କଟକ ୧୨/୧୧: ଚଳିତବର୍ଷ ବାଲିଯାତ୍ରାରେ ମୁଖ୍ୟ ଆକର୍ଷଣ ହେବ ଓଡ଼ିଆ ଚଳଚ୍ଚିତ୍ର ଦୁନିଆ । କଟକ ଇନ୍ କଟକ ଭିତରେ ଓଡ଼ିଆ ଚଳଚ୍ଚିତ୍ରର କ୍ରମବିକାଶକୁ ନେଇ ପ୍ରସ୍ତୁତ ହେଉଛି ଏକ ସୁନ୍ଦର ପରିବେଶ । ପୁରୁଣା କ୍ଲାସିକ୍ ଓଡ଼ିଆ ଚଳଚ୍ଚିତ୍ରର କିଛି ସ୍ମୃତିକୁ ନେଇ କଟକ ଇନ୍ କଟକକୁ ନୂଆ ରୂପ ଦିଆଯାଉଛି ।
ପ୍ରଥମ ଓଡ଼ିଆ ଚଳଚ୍ଚିତ୍ର ‘ସୀତାବିବାହ’ରୁ ଆଗକୁ ପ୍ରାୟ ୫୦ବର୍ଷ ପର୍ଯ୍ୟନ୍ତର ବିଭିନ୍ନ ହିଟ୍ ଚଳଚ୍ଚିତ୍ରର କିଛି ସ୍ମୃତିଚିହ୍ନକୁ ନେଇ ବିଭିନ୍ନ ଜୋନ୍ କରାଯାଇଛି । ଯେଉଁଥିରେ ଜାତୀୟ ପୁରସ୍କାରପ୍ରାପ୍ତ ଚଳଚ୍ଚିତ୍ର ସୀତାବିବାହ, ମାୟାମିରିଗ, ଗପ ହେଲେ ବି ସତ ଚଳଚ୍ଚିତ୍ରର ଏକ କର୍ଣ୍ଣର କରାଯାଇଥିବା ବେଳେ କଟକର ଦିବଂଗତ ସିନେ ପ୍ରତିଭାମାନଙ୍କୁ ନେଇ ଏକ ଜୋନ୍ ନିର୍ମାଣ କରାଯାଇଥିବା ଦେଖିବାକୁ ମିଳିଛି । ଏକ ଆମ୍ପି ଥିଏଟର୍ କଟକ ଇନ୍ କଟକ ଭିତରେ କରାଯିବ । ଯେଉଁଥିରେ ଦର୍ଶକ ପୁରୁଣା ଓଡ଼ିଆ ଚଳଚ୍ଚିତ୍ର ଦେଖିବାକୁ ସୁଯୋଗ ପାଇବେ । ଏହା ସମ୍ପୂର୍ଣ୍ଣ ମାଗଣା ରହିବ ବୋଲି ଜଣାପଡିଛି । ଏଥିରେ ବହୁ ପୁରୁଣା ଓଡ଼ିଆ ଚଳଚ୍ଚିତ୍ର ପ୍ରଦର୍ଶିତ ହେବ । ସେହିପରି କାରାଓକେ ବ୍ୟବସ୍ଥା ବି ଏଠାରେ ଉପଲବ୍ଧ ରହିବ । ଅର୍ଥାତ୍ ଓଡ଼ିଆ ଗୀତଗୁଡିକର କେବଳ ଧୂନ୍ଗୁଡିକ ଏଠାରେ ରହିଥିବ । ମାଇକ୍ ଯୋଗେ ଧୂନ୍କୁ ବ୍ୟବହାର କରି ବାଲିଯାତ୍ରା ବୁଲିବାକୁ ଆସୁଥିବା ଲୋକେ ନିଜେ ସେହି ଗୀତ ବୋଲିପାରିବେ ।
