ନୂଆଦିଲ୍ଲୀ,୧୯/୦୮: ସବୁ କଳ୍ପନାଜଳ୍ପନାର ଅନ୍ତ । ମାନସ-ମନ୍ଥନ ପରେ ଉପରାଷ୍ଟ୍ରପତି ନିର୍ବାଚନ ପାଇଁ ପ୍ରାର୍ଥୀ ଘୋଷଣା କରିଛି ଇଣ୍ଡିଆ ବ୍ଲକ୍ । ସୁପ୍ରିମକୋର୍ଟ ପୂର୍ବତନ ଜଜ୍ ବି.ସୁଦର୍ଶନ ରେଡ୍ଡିଙ୍କ ନାମରେ ମୋହର ମାରିଛନ୍ତି ବିରୋଧୀ ଦଳ । ଏଆଇସିସି ସଭାପତି ମଲ୍ଲିକାର୍ଜୁନ ଖଡଗେ ତାଙ୍କ ନାଁ ଘୋଷଣା କରିଛନ୍ତି । ସୁପ୍ରିମକୋର୍ଟରେ ବିଚାରପତି ଭାବେ କାର୍ଯ୍ୟ କରିଥିଲେ ସୁଦର୍ଶନ ରେଡ୍ଡୀ । ଏବେ 'ଇଣ୍ଡି' ମେଣ୍ଟର ଉପରାଷ୍ଟ୍ରପତି ପ୍ରାର୍ଥୀ ହୋଇଛନ୍ତି ଅବସରପ୍ରାପ୍ତ ଜଷ୍ଟିସ୍ ସୁଦର୍ଶନ ରେଡ୍ଡୀ । ଉପରାଷ୍ଟ୍ରପତି ନିର୍ବାଚନରେ ଦକ୍ଷିଣ ବନାମ ଦକ୍ଷିଣ ଲଢେଇ ହେବ । ଏନ୍ଡିଏ ପ୍ରାର୍ଥୀ ସିପି ରଧାକୃଷ୍ଣନ ବନାମ ବି.ସୁଦର୍ଶନ ରେଡ୍ଡିଙ୍କ ମଧ୍ୟରେ ହେବ ଟକ୍କର ।
ଉପରାଷ୍ଟ୍ରପତି ପ୍ରାର୍ଥୀ ଘୋଷଣା କରି ଏଆଇସିସି ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ କହିଛନ୍ତି, ''ଅଗଷ୍ଟ ୨୧ରେ ନାମାଙ୍କନ ଭରିବେ ବି. ସୁଦର୍ଶନ । ଏହି ଉପ-ରାଷ୍ଟ୍ରପତି ପ୍ରତିଯୋଗିତା ଏକ ଆଦର୍ଶଗତ ଯୁଦ୍ଧ, ଏବଂ ସମସ୍ତ ବିରୋଧୀ ଦଳ ଏଥିରେ ସହମତ । ଏହି କାରଣରୁ ଆମେ ବି.ସୁଦର୍ଶନ ରେଡ୍ଡୀଙ୍କୁ ମିଳିତ ପ୍ରାର୍ଥୀ ଭାବରେ ମନୋନୀତ କରିଛୁ । ସେ ଆମ ପାଇଁ କେତେ ଗୁରୁତ୍ୱପୂର୍ଣ୍ଣ ତାହା ପୂର୍ବରୁ ଜୟରାମ ରମେଶ କହିସାରିଛନ୍ତି । ମୁଁ କିଛି ଅଧିକ କହିବାରୁ ଚାହୁଁନାହିଁ ବୋଲି ମଲ୍ଲିକା ଅର୍ଜୁନ ଖଡଗେ କହିଛନ୍ତି । ଗତକାଲି ଅପରାହ୍ନ ୧ଟାରେ ସବୁ ବିରୋଧୀ ଦଳ ସଦସ୍ୟ ଓ ସାଂସଦଙ୍କୁ ନେଇ ଏକ ବୈଠକ ହୋଇଥିଲା । ଆମ ଆଦମୀ ପାର୍ଟି ସମେତ ସମସ୍ତ ବିରୋଧୀ ଦଳ ଙ୍କ ସମର୍ଥନ ରହିଛି ।''
ବି. ସୁଦର୍ଶନ ରେଡ୍ଡୀ କିଏ ? ବି. ସୁଦର୍ଶନ ରେଡ୍ଡୀ ୨୦୦୭ ରୁ ୨୦୧୧ ପର୍ଯ୍ୟନ୍ତ ସୁପ୍ରିମକୋର୍ଟ ବିଚାରପତି ଥିଲେ। ୧୯୪୬ ମସିହାରେ ଜନ୍ମଗ୍ରହଣ କରିଥିବା ସୁଦର୍ଶନ ରେଡ୍ଡୀଙ୍କ ପ୍ରାରମ୍ଭିକ ଶିକ୍ଷା ଆନ୍ଧ୍ରରେ ହୋଇଥିଲା । ରେଡ୍ଡୀ ଓସମାନିଆ ବିଶ୍ୱବିଦ୍ୟାଳୟରୁ ଆଇନ ଡିଗ୍ରୀ ହାସଲ କରିଥିଲେ । ଏହା ପରେ ସେ ଜଣାଶୁଣା ଆଇନଜୀବୀ ପ୍ରତାପ ରେଡ୍ଡୀଙ୍କ ଅଧୀନରେ କାମ କରିବା ଆରମ୍ଭ କରିଥିଲେ । ଅଗଷ୍ଟ ୧୯୮୮ ମସିହାରେ ରେଡ୍ଡୀଙ୍କୁ ହାଇକୋର୍ଟରେ ସରକାରୀ ଓକିଲ ଭାବରେ ନିଯୁକ୍ତ କରାଯାଇଥିଲା ।
୧୯୯୩ ମସିହାରେ ରେଡ୍ଡୀଙ୍କୁ ଆନ୍ଧ୍ରପ୍ରଦେଶର ଅତିରିକ୍ତ ବିଚାରପତି ଭାବରେ ନିଯୁକ୍ତ କରାଯାଇଥିଲା । ୨୦୦୫ ମସିହାରେ ରେଡ୍ଡୀଙ୍କୁ ଗ୍ୱାହାଟି ହାଇକୋର୍ଟର ମୁଖ୍ୟ ବିଚାରପତି କରାଯାଇଥିଲା । ୨୦୦୭ ମସିହାରେ ରେଡ୍ଡୀ ସୁପ୍ରିମକୋର୍ଟରେ ପହଞ୍ଚିଥିଲେ । ୨୦୧୩ ତାଙ୍କୁ ଗୋଆର ଲୋକାୟୁକ୍ତ ଭାବରେ ନିଯୁକ୍ତ କରାଯାଇଥିଲା ।
ବି. ସୁଦର୍ଶନ ବନାମ ସିପି ରାଧାକ୍ରିଷ୍ଣନ- ଜଗଦୀପ ଧନଖଡ଼ଙ୍କ ଇସ୍ତଫା ପରେ ଖାଲି ପଡିଛି ଉପରାଷ୍ଟ୍ରପତି ପଦ । ଦେଶର ଦ୍ବିତୀୟ ସର୍ବୋଚ୍ଚ ପଦ ପାଇଁ ଆସନ୍ତା ସେପ୍ଟେମ୍ବରରେ ନିର୍ବାଚନ ଅନୁଷ୍ଠିତ ହେବ । ଏନ୍ଡିଏ ସି.ପି ରାଧାକ୍ରିଷ୍ଣନଙ୍କୁ ପ୍ରାର୍ଥୀ କରିଛି । ସେହିପରି ବିରୋଧୀ ବି. ସୁଦର୍ଶନ ରେଡ୍ଡୀଙ୍କୁ ମୈଦାନକୁ ଓହ୍ଲାଇଛି । ତେବେ ଦୁଇ ଦକ୍ଷିଣ ଭାରତୀୟଙ୍କ ମଧ୍ୟରେ ଟକ୍କର ହେବ ।
