କଟକ,୧୧/୦୧: ରାଜସ୍ୱ ବିଭାଗର ସବୁଠାରୁ ତୂଣମୂଳସ୍ତରରେ ଆର୍ଆଇ, ଆଡିସ୍ନାଲ୍ ଆର୍ଆଇ ବା ଏଆର୍ଆଇ ଏବଂ ଅମିନମାନେ କାର୍ଯ୍ୟ କରିଥାନ୍ତି । କିନ୍ତୁ ତହସିଲ୍ଦାର ଏବଂ ଜିଲ୍ଲାପାଳଙ୍କ ଅନୁମୋଦନ ବିନା ବିଭିନ୍ନ ବିଭାଗ ପକ୍ଷରୁ ଏମାନଙ୍କୁ ଅଣରାଜସ୍ୱ କାର୍ଯ୍ୟରେ ନିୟୋଜିତ କରାଯାଉଛି । ଏଭଳି କାର୍ଯ୍ୟକୁ ନେଇ ରାଜସ୍ୱ ବିଭାଗ ଉଦ୍ବେଗ ପ୍ରକାଶ କରିବା ସହ ଏହି ମର୍ମରେ ଜିଲ୍ଲାପାଳମାନଙ୍କୁ ଚିଠି ଲେଖି ଆରଆଇ, ଏଆର୍ଆଇ ଏବଂ ଅମିନଙ୍କୁ ଅଣ-ରାଜସ୍ୱ କାର୍ଯ୍ୟରେ ନିୟୋଜିତ ନକରିବା ଲାଗି ଅନୁରୋଧ କରିଛି । ଯଦି ଅଣ-ରାଜସ୍ୱ କାର୍ଯ୍ୟରେ ଏହି କର୍ମଚାରୀଙ୍କୁ ନିୟୋଜିତ କରାଯାଏ ତାହେଲେ ଏଥିପାଇଁ ଜିଲ୍ଲାପାଳଙ୍କ ଅନୁମତି ବାଧ୍ୟତାମୂଳକ ବୋଲି ଚିଠିରେ ଉଲ୍ଲେଖ କରାଯାଇଛି ।
ରାଜସ୍ୱ ବିଭାଗର ଅତିରିକ୍ତ ସଚିବ ସୁଷମାରାଣୀ ଦେବୀଙ୍କ ପକ୍ଷରୁ ଲେଖାଯାଇଥିବା ଚିଠିରେ କୁହାଯାଇଛି, ରାଜସ୍ୱ ପ୍ରାଶାସନିକ କାର୍ଯ୍ୟରେ ଆର୍ଆଇ, ଏଆର୍ଆଇ ଏବଂ ଅମିନଙ୍କ ଗୁରୁତ୍ୱପୂର୍ଣ୍ଣ ଭୂମିକା ଥାଏ । ଏମାନେ କେବଳ ରାଜସ୍ୱ ମାମଲା ସମାଧାନ ପାଇଁ କାମ କରିନଥାନ୍ତି, ସରକାରଙ୍କ ବିଭିନ୍ନ ଯୋଜନା ଲୋକଙ୍କ ନିକଟରେ ପହଞ୍ଚାଇଥାନ୍ତି । ଏଥିସହ ସାଧାରଣ ଲୋକଙ୍କ ବିଭିନ୍ନ କାର୍ଯ୍ୟ ମଧ୍ୟ କରିଥାନ୍ତି । କିନ୍ତୁ ଏବେ ଏହି କର୍ମଚାରୀଙ୍କୁ ବିଭିନ୍ନ ଅଣରାଜସ୍ୱ କାର୍ଯ୍ୟରେ ନିୟୋଜିତ କରାଯାଉଛି । ଫଳରେ ସାଧାରଣ ଲୋକେ ରାଜସ୍ୱ ସଂପର୍କିତ ବିଭିନ୍ନ ସେବାରୁ ବଞ୍ଚିତ ହେଉଛନ୍ତି । ଏନେଇ ଓଡ଼ିଶା ରାଜ୍ୟ ଫିଲଡ୍ ଅଫିସର୍ସ ଆସୋସାସିଏସନ୍ ରାଜସ୍ୱ ବିଭାଗ, ବିଭିନ୍ନ ଜିଲ୍ଲାପାଳଙ୍କୁ ସ୍ମାରକପତ୍ର ଦେଇଥିଲେ । ତହସିଲ୍ଦାର ଏବଂ ଜିଲ୍ଲାପାଳଙ୍କ ଅନୁମତି ବିନା ସେମାନଙ୍କୁ ବିଭିନ୍ନ କାର୍ଯ୍ୟରେ ନିୟୋଜିତ କରାଯାଉଛି ବୋଲି ଅଭିଯୋଗ କରିଥିଲେ । ଏଣୁ ଏହା ଉପରେ ଜିଲ୍ଲାପାଳମାନେ ପଦକ୍ଷେପ ନେବାକୁ ଏହି ଚିଠିରେ କୁହାଯାଇଛି ।
