ଅସ୍ତରଙ୍ଗ, ୨୬/୦୫: ଓଡ଼ିଶାରେ ଆୟୁଷ୍ମାନ୍ ଭାରତ ଯୋଜନା କାର୍ଯ୍ୟକାରୀକୁ ଦେଢ଼ ମାସ ବିତିଲାଣି । ହେଲେ ଅସ୍ତରଙ୍ଗ ବ୍ଲକ୍ରେ ଏ ପର୍ଯ୍ୟନ୍ତ ପ୍ରଥମ ପର୍ଯ୍ୟନ୍ତ କାର୍ଡ ବଣ୍ଟନ ଶେଷ ହୋଇନି । ଯାହାକୁ ନେଇ ସ୍ଥାନୀୟ ଲୋକଙ୍କ ଭିତରେ ଅସନ୍ତୋଷ ପ୍ରକାଶ ପାଇଛି ।
କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଜେ.ପି ନଡ୍ଡା ଓ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏପ୍ରିଲ୍ ୧୧ରେ "ଆୟୁଷ୍ମାନ୍ ଭାରତ' ଯୋଜନାର ଶୁଭାରମ୍ଭ କରିଥିଲେ । ଆଭାସୀ ଜରିଆରେ ସାରା ରାଜ୍ୟରେ ଏହାର ଉଦ୍ଘାଟନ ହୋଇଥିଲା । ଅସ୍ତରଙ୍ଗ ବ୍ଲକ୍ର ଖଣ୍ଡାସାହି ଓ ରତନପୁରରେ ଏହି ଯୋଜନାର ଶୁଭାରମ୍ଭ କରାଯାଇଥିଲା । ବ୍ଲକ୍ର ୭୩ ହଜାର ୫ ଶହ ୨୮ ଜଣ ହିତାଧିକାରୀଙ୍କୁ ସାମିଲ କରାଯାଇଥିବା ବେଳେ ପ୍ରଥମ ପର୍ଯ୍ୟାୟରେ ୩୫ ହଜାର ୮ ଶ ହ ୮୪ କାର୍ଡ ଆସିଛି । କିନ୍ତୁ ଦେଢ଼ ମାସ ବିତି ଯାଇଥିଲେ ମଧ୍ୟ ଅଧିକାଂଶ ହିତାଧିକାରୀଙ୍କୁ ଏ ପର୍ଯ୍ୟନ୍ତ କାର୍ଡ ମିଳି ନଥିବା ଅଭିଯୋଗ ହୋଇଛି ।
ସ୍ୱାସ୍ଥ୍ୟ ଓ ଭିଏଲ୍ଇ କର୍ମୀମାନେ ଘର ଘର ବୁଲି ଏହି କାର୍ଡ ବାଣ୍ଟିବାକୁ ନିର୍ଦ୍ଦେଶ ଦିଆଯାଇଛି । ହିତାଧିକାରୀଙ୍କ ଇ-କେୱାଇସି କରି ଏହାକୁ ପ୍ରଦାନ କରିବାକୁ କୁହାଯାଇଛି । ମେ ୨୨ ସୁଦ୍ଧା ମାତ୍ର ୨୦ ହଜାର ୬୨ ଜଣ ହିତାଧିକାରୀଙ୍କୁ କାର୍ଡ ବଣ୍ଟନ କରାଯାଇଥିବା ସୂଚନା ମିଳିଛି । ଏବେ ଦ୍ୱିତୀୟ ପର୍ଯ୍ୟାୟ ଆୟୁଷ୍ମାନ୍ ଭାରତ କାର୍ଡ ଦେବାକୁ ସରକାର ପ୍ରସ୍ତୁତ ହେଉଛନ୍ତି । କିନ୍ତୁ ପ୍ରଥମ ପର୍ଯ୍ୟାୟ କାର୍ଡର ଇ-କେୱାଇସି ଶେଷ ହୋଇନି । ଫଳରେ ସରକାରଙ୍କ ଏହି ମହତ ଜନକଲ୍ୟାଣକାରୀ ଯୋଜନାର ସଫଳ ରୂପାୟନ ନେଇ ସନ୍ଦେହ ପ୍ରକାଶ ପାଇଛି ।
ଏନେଇ ଅସ୍ତରଙ୍ଗ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଅଧିକାରୀ ଡ. ସଞ୍ଜୟ ପ୍ରଧାନ କହିଛନ୍ତି, କାର୍ଡ ଗୁଡ଼ିକର ଇ-କେୱାଇସି କରିବା ପାଇଁ ଦାୟିତ୍ୱ ନେଇଥିବା ଭିଏଲଇମାନେ ଠିକ୍ ଭାବେ ସହଯୋଗ କରୁନାହାନ୍ତି । ଯେଉଁଥିପାଇଁ ଏପରି ସମସ୍ୟା ସୃଷ୍ଟି ହୋଇଛି । ଏନେଇ ଜିଲ୍ଲାସ୍ତରରେ ଅଭିଯୋଗ କରାଯାଇଥିବା ସେ କହିଛନ୍ତି ।
କମନ ସର୍ଭିସ୍ ସେଣ୍ଟର ଜିଲ୍ଲା ମ୍ୟାନେଜର ସୁନୀଲ ସାହୁ କହିଛନ୍ତି, ଅଳ୍ପ କିଛି ଜାଗାରେ କାର୍ଡ ପହଞ୍ଚିନି । ଆମେ ତୁରନ୍ତ ବାଣ୍ଟିବା କାର୍ଯ୍ୟ ଜାରି ରଖିଛୁ ।
