ନୂଆଦିଲ୍ଲୀ,୦୪/୦୭: ଆଗାମୀ ଏସିଆ କପ୍ ହକି ଏବଂ ଜୁନିୟର ପୁରୁଷ ହକି ବିଶ୍ୱକପ୍ ଭାରତ ଆୟୋଜନ କରିବ । ପାକିସ୍ତାନ ଏହି ଦୁଇ ଟୁର୍ଣ୍ଣାମେଣ୍ଟରେ ଭାଗ ନେବ କି ନାହିଁ, ସେନେଇ ଅନିଶ୍ଚିତତା ଦେଖା ଦେଇଥିଲା । ମାତ୍ର ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ, ଭାରତ ସରକାର ପ୍ରତିଯୋଗିତାରେ ଅଂଶ ଗ୍ରହଣ କରିବା ନେଇ ପାକିସ୍ତାନ ଦଳକୁ ଅନୁମତି ପ୍ରଦାନ କରିଛନ୍ତି । କିନ୍ତୁ ଏବେ କେବଳ ପାକିସ୍ତାନ ଖେଳାଳିଙ୍କ ଭିସା ଅନୁମତି ଉଭୟ କେନ୍ଦ୍ର ବୈଦେଶିକ ଓ ଗୃହ ମନ୍ତ୍ରଣାଳୟରେ ବିଚାରଧୀନ ରହିଛି । ଏସିଆ କପ୍ ବିହାରର ରାଜଗିରରେ ଏବଂ ଜୁନିୟର ହକି ବିଶ୍ୱକପ୍ ତାମିଲନାଡୁର ମଦୁରାଇରେ ଆୟୋଜିତ ହେବ ।
ଗତ ଏପ୍ରିଲ ମାସରେ ଜାମ୍ମୁ-କାଶ୍ମୀରରେ ଆତଙ୍କବାଦୀମାନେ ପର୍ଯ୍ୟଟକଙ୍କୁ ହତ୍ୟା କରିବା ପରେ ଭାରତ,ପାକିସ୍ତାନ ମଧ୍ୟରେ ସୀମାରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା । ଦୁଇ ଦେଶ ମଧ୍ୟରେ ସବୁ ପ୍ରକାର ସଂପର୍କ ଛିନ୍ନ ହୋଇଥିଲା । ତେଣୁ ଆଶା କରାଯାଉଥିଲା ଯେ ପାକିସ୍ତାନ ହୁଏତ ଭାରତ ଗସ୍ତରେ ଆସିବ ନାହିଁ । କିନ୍ତୁ ପାକିସ୍ତାନର ଆଗ୍ରହ ପରେ ଭାରତ ସରକାର ଅନୁମତି ପ୍ରଦାନ କରିଛନ୍ତି । ଆସନ୍ତା ଅଗଷ୍ଟ ୨୭ରୁ ସେପ୍ଟେମ୍ବର ୭ ତାରିଖ ପର୍ଯ୍ୟନ୍ତ ଏସିଆ କପ୍ ଖେଳାଯିବ । ସେହିପରି ନଭେମ୍ବର ୨୮ରୁ ଡିସେମ୍ବର ୧୦ ତାରିଖ ପର୍ଯ୍ୟନ୍ତ ଚେନ୍ନାଇ ଓ ମଦୁରାଇରେ ପୁରୁଷ ଜୁନିୟର ବିଶ୍ୱକପ୍ (୨୧ ବର୍ଷରୁ କମ୍ ) ଖେଳାଯିବ।
