ଭୁବନେଶ୍ଵର, ୨୯/୦୭ : ବଳଙ୍ଗା ନାବାଳିକାଙ୍କୁ ଜାଳିଦେବା ମାମଲା। ସୋମବାର ସନ୍ଧ୍ୟାରେ ଦିଲ୍ଲୀ ଏମ୍ସରେ ହୋଇଛି ପୀଡ଼ିତାଙ୍କ ବୟାନ ରେକର୍ଡ। ପୁରୀ ଡିଏସପି, ବଳଙ୍ଗା ଥାନା ଅଧିକାରୀ ଦିଲ୍ଲୀ ଏମ୍ସରେ ୩୦ ମିନିଟରୁ ଅଧିକ ସମୟ ଧରି ପୀଡିତାଙ୍କ ବୟାନ ରେକର୍ଡ କରିଥିଲେ। ଏହାର ସମ୍ପୂର୍ଣ୍ଣ ଭିଡିଓ ରେକର୍ଡ କରାଯାଇଛି। ଆଜି ମଧ୍ୟ ଓଡ଼ିଶା ଫେରିବା ପୂର୍ବରୁ ପୁଣି ଏମ୍ସ ଯାଇ ପୀଡ଼ିତାଙ୍କୁ କିଛି ସମୟ ପଚାର ଉଚରା କରିବ ପୁଲିସ। ତେବେ ପୀଡ଼ିତାଙ୍କର ୩ ଥର ବୟାନ ରେକର୍ଡ ସରିଲାଣି। ୩ ଥର ସମାନ ଉତ୍ତର ସହିତ ସମାନ କଥା କହିଛନ୍ତି ପୀଡ଼ିତା। ଆଜି ଶେଷ ଥର ପାଇଁ ପୀଡ଼ିତାଙ୍କୁ ଭେଟି କିଛି ଗୁରୁତ୍ୱପୂର୍ଣ୍ଣ ଆଲୋଚନା କରି ଫେରିବ ବଳଙ୍ଗା ପୁଲିସ।
ସେପଟେ ଗତକାଲି ପୀଡ଼ିତାଙ୍କ ୩ୟ ଥର ଲାଗି ଅସ୍ତ୍ର ପ୍ରଚାର ସରିଛି। ପୀଡ଼ିତାଙ୍କ ପରିବାରକୁ ପୁଲିସ୍ ପ୍ରଶାସନ ପକ୍ଷରୁ ସୁରକ୍ଷା ବ୍ୟବସ୍ଥା ଯୋଗାଇ ଦିଆଯାଇଛି। ଘର ଆଗରେ ୨୪ ଘଣ୍ଟିଆ ପୁଲିସ୍ ମୁତୟନ କରାଯାଇଛି। ଏଥିପାଇଁ ବଳଙ୍ଗା ଥାନା ପକ୍ଷରୁ ୬ଜଣ କର୍ମଚାରୀ ନିୟୋଜିତ ହୋଇଛନ୍ତି। ପ୍ରତ୍ୟେକ ୮ ଘଣ୍ଟାରେ ୨ଜଣ ପୁଲିସ୍ କର୍ମଚାରୀ ନାବାଳିକାଙ୍କ ଘର ସମ୍ମୁଖରେ ଜଗି ରହିଥିବା ଦେଖିବାକୁ ମିଳିଛି । ପୂର୍ବରୁ ପୀଡ଼ିତାଙ୍କୁ ଉଦ୍ଧାର କରିଥିବା ତେରହଳ ଗ୍ରାମର ଦୁଃଖିଶ୍ୟାମ ସେନାପତିଙ୍କୁ ପୁଲିସ ସୁରକ୍ଷା ଯୋଗାଇ ଦିଆଯାଇଥିଲା । ଏହି ମାମଲାକୁ ୧୧ଦିନ ପୂରିଛି। ଇତିମଧ୍ୟରେ ପୁଲିସ୍ ଅନେକ ଲୋକଙ୍କୁ ଥାନାକୁ ଡାକି ପଚରାଉଚରା କରିଛି । ୪ଜଣ ସାକ୍ଷୀଙ୍କ ନିମାପଡ଼ା କୋର୍ଟରେ ବୟାନ ରେକର୍ଡ କରାଯାଇଛି। ଖୁବ୍ଶୀଘ୍ର ଏହି ମାମଲାର ପୁଲିସ୍ ପର୍ଦ୍ଦାଫାସ୍ କରିବ ବୋଲି ଶୁଣିବାକୁ ମିଳୁଛି।
