ନୂଆଦିଲ୍ଲୀ,୦୩/୧୨: ବାଂଲାଦେଶର ହିନ୍ଦୁ ନେତା ତଥା ଇସ୍କନ ସାଧୁ ଚିନ୍ମୟକୃଷ୍ଣ ଦାସଙ୍କ ଗିରଫ ପରେ ସଂଖ୍ୟାଲଘୁ ହିନ୍ଦୁଙ୍କ ଉପରେ ବଢି ଚାଲିଛି ଅତ୍ୟାଚାର । ଯାହାକୁ ନେଇ କୋଲକାତାର ଇସ୍କନ ବାଂଲାଦେଶରେ ଥିବା ନିଜର ସହଯୋଗୀ ଏବଂ ଅନୁସରଣକାରୀଙ୍କୁ ଦେଇଛି ଖାସ ପରାମର୍ଶ । ଇସ୍କନ କୋଲକାତା କହିଛି ଯେ, ଗେରୁଆ ରଙ୍ଗର ବସ୍ତ୍ର ପିନ୍ଧିବାଠାରୁ ଦୂରେଇ ରୁହନ୍ତୁ, ତୁଳସୀ ମାଳା ଲୁଚାନ୍ତୁ, ତିଳକ ମଥାରୁ ପୋଛି ଦିଅନ୍ତୁ ଏବଂ ମୁହଁକୁ ଘୋଡାଇ ରଖନ୍ତୁ, ଯାହା ଦ୍ୱାରା ବାଂଲାଦେଶରେ ଅଶାନ୍ତି-ଝଗଡ଼ାରୁ ସୁରକ୍ଷିତ ରହିପାରିବେ ।
ଏନେଇ ଇସ୍କନ କୋଲକାତାର ଉପାଧ୍ୟକ୍ଷ ରାଧାରମଣ ଦାସ କହିଛନ୍ତି ଯେ, ସନ୍ଥ ଏବଂ ସଦସ୍ୟମାନଙ୍କୁ ମୋର ପରାମର୍ଶ ମନ୍ଦିର ଏବଂ ଘର ଭିତରେ ନିଜ ଧର୍ମ ପାଳନ କରନ୍ତୁ । ବାହାରକୁ ବାହାରିବା ସମୟରେ ଅଧିକ ସାବଧାନ ରୁହନ୍ତୁ । ସେ ଆହୁରି ମଧ୍ୟ କହିଛନ୍ତି ଯେ, ‘ମୁଁ ସମସ୍ତ ସନ୍ଥ ଏବଂ ସଦସ୍ୟଙ୍କୁ ପରାମର୍ଶ ଦେଉଛି , ଏହି ସଂକଟ ମୁହୂର୍ତ୍ତରେ ନିଜ ସୁରକ୍ଷା ପାଇଁ ସାବଧାନ ରୁହନ୍ତ ଏବଂ ସଂଘର୍ଷଠାରୁ ଦୂରେଇ ରୁହନ୍ତୁ । ମୁଁ ସେମାନଙ୍କୁ ଗେରୁଆ ବସ୍ତ୍ର ପିନ୍ଧିବା ଏବଂ ମଥାରେ ତିଳକ ଲଗାଇଠାରୁ ଦୂରେଇ ରହିବାକୁ ପରାମର୍ଶ ଦେଉଛି । ଯଦି ଗେରୁଆ ବସ୍ତ୍ର ପିନ୍ଧିବାର ଆବଶ୍ୟକତା ରହୁଛି, ତେବେ ଏହି ବସ୍ତ୍ରକୁ ଭିତରେ ଲୁଚାଇ ପିନ୍ଧ । ଯାହାକି ବେକ ପର୍ଯ୍ୟନ୍ତ ନ ଦେଖାଯିବା ଆବଶ୍ୟକ । ଯଦି ସମ୍ଭବ ହେଉଛି ତେବେ ନିଜ ମୁଣ୍ଡକୁ ଘୋଡାଇ ବୁଲନ୍ତୁ । ଏପରି କରନ୍ତୁ, ଯେପରି ଆପଣ ସାଧୁ ଦେଖାଯିବେନି ।’ଏହି ସମୟରେ ବାଂଲାଦେଶରେ ଆମକୁ ସୁରକ୍ଷିତ ରହିବାକୁ ପଡିବ । ହିନ୍ଦୁ ନେତା ଓ ଇସ୍କନ ସଦସ୍ୟ ଚିନ୍ମୟ ଦାସଙ୍କୁ ଦେଶଦ୍ରୋହୀ ଭାବେ ଗିରଫ ପରେ ଇସ୍କନର ସାଧୁମାନଙ୍କ ଉପରେ ଆକ୍ରମଣ ହେଉଛି। ସେମାନଙ୍କୁ ଔଷଧ ଦେବାକୁ ଯାଇଥିବା ୨ ଜଣ ସାଧୁଙ୍କୁ ମଧ୍ୟ ଗିରଫ କରାଯାଇଛି ।
