ନୂଆଦିଲ୍ଲୀ: ଘଟଣାକୁ ଦିନେ ନପୁରୁଣୁ ଭାରତୀୟ ସେନାର ଜାଲରେ ଫସିସାରିଲେଣି ଆତଙ୍କବାଦୀ। ପହଲଗାମ ଆକ୍ରମଣପରେ ବୁଧବାର କୁଲଗାମ ଜିଲ୍ଲାର ତାଙ୍ଗମାର୍ଗ ଅଞ୍ଚଳରେ ସୁରକ୍ଷା ବାହିନୀ ଓ ଆତଙ୍କବାଦୀଙ୍କ ମଧ୍ୟରେ ଏକ ଗୁଳିବିନିମୟ ଆରମ୍ଭ ହୋଇଯାଇଛି। ଆତଙ୍କୀ ଆକ୍ରମଣରେ ନିଜକୁ ଦାୟି କରିଥିବା ଆତଙ୍କୀ ସଂଗଠନ ଦ ରେସିଷ୍ଟାନ୍ସ ଫ୍ରଣ୍ଟ (ଟିଆରଏଫ)ର ଜଣେ ପ୍ରମୁଖ କମାଣ୍ଡରଙ୍କୁ ଘେରିଛି ଭାରତୀୟ ସେନା। ତେବେ ସୁରକ୍ଷା ବାହିନୀ ଅଞ୍ଚଳଟିକୁ ଘେରାବନ୍ଦୀ କରି ତଲ୍ଲାସୀ ଅଭିଯାନ ଜାରି ରଖିଛି।
ଅନ୍ୟ ଏକ ଘଟଣାରେ, ବୁଧବାର ସକାଳ ସମୟରେ ସୀମାରେ ଅନୁପ୍ରବେଶ କରୁଥିବା ଦୁଇ ଆତଙ୍କୀଙ୍କୁ ମାରି ଅନୁପ୍ରବେଶ ଉଦ୍ୟମକୁ ପଣ୍ଡ କରିଦେଇଥିଲା ଭାରତୀୟ ସେନା। କାଶ୍ମୀର ଜିଲ୍ଲାର ବାରମୁଳା ଅଞ୍ଚଳରେ ସୁରକ୍ଷା କର୍ମୀ ଓ ଆତଙ୍କୀଙ୍କ ମଧ୍ୟରେ ଦୀର୍ଘ ସମୟ ଧରି ଗୁଳିଚାଳନା ହୋଇଥିଲା। ଶେଷରେ ସେନାର ସାମ୍ନା କରିପାରିନଥିଲେ ଆତଙ୍କବାଦୀ। ସେନା ଗୁଳିରେ ଦୁଇ ଆତଙ୍କୀଙ୍କ ମୃତ୍ୟୁ ହୋଇଥିଲା। ଏହାପରେ ସୁରକ୍ଷା ବଳ ଆତଙ୍କୀଙ୍କୁ ଯାଞ୍ଚ କରିବା ପରେ ସେମାନଙ୍କ ନିକଟରୁ ବିପୁଳ ପରିମାଣରେ ପାକିସ୍ତାନୀ ମୁଦ୍ରା ସମେତ ବହୁ ଅସ୍ତ୍ରଶସ୍ତ୍ର ଜବତ ହୋଇଛି।
ସୂଚନା ମୁତାବକ, ମଙ୍ଗଳବାର ଅପରାହ୍ନ ସମୟରେ ୫ରୁ ୬ଜଣ ଆତଙ୍କବାଦି ବସରନ ମିଆଦୋ ଅଞ୍ଚଳରେ ଥିବା ଏକ ପର୍ଯ୍ୟଟନସ୍ଥଳିରେ ଆଖିବୁଜା ଗୁଳିଚାଳନା କରିଥିଲେ। ପହଲଗାମଠୁ ୫ କିଲୋମିଟର ଦୁରରେ ଥିବା ଏହି ଅଞ୍ଚଳ ଏକ ଦୁର୍ଗମ ଅଞ୍ଚଲ ହୋଇଥିବାରୁ ଏଠାକୁ ପାଦରେ ଚାଲିଚାଲି କିମ୍ନା ଘୋଡା ସହାୟତାରେ ଯିବାକୁ ପଡିଥାଏ। ଏହି ଆକ୍ରମଣ କାଶ୍ମୀର ଅଞ୍ଚଳରେ ହୋଇଥିବା ସମସ୍ତ ଆକ୍ରମଣଠୁ ଅଧିକ ବଡ ଓ ଅଧିକ ଭୟଙ୍କର ଥିଲା ବୋଲି ଜଣାପଡିଛି।
ସେଠାରେ ଉପସ୍ଥିତ ଥିବା ଲୋକମାନେ ଏହି ଆକ୍ରମଣ ସମ୍ପର୍କରେ ସୂଚନା ଦେଇ କହିଛନ୍ତି ଯେ ଉକ୍ତ ଅଞ୍ଚଳରେ ଥିବା ପାଇନ ଜଙ୍ଗଲରୁ ଆତଙ୍କବାଦିମାନେ ହଠାତ ବାହାରି ଆସିଥିଲେ। ସେଠାରେ ପିକନିକ କରୁଥିବା, ଘୋଡା ଛଢି ବୁଲୁଥିବା ଓ ବିଭିନ୍ନ ଷ୍ଟଲରେ ଖାଦ୍ୟ ଖାଉଥିବା ପର୍ଯ୍ୟଟକଙ୍କ ଉପରେ ଆଖିବୁଜା ଗୁଳିଚାଳନା କରିଥିଲେ। ଗୁଳିଚାଳନାରେ ମୃତାହାତ ହୋଇଥିବା ଅଧିକାଂଶ ଲୋକ ପର୍ଯ୍ୟଟକ ବୋଲି ଜଣାପଡିଛି। ତେବେ ଏହି ଆକ୍ରମଣରେ ମୃତ୍ୟୁ ଘଟିତିବା ଦୁଇଜଣ ବିଦେଶି ପର୍ଯ୍ୟଟକଙ୍କ ମଧ୍ୟରୁ ଜଣେ ଯୁଏଇ ଓ ଅନେୟ ଜଣେ ନେପାଳର ନାଗରିକ ଥିଲେ ବୋଲି ଜଣାପଡିଛି।
ଏହି ଆତଙ୍କୀ ଆକ୍ରମଣ ପରେ ଭାରତୀୟ ସେନା ବାହିନୀ ପକ୍ଷରୁ କାଶ୍ମୀର ଉପତ୍ୟକାରେ ନିରାପତ୍ତା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ପହଲଗାମ ଆକ୍ରମଣସ୍ଥଳଠୁ ୫ କିଲୋମିଟର ବ୍ୟାସାର୍ଦ୍ଧ ଅଞ୍ଚଳରେ ସେନା, ସିଆରପିଏଫ ଓ ଜାମ୍ମୁ-କାଶ୍ମୀର ପୋଲିସ ମିଳିତ ଭାବେ ତଲ୍ଲାସୀ ଅଭିଯାନ ଜାରି ରଖିଛନ୍ତି। ସ୍ପେଶାଲ ଫୋର୍ସ, ସ୍ନିଫର ଡଗ୍ ଓ ଗୁଇନ୍ଦା ବିଭାଗ ସହାୟତାରେ ଆକ୍ରମଣକାରୀଙ୍କୁ ଖୋଜା ଜାରି ରହିଛି।
