ଟାଙ୍ଗୀ,୦୩/୧୦: ଆଧୁରା ରହିଗଲା ଜଗା ଦର୍ଶନ । ପୁରୀ ଯିବା ବେଳେ ଅଟୋକୁ ପଛପଟୁ ଧକ୍କା ଦେଲା ଅଜଣା ଗାଡି । ଏହି ଦୁର୍ଘଟଣାରେ ଜଣେ ହବିଷ୍ୟାଳିଙ୍କ ମୃତ୍ୟୁ ହୋଇଥିବା ବେଳେ ଆଉ ୬ ଜଣ ହବିଷ୍ୟାଳିଙ୍କ ସମେତ ଅଟୋ ଡ୍ରାଇଭର ଗୁରୁତର ହୋଇଛନ୍ତି । ମୃତ ହବିଷ୍ୟାଳି କୟଥପଲ୍ଲା ଗ୍ରାମର ବୃଦ୍ଧା ରେଣୁକା ଦେଇ ବୋଲି ଜଣାପଡ଼ିଛି । ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଅନ୍ତର୍ଗତ ଦୀକ୍ଷିତୀପଡା ଛକ ନିକଟରେ ଏଭଳି ଦୁର୍ଘଟଣା ଘଟିଛି ।

ସୂଚନା ମୁତାବକ, ପବିତ୍ର କାର୍ତ୍ତିକ ମାସରେ ଜଗା ଦର୍ଶନ ପାଇଁ କୟଥପଲ୍ଲା ଗ୍ରାମର ୭ ଜଣ ହବିଷ୍ୟାଳି ଏକ ଅଟୋରେ ପୁରୀ ଯାଉଥିଲେ । ହେଲେ ଜଗା ଦର୍ଶନ ପୂର୍ବରୁ ଚାଲିଗଲା ହବିଷ୍ୟାଳିଙ୍କ ଜୀବନ । ପୁରୀ ଯାଉଥିବା ବେଳେ ଏକ ଅଜଣା ଗାଡ଼ି ଅଟୋକୁ ପଛପଟୁ ଧକ୍କା ଦେଇ ଘଟଣାସ୍ଥଳରୁ ଫୋରାର ହୋଇଥିଲା । ଏହି ଦୁର୍ଘଟଣାରେ ଜଣେ ହବିଷ୍ୟାଳି ପ୍ରାଣ ହରାଇଥିବା ବେଳେ ଆଉ ୬ ଜଣଙ୍କ ସମେତ ଅଟୋ ଡ୍ରାଇଭର ମଧ୍ୟ ଗୁରୁତର ହୋଇଛନ୍ତି । ଏହା ଦେଖି ସ୍ଥାନୀୟଲୋକେ ତୁରନ୍ତ ଗୁରୁତରଙ୍କୁ ଚିକିତ୍ସା ପାଇଁ ଟାଙ୍ଗୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଇଥିଲେ । ଏହା ସହ ଘଟଣା ସମ୍ୱନ୍ଧରେ ପୋଲିସକୁ ମଧ୍ୟ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ଟାଙ୍ଗୀ ପୋଲିସ ପହଞ୍ଚି ବୃଦ୍ଧାଙ୍କ ମୃତଦେହ ଜବତ କରି ଘଟଣାର ତଦନ୍ତ ଚଳାଇଛି ।