଲାଇନ୍ ଧମକ ବାସ୍ତବ ଦୁନିଆରେ ହିଂସାତ୍ମକ ଆକ୍ରମଣରେ ପରିଣତ ହୋଇଛି। ଆବେଦନରେ ଅନମୋଲ କୋର୍ଟଙ୍କୁ ଜାତୀୟ ତଦନ୍ତ ସଂସ୍ଥା ମୁଖ୍ୟାଳୟରୁ କୋର୍ଟ ପରିସରକୁ ଯିବା ସମୟରେ ତାଙ୍କୁ ପର୍ଯ୍ୟାପ୍ତ ସଶସ୍ତ୍ର ପୁଲିସ ସୁରକ୍ଷା ଯୋଗାଇବା ପାଇଁ ତଦନ୍ତ ସଂସ୍ଥାକୁ ନିର୍ଦ୍ଦେଶ ଦେବାକୁ ଅନୁରୋଧ କରିଥିଲେ।
ଶନିବାର ଦିନ ପ୍ରଥମ ଥର ପାଇଁ ସ୍ୱତନ୍ତ୍ର ବିଚାରପତି ପ୍ରଶାନ୍ତ ଶର୍ମା ନିୟମିତ କୋର୍ଟ ପରିବର୍ତ୍ତେ ଏନଆଇଏ ମୁଖ୍ୟାଳୟରେ ଶୁଣାଣି କରିଥିଲେ ଏବଂ ଅନମୋଲଙ୍କ ହାଜତକୁ ଡିସେମ୍ବର ୫ ପର୍ଯ୍ୟନ୍ତ ବୃଦ୍ଧି କରିଥିଲେ। ପୂର୍ବରୁ, ଅନମୋଲଙ୍କୁ ନଭେମ୍ବର ୧୯ ତାରିଖରେ ୧୧ ଦିନ ପାଇଁ ଏନଆଇଏ ହେପାଜତକୁ ପଠାଯାଇଥିଲା। ଏନଆଇଏର ସ୍ୱତନ୍ତ୍ର ସରକାରୀ ଓକିଲ ଆଡଭକେଟ୍ ରାହୁଲ ତ୍ୟାଗୀ କହିଛନ୍ତି ଯେ, ପ୍ରତିରକ୍ଷା ଓକିଲ ଅନୁରୋଧ କରିଥିବାରୁ ମୁଖ୍ୟାଳୟରେ ଶୁଣାଣି କରାଯାଇଥିଲା। ଅନମୋଲ ବିଷ୍ଣୋଇଙ୍କ ପୁଲିସ ହେପାଜତକୁ ଆହୁରି ସାତ ଦିନ ପାଇଁ ବୃଦ୍ଧି କରାଯାଇଛି। ସେ ଅନେକ ତଥ୍ୟ ପ୍ରକାଶ କରିଛନ୍ତି ଯାହାର ଅଧିକ ତଦନ୍ତ ଆବଶ୍ୟକ। ଏନଆଇଏ ବର୍ତ୍ତମାନ ତାଙ୍କୁ ଅଧିକ ତଦନ୍ତ କରୁଛି।"
ପ୍ରକାଶ ଥାଉକି, ଏନସିପି ନେତା ସିଦ୍ଦିକିଙ୍କ ହତ୍ୟା, ଏପ୍ରିଲ ୨୦୨୪ରେ ଅଭିନେତା ସଲମାନ ଖାନଙ୍କ ବାସଭବନରେ ଗୁଳିକାଣ୍ଡ, ପଞ୍ଜାବୀ ଗାୟକ ସିଦ୍ଧୁ ମୁସେୱାଲାଙ୍କ ହତ୍ୟା ଏବଂ ଅନ୍ୟାନ୍ୟ ଅପରାଧରେ ଜଡିତ ଅନମୋଲଙ୍କୁ ନଭେମ୍ବର ୧୮ ତାରିଖରେ ଆମେରିକାରୁ ନିର୍ବାସିତ କରାଯାଇଥିଲା। ନଭେମ୍ବର ୨୦୨୪ରେ ତାଙ୍କୁ ଆମେରିକାରେ ହେପାଜତକୁ ନିଆଯାଇଥିଲା। ୨୦୨୨ ମସିହାରୁ ପଳାତକ ଥିବା ଅନମୋଲ ହେଉଛନ୍ତି ଜେଲରେ ଥିବା ତାଙ୍କ ଭାଇ ଲରେନ୍ସ ବିଷ୍ନୋଇଙ୍କ ନେତୃତ୍ୱରେ ଆତଙ୍କବାଦୀ-ଗ୍ୟାଙ୍ଗଷ୍ଟର ସିଣ୍ଡିକେଟରେ ସମ୍ପୃକ୍ତି ପାଇଁ ଗିରଫ ହୋଇଥିବା ୧୯ତମ ଅଭିଯୁକ୍ତ।
