ନୂଆଦିଲ୍ଲୀ: ମହାକାଶଚାରୀ ଶୁଭାଂଶୁ ଶୁକ୍ଳା ତାଙ୍କର ଐତିହାସିକ ଅନ୍ତର୍ଜାତୀୟ ମହାକାଶ ଷ୍ଟେସନ (ISS) ଯାତ୍ରା ପରେ ରବିବାର ଭାରତ ଫେରିବାକୁ ଯାଉଛନ୍ତି । ଭାରତରେ ପହଞ୍ଚିବା ପରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସାକ୍ଷାତ କରିବେ । ଏହା ପରେ ସେ ନିଜ ଜନ୍ମସ୍ଥାନ ଲକ୍ଷ୍ନୌ ଯାଇପାରନ୍ତି ବୋଲି କୁହାଯାଉଛି । ସେ ଅଗଷ୍ଟ ୨୨-୨୩ରେ ଜାତୀୟ ମହାକାଶ ଦିବସ ସମରୋହରେ ସାମିଲ ହେବେ ।  ଆମେରିକାରୁ ଭାରତ ଅଭିମୁଖେ ଯାତ୍ରା ସମୟରେ ଶୁଭାଂଶୁ ଶୁକ୍ଳା ଏକ ଫଟୋ ଇନଷ୍ଟାଗ୍ରାମରେ ପୋଷ୍ଟ କରିଛନ୍ତି ।

ବିମାନରେ ବସିଥିବା ଏହି ଫଟୋରେ ଶୁଭାଂଶୁ ବେଶ ଖୁସି ଥିବା ଜଣାପଡ଼ିଛି । ଶୁକ୍ଳା ପୋଷ୍ଟ କରିଛନ୍ତି, ‘ଭାରତ ଫେରିବା ପାଇଁ ବିମାନରେ ଚଢ଼ିବା ସମୟରେ ମୋ ହୃଦୟରେ ଅନେକ ଭାବନା ଉଠୁଛି। ଏହି ମିଶନ ସମୟରେ ଗତ ଗୋଟିଏ ବର୍ଷ ଧରି ମୋର ବନ୍ଧୁ ଏବଂ ପରିବାରକୁ ଛାଡି ମୁଁ ଦୁଃଖିତ । ମିଶନ ପରେ ପ୍ରଥମ ଥର ପାଇଁ ମୋର ସମସ୍ତ ବନ୍ଧୁ, ପରିବାର ଏବଂ ଦେଶବାସୀଙ୍କୁ ଭେଟିବାକୁ ମୁଁ ଉତ୍ସାହିତ । ମୁଁ ଭାବୁଛି ଏହା ହିଁ ଜୀବନ।’ 

ଏହା ସହ ସେ ଲେଖିଛନ୍ତି, ମିଶନ ସମୟରେ ଏବଂ ପରେ ସମସ୍ତଙ୍କଠାରୁ ଅବିଶ୍ୱସନୀୟ ପ୍ରେମ ଏବଂ ସମର୍ଥନ ପାଇଛି । ମୁଁ ଭାରତ ଫେରିବା ପରେ ଆପଣମାନଙ୍କ ସହିତ ମୋର ଅଭିଜ୍ଞତା ବାଣ୍ଟିବାକୁ ଅପେକ୍ଷା କରିଛି । ବିଦାୟ କହିବା କଷ୍ଟକର, କିନ୍ତୁ ଆମକୁ ଜୀବନରେ ଆଗକୁ ବଢ଼ିବାକୁ ପଡିବ । 

ଶୁଭାଂଶୁ ଶୁକ୍ଳା ପ୍ରଥମ ଭାରତୀୟ ମହାକଶଚାରୀ, ଯିଏ ଅନ୍ତର୍ଜାତୀୟ ମହାକାଶ ଷ୍ଟେସନକୁ ଯାତ୍ରା କରିଥିଲେ । ଚଳିତ ବର୍ଷ ଜୁନ ୨୫ରେ ଆକ୍ସିୟମ୍‌-୪ ମିଶନ ମାଧ୍ୟମରେ ସେ ଆଇଏସଏସ୍‌କୁ ଯାଇଥିଲେ । ସେଠାରୁ ଜୁଲାଇ ୧୫ରେ ପୃଥିବୀକୁ ପ୍ରତ୍ୟାବର୍ତ୍ତନ କରିଥିଲେ ଶୁଭାଂଶୁ ଶୁକ୍ଳା ଏବଂ ଅନ୍ୟ ସହଯୋଗୀ  । ଏହି ମିଶନ ଲାଗି ଶୁଭାଂଶୁ ଶୁକ୍ଳା ଆମେରିକାରେ ଏକ ବର୍ଷ ରହିଥିଲେ । ସଫଳତାର ସହ ମହାକାଶ ଯାତ୍ରା ସାରିବା ପରେ ଏବେ ସେ ଭାରତ ଫେରିବାକୁ ଯାଉଛନ୍ତି ।