ପୁରୀ,୦୨/୦୭: ଘୋଷ ଯାତ୍ରାରେ ବଡ଼ଦାଣ୍ଡରେ ତିନି ରଥ ଟଣା ହୋଇ ଗୁଣ୍ଡିଚା ଘର ସମ୍ମୁଖରେ ପହଞ୍ଚିଥିଲା । ଏଣିକି ଠାକୁରଙ୍କ ବାହୁଡ଼ା ଯାତ୍ରାର ପ୍ରସ୍ତୁତି । ଶରଧାବାଲିରେ ବୁଧବାର ରଥ ଦକ୍ଷିଣ ମୋଡ଼ ଅନୁଷ୍ଠିତ ହେବ । ଏଣୁ ଦଣିକ୍ଷ ମୋଡ଼ ପୂର୍ବରୁ ମଙ୍ଗଳବାର ତିନି ରଥ ଯାଞ୍ଚ କରାଯାଇ ଆବଶ୍ୟକ ମରାମତି କରାଯାଇଛି । ତାଳଧ୍ୱଜ ରଥର ୩ଟି ଚକରେ ୪ଟି ଲେଖା ପ୍ଲେଟ୍ ଲାଗିଛି । ଏଥିସହ ନନ୍ଦିଘୋଷ ରଥର ନାହାକା ଅଖରେ କ୍ଲାମ୍ପ ଲାଗିଛି । ସେହିଭଳି ଦେବଦଳନ ରଥର ସ୍ଥିତି ପରଖି ଆବଶ୍ୟକ ମରାମତି ହୋଇଛି ।
ରଥ ଦକ୍ଷିଣ ମୋଡ଼ରେ ଶ୍ରୀଗୁଣ୍ଡିଚା ଘର ସିଂହଦ୍ୱାର ସମ୍ମୁଖରୁ ରଥତ୍ରୟ ଟଣା ହୋଇ ନାକଚଣା ଦ୍ୱାରକୁ ଆସିବ । ଏଣୁ ଆଜି ବିଶ୍ୱକର୍ମା, ଭୋଇ ସେବକ, କମାର ସେବକ, ଇଂଜିନିୟରଙ୍କ ଉପସ୍ଥିତିରେ ରଥ ଯାଞ୍ଚ କାର୍ଯ୍ୟ ସମ୍ପନ୍ନ ହୋଇଥିଲା । ପ୍ରଶାସନିକ ଧାର୍ଯ୍ୟ ସମୟ ଅନୁସାରେ ଠାକୁରଙ୍କ ରଥ ଆଜ୍ଞାମାଳ ବିଜେ ରହିଛି ସାଢ଼େ ୧୨ଟାରେ । ଏପଟେ ଦକ୍ଷିଣ ମୋଡ଼ ପାଇଁ ଶରଧାବାଲିରେ ବାଲି ପକାଯାଇଛି। ରଥ ମୋଡ଼ ନେବାରେ ରାସ୍ତାରେ ପଡ଼ିଥିବା ବାଲି ସାହାଯ୍ୟ କରେ । ବହୁ ମୋଡ଼ ଖାଇ ରଥତ୍ରୟ ଆଗପଛ ହୋଇ ନାକଚଣା ଦ୍ୱାରେ ପହଞ୍ଚି ଥାଏ । ଦକ୍ଷିଣ ମୋଡ଼ ଅବସରରେ ପ୍ରଥମେ ଦେବଦଳନ, ପରେ ତାଳଧ୍ୱଜ ଓ ଶେଷରେ ନନ୍ଦିଘୋଷ ରଥ ଟଣାଯିବ । ଆସନ୍ତା ୫ ତାରିଖ ଶନିବାର ବାହୁଡ଼ା ଯାତ୍ରାରେ ଗୁଣ୍ଡିଚା ଘରୁ ଶ୍ରୀମନ୍ଦିରକୁ ବାହୁଡ଼ିବେ ରଥାରୂଢ ଠାକୁରେ । ଦକ୍ଷିଣ ମୋଡ଼ ପରେ ବାହୁଡ଼ା ପୂର୍ବରୁ ପୁଣି ତିନି ରଥର ସ୍ଥିତି ଯାଞ୍ଚ ହେବ ବୋଲି ଶ୍ରୀମନ୍ଦିର ବରିଷ୍ଠ ତତ୍ତ୍ୱାବଧାରକ ସୁଦର୍ଶନ ମେକାପ କହିଛନ୍ତି ।
ନନ୍ଦିଘୋଷ ଭାଙ୍ଗିଲେ ରାଗରୋଷରେ ଜର୍ଜରିତ ମା’ଲକ୍ଷ୍ମୀ ଠାକୁରାଣୀ, ମହାପ୍ରଭୁଙ୍କ ଆଜ୍ଞାମାଳ ପାଇ ଫେରିଲେ
