କଟକ,୦୯/୧୧: ଦୁଇ ମିନିଟ୍ ଝୁଲିରେ ଦୁଇ ହଜାର ଟଙ୍କା ଜିତିବେ । ଏହି ଖବର ଶୁଣିବା ପରେ ଏହାକୁ ଦେଖିବା ପାଇଁ ଝୁଲା ଆଗରେ ଯାତ୍ରୀଙ୍କ ଭିଡ଼ ଲାଗିରହିଛି । ବାଲିଯାତ୍ରାରେ ଏଭଳି ଏକ ପ୍ରତିଯୋଗିତା ଦେଖିବାକୁ ମିଳିଛି ତଳ ପଡ଼ିଆରେ । ନୟାଗଡ଼ ଜିଲ୍ଲାର ଜଣେ ଯୁବ ବ୍ୟବସାୟୀ ଦୁଇଟି ବାଉଁଶ ମଝିରେ ଏକ ଲୁହାର ମୋଟା ବାର୍କୁ ଖଞ୍ଜିଛନ୍ତି । ବାର୍ଟି ମେସିନ୍ ସାହାଯ୍ୟରେ ବୁଲୁଛି । ଆଉ ଏହି ବାର୍କୁ ଧରି ଦୁଇ ମିନିଟ୍ ଓହଳି ରହିବାକୁ ପଡ଼ିବ । ଏହି କୌତୂହଳ ଖେଳ ଖେଳିବାକୁ ଲୋକମାନେ ମଧ୍ୟ ବେଶ୍ ଉତ୍ସାହର ସହିତ ଝୁଲା ଆଗରେ ଭିଡ଼ ଲଗାଇଛନ୍ତି । ପ୍ରଥମେ ଶହେ ଟଙ୍କା ଟିକେଟ କିଣି ଦୁଇ ମିନିଟ ଓହଳି ପାରିଲେ ୫ ଶହ ଟଙ୍କା ମିଳିବ । ସେହିପରି ଦୁଇ ଶହ ଟଙ୍କା ଟିକେଟ କିଣି ଦୁଇ ମିନିଟ ଓହଳି ପାରିଲେ ଦୁଇ ହଜାର ଟଙ୍କା ମିଳିବ ।
ଏ ସଂପର୍କରେ ବ୍ୟବସାୟୀ ଜଣଙ୍କ କହିଛନ୍ତି, ଏହାକୁ "ଦୁଇ ମିନିଟ ଓହଳିବା ପ୍ରତିଯୋଗିତା’ କୁହାଯାଉଛି । ପ୍ରଥମ ଥର ପାଇଁ ଏହାକୁ ମୁଁ ବାଲିଯାତ୍ରାକୁ ଆଣିଛି । ବାହାର ରାଜ୍ୟ ଓ ଦେଶରେ ଏହି ଝୁଲା ମେଳା ଓ ଯାତ୍ରାମାନଙ୍କରେ ପଡ଼େ । ଆଉ ମୋର ଜଣେ ସାଙ୍ଗ ମୋତେ ଏହି ବ୍ୟବସାୟ କରିବାକୁ କହିଥିଲା । ଏବେ ମୁଁ ଏହି ବେପାର ଆରମ୍ଭ କରିଛି । ଏପର୍ଯ୍ୟନ୍ତ ୫ ଜଣ ଲୋକ ଓହଳି ଟଙ୍କା ଜିତି ସାରିଲେଣି ।
ମେଳାରେ ଏହି ନୂଆ ଧରଣର ପ୍ରତିଯୋଗିତାରେ ଅଂଶ ଗ୍ରହଣ କରି ଟଙ୍କା ପୁରସ୍କାର ପାଇବା ଲୋଭରେ ଯୁବବର୍ଗ ଟିକେଟ୍ କିଣିବାକୁ ଗହଳି କରୁଥିବା ଦେଖିବାକୁ ମିଳିଛି ।
