ନୂଆଦିଲ୍ଲୀ,୧୬/୧୨: ଏଆଇ ଯୋଗୁ ବିଶ୍ୱ ଦ୍ରୁତ ଭାବେ ବଦଳୁଛି । ଆଇର୍ଟିଫିସିଆଲ ଇଣ୍ଟେଲିଜେନ୍ସି ବା ଏବେ ଏଲିଆନ ଇଣ୍ଟେଲିଜେନ୍ସ ଭାବେ ଉଭା ହୋଇଛି । ଏଆଇ ଏବେ ନିଜେ ଶିଖିବା ସହ ନିଜକୁ ଲଗାତାର ପରିବର୍ତ୍ତନ କରୁଛି । ଏଆଇର ଆଲଗୋରିଦିମ୍ ନିଜେ ନିଜେ ବିକଶିତ ହେଉଛି ।
ଏଆଇକୁ ବନାଇଥିବା ଇଞ୍ଜିନିୟର ମଧ୍ୟ କହିବାକୁ ସକ୍ଷମ ନୁହନ୍ତି ଯେ, ଏହା କେଉଁ ଆଧାରରେ ହେଉଛି । ଏଆଇ ଜରିଆରେ ପ୍ରକୃତରେ ଏକ ଭିନ୍ନ ପ୍ରଜାତି ସୃଷ୍ଟି ହେଉଛି । ଯାହା ଏକ ଭିନ୍ନ ଗ୍ରହର । ଏଆଇ ଏବେ ନିଜେ ଶିଖୁଛି । ମିଛ ମଧ୍ୟ କହୁଛି । ଏଭଳି କାରଣ ଯୋଗୁ ୨ରୁ ୩ ବର୍ଷରେ ବୃତ୍ତି ବଦଳାଇବାକୁ ପଡିପାରେ ବୋଲି ଖ୍ୟାତି ସମ୍ପନ୍ନ ପ୍ରଫେସର ଜୁଆଲ ନୁଆହ ଫରାରି କହିଛନ୍ତି।
ପ୍ରଫେସର ଫରାରି କହିଲେ, ଆମେ ଏବେ ଚାଟ୍ ଜିପିଟି କିମ୍ବା ଅନ୍ୟ ଏଆଇ ଟୁଲ୍ ଦେଖି ଉତ୍ସାହିତ ହେଉଛେ । ମାତ୍ର ଏହା ଆରମ୍ଭ ମାତ୍ର । ଏଆଇ କ୍ଷେତ୍ରରେ ଆମେ ଏବେ ଆମିବା ସ୍ତରରେ ରହିଛୁ । ଆଗକୁ ଡାଏନୋସର ଦେଖିବା ବାକି ରହିଛି । ଆମିବା, ଡାଏନୋସର ଏବଂ ପୁଣି ମାନବ ଯାଏ ଆସିବାକୁ ଢ଼େର ସମୟ ଲାଗିଛି । ମାତ୍ର ଏଆଇ ରକେଟ୍ ଗତିରେ ବିକଶିତ ହେଉଛି । ଏହାକୁ ଡାଏନୋସର ହେବାକୁ ମାତ୍ର କିଛି ଦଶନ୍ଧି ଲାଗିବ । କେହି ଠିକ୍ ଭାବେ ଜାଣନ୍ତିନି ଯେ, ଆଗାମୀ ୨୦ ବର୍ଷରେ ଏଆଇର ଶକ୍ତି କିଭଳି ହେବ ।
ଏଆଇ ମିଛ କହିପାରେ । ଏହା ସବୁଠାରୁ ବଡ ବିପଦ । ଏହାକୁ ନେଇ ଏଆଇ ଇଞ୍ଜିନିୟର ମଧ୍ୟ ଚିନ୍ତାବ୍ୟକ୍ତ କରୁଛନ୍ତି । ଏଆଇ ଏକ ଶକ୍ତିଶାଳୀ ଟେକ୍ନୋଲୋଜି । ଖରାପ ଫାଇଦା ଲାଗି ମଣିଷ ଏହାକୁ ବ୍ୟବହାର କରିବାର ଢ଼େର ଆଶଙ୍କା ରହିଛି । ଏହା ଦ୍ୱାରା ଦୁନିଆରେ ଅସମାନତା ବୃଦ୍ଧି ହୋଇପାରେ । ଯେଉଁ ଦେଶ ଏଆଇ କ୍ଷେତ୍ରରେ ଟପ୍ରେ ରହିବ ସେ ସାରା ବିଶ୍ୱରେ ରାଜୁତି କରିବ । ବର୍ତ୍ତମାନ ଏଆଇ ରେସ୍ରେ ବିଶ୍ୱର ୨ ପ୍ରମୁଖ ଦେଶ ଆମେରିକା ଏବଂ ଚୀନ ରହିଛନ୍ତି ।
ପ୍ରଫେସର ଫରାରି ପୁଣି କହିଲେ, ଏହି ୨ ଦେଶ ନିକଟରେ ଅଧିକ ସାମରିକ ଶକ୍ତି ରହିଛି । ତେବେ ଆଗାମୀ ୫ ବର୍ଷରେ ଏଆଇ ପାରମ୍ପରିକ ସେନାକୁ ଅପ୍ରାସଙ୍ଗିକ କରିପାରେ । ଆଗକୁ ଅସ୍ତ୍ରଶସ୍ତ୍ର ସ୍ୱୟଂଚାଳିତ ହେବ । ବର୍ତ୍ତମାନର ଯୁଦ୍ଧ ବିମାନ, ଜାହାଜ ଏବଂ ଟ୍ୟାଙ୍କ କବାଡିଖାନାକୁ ଯିବ । ଏଆଇ ଦ୍ୱାରା ଅନେକ ନିଯୁକ୍ତି ଶେଷ ହୋଇଯିବ । ଏଆଇ ମଧ୍ୟ ଭଲ ବହି ଲେଖିପାରେ । ଏବେ ଜିପିଟି ଭଲ ଉତ୍ତର ବି ଲେଖୁଛି । ଏଆଇ ରହିବା ସତ୍ୱେ ବି ନିଯୁକ୍ତି ରହିବ । ମାତ୍ର ପ୍ରତିଯୋଗିତାରେ ତିଷ୍ଠି ରହିବାକୁ ହେଲେ ନିଜକୁ ଅପ୍ଡେଟ କରିବାକୁ ହେବ ।
କାରଣ ପ୍ରତି ୨ରୁ ୩ ବର୍ଷରେ ନୂଆ ଫିଲ୍ଡ ଖୋଜିବା ବଡ ଚ୍ୟାଲେଞ୍ଜ । ମାନବ ମେସିନ ପ୍ରତିଯୋଗିତା ଚିନ୍ତାଜନକ ହେବ । ଏବେ ସ୍ମାର୍ଟଫୋନରେ ଏଆଇ ଜରିଆରେ ଲୋକଙ୍କ ଉପରେ ନଜର ରଖାଯାଉଛି । ମୋବାଇଲ ଆମ ନିଷ୍ପତ୍ତିକୁ ପ୍ରଭାବିତ କରୁଛି । ଆମ ଧ୍ୟାନ କେମିତି ଆକର୍ଷଣ କରିବ ଏବଂ ସାମଗ୍ରୀ ଗୁଡିକୁ ମାର୍କେଟିଂ କରିବାରେ ଆଲ୍ଗୋରିଦିମ ବିଶେଷ ଭାବେ କାର୍ଯ୍ୟ କରୁଛି । ଯେଉଁ ଲୋକମାନେ ଦିନ ସାରା ମୋବାଇଲ ହାତରେ ସ୍କ୍ରଲ୍ କରୁଛନ୍ତି ସେମାନଙ୍କ ମୁଣ୍ଡକୁ ସ୍ମାର୍ଟଫୋନ କବଳିତ କରି ନେଇଛି ।
ସୋସିଆଲ ମିଡିଆ ବ୍ୟବହାର ନେଇ ସେ କହିଲେ, ଏବେ ସୋସିଆଲ ମିଡିଆ ଜଙ୍କ ଇନ୍ଫରମେସନ ବା ଅନାବଶ୍ୟକ ସୂଚନା ପ୍ରଦାନରେ ଏକ ବଡ ମାଧ୍ୟମ ପାଲଟିଛି । ଅଧିକ ସୁଚନାର ଅର୍ଥ ଅଧିକ ଜ୍ଞାନ ନୁହେଁ । ଏଭଳି କ୍ଷେତ୍ରରେ ଇନଫରମେସନ ଫାଷ୍ଟ ଦ୍ୱାରା ଅନାବ୍ୟଶକ ସୂଚନାକୁ ବାହାର କରିବା ଲାଗି ଧ୍ୟାନ କରିଥାଏ ।
ଏଆଇ ବିକଶିତ କରିବା ଠାରୁ ଆମେ ଜଣେ ଅନ୍ୟ ଜଣଙ୍କୁ ଭରସା କରିବା ଉପରେ ଅଧିକ ପ୍ରାଥମିକତା ଦେବା ଉଚିତ । ଏଆଇ ମଣିଷଙ୍କ ମଧ୍ୟରେ ଶାନ୍ତି ପ୍ରତିଷ୍ଠା କରିପାରିବନି । ଏବେ ଏଆଇ ବିକାଶରେ ଅଧିକ ନିବେଶ ହେଉଛି । ମାତ୍ର ସେହି ତୁଳନାରେ ମଣିଷର ବୁଦ୍ଧିମତା ଏବଂ ଶାନ୍ତି ପ୍ରତିଷ୍ଠାରେ ନିବେଶ ହେଉନି । ବଡ ଲିଡର ମାନେ ଟେକ୍ନୋଲୋଜି ବନାଇବା ଉପରେ ବେଶି ଫୋକସ କରୁଛନ୍ତି । ମାତ୍ର ଭାଇଚାରା ପ୍ରେମ ଆଦି ଲାଗି ମନ ଓ ମସ୍ତିସ୍କକୁ ବିକଶିତ କରିବା ଲାଗି ସମୟ ନାହିଁ ।
ଇସ୍ରାଏଲ ଯୁଦ୍ଧ ଉପରେ ମତ ରଖି ସେ କହିଲେ, ଇସ୍ରାଏଲ ଏବଂ ପାଲେଷ୍ଟାଇନ ଉଭୟେ ଉଭୟଙ୍କ ଅସ୍ତିତ୍ୱକୁ ସ୍ୱୀକାର କରୁନାହାନ୍ତି । ଜୀଇଁବା ଏବଂ ଅସ୍ଥିତ ନେଇ ଅଧିକାର ରହିଥିବା ଉଭୟେ ମାନିଲେ ଯାଇ ଶାନ୍ତି ପ୍ରତିଷ୍ଠା ହୋଇପାରିବ । ଏହି ୨ଟି ସତ୍ୟତା ସ୍ୱୀକାର କଲେ ଇସ୍ରାଏଲ ପାଲେଷ୍ଟାଇନ ସମସ୍ୟା ଆପେ ସମାଧାନ ହୋଇଯିବ ବୋଲି ପ୍ରଫେସର ଫରାରି ଉଲ୍ଲେଖ କରିଛନ୍ତି ।
