ନୂଆଦିଲ୍ଲୀ ୨୫/୦୩: ବିବାହ ଦିନକୁ ଦିନ ଏକ ମହଙ୍ଗା ଉତ୍ସବ ହେବାରେ ଲାଗିଛି । କିନ୍ତୁ ସବୁଠୁ ଘନିଷ୍ଠ ସାଙ୍ଗର ବିବାହରେ ଯୋଗ ଦେବା ଯଦି ଖୁବ୍ ମହଙ୍ଗା ହୁଏ, ତେବେ ତାହା ଅତି ଯନ୍ତ୍ରଣାଦାୟକ ଅନୁଭବ ହୁଏ । ରେଡିଟ୍ରେ ଏକ ପୋଷ୍ଟ୍ ଭାଇରାଲ ହେଉଛି, ଯେଉଁଥିରେ ଜଣେ ମହିଳା ବର୍ଣ୍ଣନା କରିଛନ୍ତି ଯେ ତାଙ୍କର ସବୁଠୁ ନିବିଡ଼ ସାଙ୍ଗର ବିବାହରେ କନ୍ୟାସାଥୀ ହେବାକୁ ସାଙ୍ଗ ୧ ହଜାର ଡଲାର ବା ୯୦ ହଜାର ଟଙ୍କା ଦାବି କଲା । ଏହି ଅପ୍ରତ୍ୟାଶିତ ଆର୍ଥିକ ବୋଝ ସାଙ୍ଗ ବିବାହରେ ତାଙ୍କର ଭୂମିକା ଉପରେ ପ୍ରଶ୍ନ ଉଠାଇଲା ।
ପିପଲ୍ ଡଟ୍ କମ୍ର ଏକ ରିପୋର୍ଟ ଅନୁସାରେ, ନିଜର ସବୁଠୁ ଘନିଷ୍ଠ ସାଙ୍ଗ ମେଗାନଙ୍କ ବିବାହରେ ମହିଳାଙ୍କୁ ଅନ୍ୟତମ କନ୍ୟାସାଥୀ ହେବାକୁ କୁହାଗଲା । ଏହା ଶୁଣି ସେ ଖୁବ୍ ଉତ୍ସାହିତ ହୋଇଗଲେ । କାରଣ ଉଭୟଙ୍କ ବନ୍ଧୁତା ଦୀର୍ଘ ବର୍ଷ ପୁରୁଣା ଥିଲା ଏବଂ ଏଭଳି ଏକ ଖାସ୍ ମୁହୂର୍ତ୍ତର ଅଂଶ ହେବା ମହିଳାଙ୍କ ପାଇଁ ସମ୍ମାନ ଥିଲା । କିନ୍ତୁ ମେଗାନ ଯେତେବେଳେ ଖର୍ଚ୍ଚର ଏକ ସବିଶେଷ ତାଲିକା ତାଙ୍କୁ ମେଲ୍ କଲେ, ତାଙ୍କ ଖୁସି ଓ ଉତ୍ସାହ ତୁରନ୍ତ ମଉଳିଗଲା । ଏକ ବୁଟିକ୍ରୁ ନିର୍ଦ୍ଦିଷ୍ଟ ଡ୍ରେସ୍ ବାବଦକୁ ୪୧,୫୦୦ ଟଙ୍କା, କେଶସଜ୍ଜା ଓ ମେକ୍ଅପ ଖର୍ଚ୍ଚ ୨୫ ହଜାର, କନ୍ୟାର ଏକ ଉପହାର ପାଇଁ ୧୨,୫୦୦ ଟଙ୍କା, ଏକ ବିଳାସପୂର୍ଣ୍ଣ ରିସର୍ଟରେ ବ୍ୟାଚ୍ଲର ପାର୍ଟି ପାଇଁ ୮,୩୦୦ ଟଙ୍କା ଏବଂ ଅନ୍ୟାନ୍ୟ ଖର୍ଚ୍ଚ ବାବଦକୁ ୪,୧୦୦ ଟଙ୍କାର ଏକ ତାଲିକା ମେଗାନ ମହିଳାଙ୍କୁ ମେଲ୍ କରିଥିଲେ ।
ସାଙ୍ଗ ତରଫରୁ ଏଭଳି ମେଲ୍ ଦେଖି ମହିଳା ଖୁବ୍ ଦୁଃଖିତ ହେଲେ । ବିବାହରେ ବହୁତ ଖର୍ଚ୍ଚ ହୁଏ, କିନ୍ତୁ ବିବାହରେ ଯୋଗ ଦେଉଥିବା ଲୋକଙ୍କୁ ଏହି ଅର୍ଥ ମାଗିବା, ଖାସ୍କରି ନିଜର ସବୁଠୁ ଭଲ ସାଙ୍ଗକୁ ମାଗିବା ଭୁଲ ବୋଲି ସେ ଚିନ୍ତାକଲେ । ତେଣୁ ମେଗାନଙ୍କ ପାଖରେ ପହଞ୍ଚି ନିଜର ଦାୟିତ୍ୱ ଓ ଆର୍ଥିକ ସମସ୍ୟା ଯୋଗୁ ଏତେ ଅଧିକ ଟଙ୍କା ଦେଇପାରିବେ ନାହିଁ ବୋଲି ସାଙ୍ଗଙ୍କୁ ବୁଝାଇବେ ବୋଲି ସେ ଚିନ୍ତାକଲେ । କିନ୍ତୁ ମେଗାନଙ୍କଠୁ ଯେଉଁ ପ୍ରତିକ୍ରିୟା ସେ ପାଇଲେ, ତାହା କଦାପି ଆଶା କରିନଥିଲେ । ମେଗାନ ସେ ସମସ୍ତ ଖର୍ଚ୍ଚକୁ ଠିକ୍ ବୋଲି ଦର୍ଶାଇଲେ ଏବଂ ଆଜିକାଲି ବିବାହରେ ଏ ସବୁ ସାଧାରଣ କଥା ବୋଲି କହିଲେ । ଆହୁରି କହିଲେ, ଯଦି ମୋ ବିବାହରେ ତୁମେ ଏହି ଖର୍ଚ୍ଚ କରିପାରିବ ନାହିଁ, ଠିକ୍ ଅଛି, କିନ୍ତୁ ମୁଁ କାହା ପାଇଁ ମୋର ଯୋଜନାକୁ ବଦଳାଇବି ନାହିଁ । ଅତି ଘନିଷ୍ଠ ସାଙ୍ଗର ପ୍ରତିକ୍ରିୟା ମହିଳାଙ୍କୁ ଖୁବ୍ ଆଘାତ ଦେଲା । ସେ ସର୍ବଦା ମେଗାନଙ୍କୁ ସମର୍ଥନ କରିଆସିଛନ୍ତି ଏବଂ ତାଙ୍କ ସହିତ ଅଛନ୍ତି । କିନ୍ତୁ ମେଗାନଙ୍କଠୁ ଏଭଳି ଚରମ ବାଣୀର ସମ୍ମୁଖୀନ ହେବେ ବୋଲି କେବେ ଆଶା କରିନଥିଲେ ।
ଏତେ ଖର୍ଚ୍ଚ କରିପାରିବେନି ବୋଲି କହିବା ପରେ ମେଗାନ ସମ୍ପୂର୍ଣ୍ଣ ଚୁପ୍ ରହିଗଲେ, ଯାହା ମହିଳାଙ୍କ ପାଇଁ ସବୁଠୁ ଯନ୍ତ୍ରଣାଦାୟକ ଥିଲା । ଦିନେ ଦୁହିଁଙ୍କ ମଧ୍ୟରେ ଘନିଷ୍ଠ ବନ୍ଧୁତା ଥିଲା, ଏବେ ଦୁହେଁ ଅପରିଚିତ ହୋଇଗଲେ । ଏହି ସ୍ଥିତିରେ କ’ଣ କରିବା ଉଚିତ୍ ବୋଲି ମହିଳା ୟୁଜର୍ଙ୍କଠୁ ପ୍ରସ୍ତାବ ମାଗିଲେ । ଟଙ୍କା ଦେଇ ଚିନ୍ତାମୁକ୍ତ ହେବାକୁ କିଛି ତାଙ୍କୁ କହିଲେ । ଅନ୍ୟପକ୍ଷେ, ଆର୍ଥିକ ଚାପକୁ ନିଜର ନିଷ୍ପତ୍ତି ଉପରେ ଭାରି ହେବାକୁ ନ ଦେବାକୁ ଆଉ କିଛି କହିଲେ । ଏହି ଘଟଣା ବର୍ତ୍ତମାନ ବୃଦ୍ଧି ପାଉଥିବା ଅତି ମହଙ୍ଗା ବିବାହ ଟ୍ରେଣ୍ଡ୍ ଉପରେ ଆଲୋକପାତ କରିଛି । ନିବିଡ଼ ସମ୍ପର୍କ, ଖାସ୍କରି ବନ୍ଧୁତା ଉପରେ ଏହା ପ୍ରଭାବ ପକାଉଛି ।
