ଭୁବନେଶ୍ୱର/ନୂଆଦିଲ୍ଲୀ,୦୪/୦୮: ଆଜି ବଳଙ୍ଗା ପୀଡ଼ିତଙ୍କୁ ଦିଆଯିବ ଶେଷ ବିଦାୟ। ପୈତୃକ ଗାଁ ବାୟାବରରେ ସମୂହ ପ୍ରାର୍ଥନା ପରେ ପୀଡ଼ିତାଙ୍କୁ କବର ଦିଆଯିବ। ଏଥିପାଇଁ ସମସ୍ତ ବ୍ୟବସ୍ଥା କରାଯାଇଛି। ବାୟାବରରେ ପୁଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି ।
ରବିବାର ରାତି ପ୍ରାୟ ୧୧ଟା ୧୫ ବେଳକୁ ଦିଲ୍ଲୀରୁ ଆସିଥିବା ବିମାନରେ ତାଙ୍କ ମରଶରୀର ପହଞ୍ଚିଥିଲା । ପୀଡ଼ିତାଙ୍କ ଶେଷ ଦର୍ଶନ ପାଇଁ ବିମାନବନ୍ଦରରେ ନେତାମାନେ ଭିଡ଼ ଲଗାଇଥିଲେ । କାନ୍ଦବୋବାଳିରେ ଫାଟି ପଡୁଥିଲା ପୂରା ଅଞ୍ଚଳ । ସମସ୍ତେ ଦୁଃଖୀ ଓ ଭାବବିହ୍ୱଳ ହୋଇ ତାଙ୍କୁ ବିଦାୟ ଜଣାଉଥିଲେ । ଉତ୍ତେଜନା ଆଶଙ୍କାରେ ବିମାନବନ୍ଦରକୁ ପୁଲିସ ଛାଉଣି କରାଯାଇଥିଲା । ପ୍ରାୟ ୬ ପ୍ଲାଟୁନ ପୁଲିସ ଫୋର୍ସ ମୁତୟନ ହୋଇଥିଲେ ।
ଦିଲ୍ଲୀ ଏମ୍ସରେ ଶବ ବ୍ୟବଚ୍ଛେଦ ପରେ ପୀଡ଼ିତାଙ୍କ ମୃତଦେହ ବିମାନବନ୍ଦର ଅଣାଯାଇଥିଲା । ଇଣ୍ଡିଗୋ ବିମାନ ଯୋଗେ ତାଙ୍କ ମରଶରୀର ଭୁବନେଶ୍ୱର ଆସିଥିଲା । ବିଜେପି, ବିଜେଡି ଓ କଂଗ୍ରେସ ସମେତ ବିଭିନ୍ନ ରାଜନୈତିକ ଦଳର ନେତା ଓ କର୍ମୀ ବିମାନବନ୍ଦରରେ ପହଞ୍ଚିଥିଲେ । ରାତିରେ ବିମାନବନ୍ଦର ଲୋକାରଣ୍ୟ ପାଲଟି ଯାଇଥିଲା । ସଂଖ୍ୟାଲଘୁ ସଂପ୍ରଦାୟର ଅନେକ ନେତା ରୀତି ଅନୁସାରେ ତାଙ୍କ ପାଇଁ ପ୍ରାର୍ଥନା କରିଥିଲେ ।
ବଳଙ୍ଗା ପୀଡ଼ିତାଙ୍କ ମୃତ୍ୟୁକୁ ନେଇ ଶାସକ ଦଳ ଓ ବିରୋଧୀ ଦଳ ଭିତରେ ବୟାନବାଜି ଜାରି ରହିଛି । ଏଥିପାଇଁ ପୁଲିସ ପକ୍ଷରୁ ବିମାନବନ୍ଦରରେ କଡ଼ା ସୁରକ୍ଷା ବ୍ୟବସ୍ଥା ହୋଇଥିଲା । ପୁଲିସ ମରଶରୀରକୁ କର୍ଡନ କରି ନେଇଥିଲା । ମରଶରୀରକୁ ବିଏମ୍ସି ମହାଯାତ୍ରା ଗାଡ଼ିରେ ବିମାନବନ୍ଦରରୁ ସିଧା ପିପିଲି ବଳଙ୍ଗାର ବାୟାବର ଗାଁକୁ ନିଆଗଲା । ସୋମବାର ସମୂହ ପ୍ରାର୍ଥନା ପରେ ତାଙ୍କର ଶେଷକୃତ୍ୟ ସମ୍ପନ୍ନ ହେବ ବୋଲି ସ୍ଥାନୀୟ ସୂତ୍ରରୁ ସୂଚନା ମିଳିଛି ।
ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା, ସ୍ୱାସ୍ଥ୍ୟ ମନ୍ତ୍ରୀ ମୁକେଶ ମହାଲିଙ୍ଗ, ପିପିଲି ବିଧାୟକ ଆଶ୍ରିତ ପଟ୍ଟନାୟକ, ଏକାମ୍ର ଭୁବନେଶ୍ୱର ବିଧାୟକ ବାବୁ ସିଂ ଓ ବିଜେପି ନେତା ସମୀର ଦାଶ ବିମାନବନ୍ଦରରେ ପୀଡ଼ିତାଙ୍କ ଶେଷଦର୍ଶନ କରିବା ସହ ଶ୍ରଦ୍ଧାଞ୍ଜଳି ଜଣାଇଥିଲେ । ପୀଡ଼ିତାଙ୍କ ବାପାଙ୍କୁ ଭେଟି ସମବେଦନା ଜଣାଇଥିଲେ । ବିଜେଡି ନେତା ସଞ୍ଜୟ ଦାସବର୍ମା, ରୁଦ୍ର ମହାରଥୀ, ଲେଖାଶ୍ରୀ ସାମନ୍ତସିଂହାର, ଉମାକାନ୍ତ ସାମନ୍ତରାୟ, ପ୍ରଦୀପ ମାଝୀ, ବିଧାୟକ ସୁଶାନ୍ତ ରାଉତ ଓ କଂଗ୍ରେସ ନେତା ପ୍ରସାଦ ହରିଚନ୍ଦନ ପ୍ରମୁଖ ପୀଡ଼ିତାଙ୍କ ଶେଷଦର୍ଶନ କରିଥିଲେ ।
ରବିବାର ସକାଳୁ ଦିଲ୍ଲୀ ଏମ୍ସରେ ବଳଙ୍ଗା ପୀଡ଼ିତାଙ୍କ ଶବ ବ୍ୟବଚ୍ଛେଦ ହୋଇଥିଲା । ତାଙ୍କ ପରିବାର ଲୋକଙ୍କ ସହ ଓଡ଼ିଶା ଭବନର ବରିଷ୍ଠ ଅଧିକାରୀମାନେ ସେଠାରେ ଉପସ୍ଥିତ ଥିଲେ । ଆଜି ଶବ ବ୍ୟବଚ୍ଛେଦ ପୂର୍ବରୁ ପୀଡ଼ିତାଙ୍କ ବାପା କହିଥିଲେ, ଝିଅ ଯିବା ପରେ ସମସ୍ତେ ବହୁ ଦୁଃଖରେ ଅଛୁ । ଆମେ କାହାକୁ ଦୋଷ ଦେବାକୁ ଚାହୁଁନୁ । ଚିକିତ୍ସାରେ କୌଣସି ଅବହେଳା ହୋଇନି । ମୁଁ ଭାବୁଛି ଝିଅ ଆମ ଭାଗ୍ୟରେ ନ ଥିଲା । ଆମେ କାହାକୁ ଦୋଷ ଦେବାକୁ ଚାହୁଁନୁ ।
