ପୁରୀ,୫/୦୬: ସରିଲା ଆଡ଼ପମଣ୍ଡପ ଲୀଳା । ଭାଇ, ଭଉଣୀଙ୍କୁ ଧରି ବାହୁଡ଼ିବେ କାଳିଆ ସାଆନ୍ତେ । ବାହୁଡ଼ା ଯାତ୍ରା ପାଇଁ ଶରଧାବାଲିରେ ଅପେକ୍ଷରେ ତିନି ରଥ । ହେରାପଞ୍ଚମୀରେ ମହାଲକ୍ଷ୍ମୀ ଗୁଣ୍ଡିଚା ମନ୍ଦିର ଆସି ଫେରିଗଲା ପରେ ମହାପ୍ରଭୁ ଶ୍ରୀମନ୍ଦିରକୁ ଫେରିଯିବାକୁ ମନ ବଳାଇଛନ୍ତି । ଦଶମୀ ତିଥିରେ ଦାରୁଦିଅଁ ବଡ଼ଦେଉଳ ଅଭିମୁଖେ ପ୍ରତ୍ୟାବର୍ତ୍ତନ କରିବେ।
ଶୁକ୍ରବାର ରାତିରୁ ଶ୍ରୀଗୁଣ୍ଡିଚା ମନ୍ଦିରରେ ପ୍ରସ୍ତୁତି ଚାଲିଛି। ବାହୁଡ଼ାରେ ପ୍ରାତଃ ୪ଟାରେ ମଙ୍ଗଳା ଆଳତି ବଢ଼ିବା ପରେ ସୂର୍ଯ୍ୟପୂଜା ସରିଛି। ଦ୍ୱାରପାଳ ପୂଜା ଓ ବେଶଶେଷ ସହ ଗୋପାଳବଲ୍ଲଭ ବଢ଼ି ଓ ସକାଳ ଧୂପରେ ପୂଜାପଣ୍ଡା ସାଆନ୍ତେ ଠାକୁରମାନଙ୍କୁ ଖେଚୁଡି ଭୋଗ ଅର୍ପଣ କରିବେ । ଦଇତାପତିମାନେ ୧୧ଟା୩୦ମିନିଟ୍ ସୁଦ୍ଧା ଶ୍ରୀବିଗ୍ରହମାନଙ୍କର ସେନାପଟା ଲାଗି କରିବେ । ୧୧ଟା୪୫ମିନିଟ୍ରେ ଠାକୁରଙ୍କ ୩ବାଡରେ ମଙ୍ଗଳାର୍ପଣ ନୀତି ଅନୁଷ୍ଠିତ ହେବ । ପରେ ମୁଦିରସ୍ତ ସେବକମାନେ ଡୋରଲାଗି ଓ ପୁଷ୍ପାଞ୍ଜଳି ନୀତି ବଢାଇବା ପରେ ଠାକୁରମାନଙ୍କ ପହଣ୍ଡି ବିଜେ ଆରମ୍ଭ ହେବ । ଘଣ୍ଟ ଓ ପଖଉଜର ପାରମ୍ପରିକ ବାଦ୍ୟର ତାଳେ ତାଳେ ଠାକୁରମାନେ ଧାଡି ପହଣ୍ଡିରେ ଆସି ରଥ ଉପରେ ବିଜେ ହେବେ । ୧୨ଟାରୁ ପହଣ୍ଡି ଆରମ୍ଭ ହୋଇ ସାଢ଼େ ୨ଟା ସୁଦ୍ଧା ସରିବ ପହଣ୍ଡି । ସାଢ଼େ ୩ଟା ସୁଦ୍ଧା ଗଜପତି ମହାରାଜ ରଥମାନଙ୍କରେ ଛେରା ପହଁରା କରିବେ । ଏହାପରେ ଚାରମାଳ ଫିଟାଯାଇ ଘୋଡା ଲାଗିବ । ଅପରାହ୍ନ ୪ଟାରେ ରଥଟଣା ଆରମ୍ଭ ହେବ।
ମାଉସୀ ମାଙ୍କ ମନ୍ଦିର ନିକଟରେ ରଥ ପହଞ୍ଚିଲା ପରେ ଠାକୁରେ ମା ଅର୍ଦ୍ଧାଶିନୀଙ୍କ ଠାରୁ ପୋଡ଼ପିଠା ଗ୍ରହଣ କରିବେ । ବିଜେ ପଥରେ ବିଭିନ୍ନ ଧାର୍ମିକ ଅନୁଷ୍ଠାନ ଓ ବ୍ୟକ୍ତି ବିଶେଷଙ୍କ ପକ୍ଷରୁ ଠାକୁରଙ୍କୁ ପନ୍ତି ଭୋଗ ଅର୍ପଣ କରାଯିବ । ନନ୍ଦିଘୋଷ ଶ୍ରୀନହର ସମ୍ମୁଖରେ ପହଞ୍ଚିଲେ ନାରାୟଣଙ୍କ ସହିତ ମା’ଲକ୍ଷ୍ମୀ ଠାକୁରାଣୀଙ୍କ ଭେଟ ହେବ । ପାଲିଙ୍କିରେ ବିଜେ ହୋଇ ଠାକୁରାଣୀ ସେବକମାନଙ୍କ ଗହଣରେ ଆସି ପତିଦେବଙ୍କ ନନ୍ଦିଘୋଷ ରଥ ନିକଟରେ ବିଜେ ହେବେ । ଠାକୁରଙ୍କୁ ପୂଜା, ଆଳତୀ ଓ ବନ୍ଦାପନା କରାଯାଇ ଦହିପଟି ମଣୋହି କରାଯିବ । ପାଲିଙ୍କିରେ ଠାକୁରାଣୀ ନନ୍ଦିଘୋଷ ରଥକୁ ପରିକ୍ରମା କରିବେ । ରଥଗୁଡିକ ଶ୍ରୀମନ୍ଦିର ସିଂହଦ୍ୱାରଠାରେ ପହଞ୍ଚିବାପରେ ରଥରେ ଅନ୍ୟାନ୍ୟ ନୀତି ହେବ ।
୬ତାରିଖ ରବିବାର ସିଂହଦ୍ୱାର ଠାରେ ଦିଅଁ ମାନଙ୍କ ସୁନାବେଶ ସହ ହରିଶୟନ ନୀତି ଅନୁଷ୍ଠିତ ହେବ । ୭ତାରିଖ ସୋମବାର ଠାକୁରଙ୍କ ରଥଉପରେ ଅଧରନୀତି ଓ ଶ୍ରୀଗରୁଡ଼ ଶୟନ ନୀତି ହେବ । ୮ତାରିଖ ମଙ୍ଗଳବାର ନୀଳାଦ୍ରି ବିଜେ ଅବସରରେ ଶ୍ରୀବିଗ୍ରହମାନେ ଶ୍ରୀମନ୍ଦିର ରତ୍ନସିଂହାସନରେ ବିଜେ ହେବେ ।
ଶୁକ୍ରବାର ଆଡ଼ପ ମଣ୍ଡପରେ ପ୍ରାୟ ୩ ଲକ୍ଷ ଶ୍ରଦ୍ଧାଳୁ ମହାପ୍ରଭୁଙ୍କ ସନ୍ଧ୍ୟା ଦର୍ଶନ ପାଇଛନ୍ତି । ଦିନ ତମାମ ପାଗ ମେଘୁଆ ଥିଲା । କିଛି ସମୟ ଝିପିଝିପି ବର୍ଷିଥିଲା । ଏଣୁ ଥଣ୍ଡା ପାଗରେ ଭକ୍ତମାନେ ବେଶ୍ ଆନନ୍ଦରେ ଶରଧାବାଲିରେ ପହଞ୍ଚି ବ୍ୟାରିକେଡରେ ଲମ୍ୱା ଧାଡ଼ିରେ ଅପେକ୍ଷା କରୁଥିଲେ । ନୃସିଂହ ମନ୍ଦିର ନିକଟସ୍ଥ ଉତ୍ତରଦ୍ୱାର ଦେଇ ସେବାୟତ ପରିବାର ଦର୍ଶନକୁ ଯାଇଥିଲେ । ନୀତି ସହଳ ହୋଇ ଅନ୍ନ ମହାପ୍ରସାଦ ବାହାରିବାରେ ଦର୍ଶନ ସମେତ ଆଡ଼ପ ଅବଢ଼ା ପାଇବାର ସୌଭାଗ୍ୟ ମିଳିଥିଲା । ବଡ଼ ଆନନ୍ଦରେ ଜନ୍ମବେଦୀରେ ଚତୁର୍ଦ୍ଧାମୂର୍ତ୍ତିଙ୍କ ଦର୍ଶନ କରି ଆନନ୍ଦବଜାର ହୋଇ ନାକଚଣା ଦ୍ୱାରବାଟେ ଶରଧାବାଲିକୁ ଆସୁଥିଲେ ଭକ୍ତ । ରଥାରୂଢ ହୋଇ ସାତ ମୂର୍ତ୍ତି ଶ୍ରୀମନ୍ଦିରକୁ ବାହୁଡ଼ି ଯିବେ । ବାହୁଡ଼ାଯାତ୍ରା ପାଇଁ ପୂର୍ବ ନିର୍ଦ୍ଧାରିତ ପହଣ୍ଡି ଆରମ୍ଭ ସମୟ ୧୨ଟା ରହିଥିବା ସ୍ଥଳେ ରଥ ଟଣା ସମୟ ରହିଛି ଅପରାହ୍ନ ୪ଟା । ବାହୁଡ଼ା ନୀତି ସହଳ କରିବାକୁ ପ୍ରଶାସକ ଓ ସେବକଙ୍କ ଭିତରେ ଚାଲିଛି ସଜବାଜ । ସନ୍ଧ୍ୟା ଦର୍ଶନରେ ପୂର୍ବ ନିର୍ଦ୍ଧାରିତ ସମୟଠାରୁ ଶୁକ୍ରବାର ନୀତି ପ୍ରାୟ ଦେଢ଼ ଘଣ୍ଟା ଆଗୁଆ ରହିଛି । ବାହୁଡ଼ାରେ ସ୍ଥିରୀକୃତ ସମୟର ଯଥେଷ୍ଟ ପୂର୍ବରୁ ଠାକୁରଙ୍କ ପହଣ୍ଡି କରିବାକୁ ପ୍ରସ୍ତୁତି ଚାଲିଥିବା ସୂଚନା ମିଳୁଛି ।
ବାହୁଡ଼ା ଯାତ୍ରା ପାଇଁ ଶ୍ରୀଗୁଣ୍ଡିଚାରେ ଯାନବାହନ ଲାଗି ଯେଉଁ କଟକଣା ଥିଲା ତାହା ଅପରିବର୍ତ୍ତିତ ରହିଛି । ପାସ୍ ଥିବା ଗାଡ଼ିକୁ ମାଳତିପାଟପୁରଠାରୁ ସିଧା ଯିବାକୁ ଦିଆଯିବ । ଉକ୍ତ ଗାଡ଼ିଗୁଡ଼ିକ ବୀରହରେକୃଷ୍ଣପୁରରୁ ବାଇପାସ୍ରେ ଛଡ଼ାଯିବ । ବିନା ପାସ୍ଧାରୀ ସମସ୍ତ ଯାନକୁ ମାଳତିପାଟପୁରଠାରୁ ଆର୍ଓବି ଦେଇ ଗ୍ରିଡ ଷ୍ଟେସନ ଛକରୁ ତାଳବଣିଆରେ ପାର୍କିଂକୁ ଯିବେ । ୨୧ଟି ସ୍ଥାନରେ ପାର୍କିଂ ବ୍ୟବସ୍ଥା କରାଯାଇଛି। ସେଠାରେ ପୁଲିସ କର୍ମଚାରୀମାନେ ଉପସ୍ଥିତ ରହି ଶୃଙ୍ଖଳିତ ଭାବେ ଗାଡ଼ିଗୁଡ଼ିକୁ ପାର୍କିଂ କରାଇବେ । ଅତ୍ୟଧିକ ଭିଡ଼ ପରିଲକ୍ଷିତ ହେଲେ ଟ୍ରାଫିକ କଟକଣା ପରିବର୍ତ୍ତନ କରାଯିବ । ଜଣେ ଶ୍ରଦ୍ଧାଳୁ କିଭଳି ଟ୍ରାଫିକକୁ ହଇରାଣ ହରକତ ନ ହେବ ତାହା ଉପରେ ଗୁରୁତ୍ୱ ଦିଆଯାଇଛି । ମୋଟ ୨୦୫ ପ୍ଲାଟୁନ୍ ଫୋର୍ସ ମୁତୟନ କରାଯାଇଥିବା ବେଳେ ସେଥିରୁ ୫୦ ପ୍ଲାଟୁନ୍ ଟ୍ରାଫିକ୍ ଡ୍ୟୁଟି କରିବେ । ରଥ ସୁରକ୍ଷାରେ ୬ ଆଇପିଏସ୍ଙ୍କୁ ନିୟୋଜିତ କରାଯାଇଛି ।
