ନୂଆଦିଲ୍ଲୀ,୨୩।୪: ଆପଲ ଓ ମେଟା ଉପରେ ବଡ଼ ଧରଣର ଜରିମାନା ଲଗାଇଲା ୟୁରୋପିଆନ୍ ୟୁନିୟନ। ଦୁଇ କମ୍ପାନୀ ଉପରେ ୭୦ କୋଟି ୟୁରୋ(ପ୍ରାୟ ୬୮୨୩ କୋଟି ଟଙ୍କା)ର ଫାଇନ୍ ଲଗାଯାଇଛି। ଆପଲ ଉପରେ ୫୦ କୋଟି ୟୁରୋ (ପ୍ରାୟ ୪୮୭୪.୨୫ କୋଟି ଟଙ୍କା) ଓ ମେଟା ଉପରେ ୨୦ କୋଟି ୟୁରୋ (ପ୍ରାୟ ୧୯୪୯.୭୦ କୋଟି ଟଙ୍କା) ଫାଇନ୍ ଦେବାକୁ ପଡିବ। ଏହି ଜରିମାନା ୟୁରୋପିଆନ୍ ୟୁନିୟନ୍ ଆଣ୍ଟି ଟ୍ରଷ୍ଟି ରେଗୁଲେଟର ପକ୍ଷରୁ ଲଗାଯାଇଛି।
ବଡ଼ ଟେକ୍ କମ୍ପାନୀ ଉପରେ ୟୁରୋପିଆନ୍ ୟୁନିୟନ୍ର ଫାଇନ୍ ପରେ ଆମେରିକା ଓ ୟୁରୋପର ସମ୍ପର୍କ ପ୍ରଭାବିତ ହୋଇପାରେ। ଆମେରିକା ରାଷ୍ଟ୍ରପତି ଡୋନାଲ୍ଡୋ ଟ୍ରମ୍ପ ପୂର୍ବରୁ ହିଁ ଆମେରିକା କମ୍ପାନୀ ବିରୋଧରେ ଫାଇନ୍ ଲଗାଇଥିବା ଦେଶ ଉପରେ ଟାରିଫ୍ ଲଗାଇବାର ଧମକ ଦେଇଥିଲେ।
ଏହି ଫାଇନ୍ ଡିଜିଟାଲ ମାର୍କେଟ ଆକ୍ଟ ଅନୁସାରେ ଲଗାଯାଇଥିଲା। ଏହି ଆଇନ ମାର୍କେଟରେ ଥିବା ବହୁ ବଡ଼ କମ୍ପାନୀ ଭିତରେ ଛୋଟ ପ୍ଲେୟାର୍ସଙ୍କ ଏଣ୍ଟ୍ରିକୁ ସୁନିଶ୍ଚିତ କରିଥାଏ। ଏହି ମାମଲାରେ ଆପଲ କହିଛି ଯେ, ଇୟୁର ଫାଇନ୍କୁ ଚ୍ୟାଲେଞ୍ଜ ଦେବ। ଆପଲ ପକ୍ଷରୁ ଜାରି ଏକ ବୟାନରେ କୁହାଯାଇଛି, ଆଜିର ନିଷ୍ପତ୍ତି ୟୁରୋପିୟ କମିଶନ୍ଙ୍କ ପକ୍ଷରୁ ଆପଲକୁ ଭୁଲ ଭାବରେ ଟାର୍ଗେଟ କରାଯିବାର ଏକ ଉଦାହରଣ । ଏହା ଏକ ଏଭଳି ସିରିଜର ଅଂଶ, ଯାହାକି ଆମର ୟୁଜର୍ସଙ୍କ ପ୍ରାଇଭେସୀ ଓ ସିକ୍ୟୁରିଟି ପାଇଁ କ୍ଷତିକାରକ, ଆମର ପ୍ରଡକ୍ଟ ପାଇଁ ଖରାପ ଓ ଆମକୁ ନିଜର ଟେକ୍ନୋଲୋଜି ଫ୍ରି’ରେ ଦେବା ପାଇଁ ବାଧ୍ୟ କରିଥାଏ। ମେଟା ୟୁରୋପିଆନ୍ ୟୁନିୟନର ନିଷ୍ପତ୍ତିକୁ ସମାଲୋଚନା କରିଛି। କମ୍ପାନୀ ପକ୍ଷରୁ ଜାରି ବୟାନରେ କୁହାଯାଇଛି ୟୁରୋପିଆନ୍ କମିଶନ୍ ସଫଳ ଆମେରିକା ବିଜନେସ୍କୁ ବିକଳାଙ୍ଗ କରିବାର ଚେଷ୍ଟା କରୁଛନ୍ତି। ସେଭଳି ଚୀନ୍ ଓ ୟୁରୋପୀୟ କମ୍ପାନୀକୁ ଅଲଗା ଷ୍ଟାଣ୍ଡାର୍ଡ ଅନୁସାରେ କାମ କରିବାକୁ ଦିଆଯାଉଛି।
