ନୂଆଦିଲ୍ଲୀ: ଅଷ୍ଟ୍ରିଆର ଏକ ସ୍କୁଲରେ ଆଖିବୁଜା ଗୁଳିମାଡ ହୋଇଛି। ସ୍କୁଲର ଜଣେ ଛାତ୍ର ଏହି ଗୁଳିକାଣ୍ଡ ଘଟାଇଛନ୍ତି । ଅଷ୍ଟ୍ରିଆର ଦ୍ୱିତୀୟ ବୃହତ୍ତମ ସହର ଗ୍ରାଜ୍‌ର ଏହି ସ୍କୁଲ ଅବସ୍ଥିତ । ଅଷ୍ଟ୍ରିଆର ପ୍ରେସ୍ ଏଜେନ୍ସି APA ର ରିପୋର୍ଟ ଅନୁଯାୟୀ, ଗ୍ରାଜ୍ ସହରର ମେୟର କହିଛନ୍ତି ଯେ, ଏହି ଗୁଳିକାଣ୍ଡରେ ୧୧ ଜଣଙ୍କ ମୃତ୍ୟୁ ହୋଇଛି । ଏଥି ସହିତ ୨୮ ଜଣ ଆହତ ହୋଇଛନ୍ତି । 

ସୂଚନା ଅନୁଯାୟୀ, ସ୍କୁଲର ଜଣେ ଛାତ୍ର ବନ୍ଧୁକ ଧରି ସ୍କୁଲରେ ପହଞ୍ଚିଥିଲେ ଏବଂ ଏହି ସମୟରେ ସେ ତାଙ୍କ ସାମ୍ନାରେ ଯାହାକୁ ଦେଖିଲେ ଅଚାନକ ଗୁଳି ଚଳାଇଥିଲେ। ଏହା ପରେ, ଛାତ୍ର ଜଣକ ଶୌଚାଳୟକୁ ଯାଇ ନିଜକୁ ଗୁଳି କରି ଆତ୍ମହତ୍ୟା କରିଥିଲେ। ପୋଲିସ କହିଛି ଯେ, ସେମାନେ ସକାଳ ୧୦ଟା (ସ୍ଥାନୀୟ ସମୟ) ରେ ସୂଚନା ପାଇଥିଲେ ଏବଂ କିଛି ସମୟ ପରେ ସ୍କୁଲ କୋଠା ଭିତରୁ ଗୁଳି ଫୁଟିବା ଶବ୍ଦ ଶୁଣିବାକୁ ପାଇଥିଲେ।

ସ୍ଥାନୀୟ ପୋଲିସ ଲୋକ ମାନଙ୍କୁ ସେହି ଅଞ୍ଚଳରୁ ଦୂରରେ ରହିବାକୁ ଏବଂ କର୍ତ୍ତୃପକ୍ଷଙ୍କ ନିର୍ଦ୍ଦେଶ ପାଳନ କରିବାକୁ ପରାମର୍ଶ ଦେଇଛି। ପୋଲିସ ସୋସିଆଲ ମିଡିଆ ପ୍ଲାଟଫର୍ମ X ରେ ପୋଷ୍ଟ କରିଛି ଯେ, ସ୍କୁଲକୁ ଖାଲି କରିଦିଆ ଯାଇଛି ଏବଂ ସମସ୍ତଙ୍କୁ ସୁରକ୍ଷିତ ସ୍ଥାନକୁ ନିଆଯାଇଛି। ସେ ଆହୁରି କହିଛନ୍ତି ଯେ, ପରିସ୍ଥିତି ନିୟନ୍ତ୍ରଣରେ ଅଛି ଏବଂ ବର୍ତ୍ତମାନ କୌଣସି ବିପଦ ନାହିଁ। ଅଷ୍ଟ୍ରିଆର ଗ୍ରାଜ୍ ସହର ଦେଶର ଦକ୍ଷିଣ-ପୂର୍ବରେ ଅବସ୍ଥିତ ଏବଂ ଏହାର ଜନସଂଖ୍ୟା ପ୍ରାୟ ୩ ଲକ୍ଷ । 

ରିପୋର୍ଟ ଅନୁଯାୟୀ, ଗ୍ରାଜ୍ ସହରର ମେୟର କହିଛନ୍ତି ଯେ ମୃତ୍ୟୁବରଣ କରିଥିବା ଲୋକଙ୍କ ମଧ୍ୟରେ ୯ ଜଣ ଛାତ୍ର, ଜଣେ ସ୍କୁଲ କର୍ମଚାରୀ ଏବଂ ଗୁଳି ଚଳାଇଥିବା ଜଣେ ଅପରାଧୀ ଅଛନ୍ତି। ସ୍କୁଲ ଗୁଳିକାଣ୍ଡର ତଦନ୍ତ ଦାୟିତ୍ୱ ସ୍ପେଶାଲ୍ ଟାସ୍କ ଫୋର୍ସକୁ ଦିଆଯାଇଛି। ଅଷ୍ଟ୍ରିଆର ଗୃହମନ୍ତ୍ରୀ ମଧ୍ୟ ଗ୍ରାଜ୍ ସହର ଅଭିମୁଖେ ଯାଇଛନ୍ତି।