ନୂଆଦିଲ୍ଲୀ,୧୮।୧: ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହାସିନା କ୍ଷମତାଚ୍ୟୁତ ହେବା ନେଇ ଗମ୍ଭୀର ଅଭିଯୋଗ କରିଛନ୍ତି। ସେ କହିଛନ୍ତ, ତାଙ୍କୁ ଓ ତାଙ୍କର ସାନ ଭଉଣୀ ଶେଖ ରେହାନାଙ୍କୁ ମାରିବାକୁ ଷଡଯନ୍ତ୍ର ହୋଇଥିଲା। ବାଂଲାଦେଶ ଆଓ୍ବାମୀ ଲିଗ୍ ପାର୍ଟିର ଫେସବୁକ୍ ପେଜ୍ରେ ଶୁକ୍ରବାର ବିଳମ୍ବିତ ରାତିରେ ପୋଷ୍ଟ କରାଯାଇଥିବା ଅଡିଓ ଭାଷଣରେ ସେ ଏହି କଥା କହିଛନ୍ତି। ସେ କହିଛନ୍ତି, ରେହାନା ଓ ମୁଁ ଅଳ୍ପକେ ବଞ୍ଚିଗଲୁ। ମାତ୍ର ୨୦-୨୫ ମିନିଟ୍ ଭିତରେ ଆମର ଜୀବନ ବଞ୍ଚିଗଲା।’ ଉଲ୍ଲେଖନୀୟ ଯେ, ଗତ ବର୍ଷ ଅଗଷ୍ଟରେ ଛାତ୍ରଙ୍କ ନେତୃତ୍ବରେ ଜୋରଦାର ଆନ୍ଦୋଳନ ହୋଇଥିଲା। ସପ୍ତାହେ ପର୍ଯ୍ୟନ୍ତ ଚାଲିଥିବା ବିରୋଧ ପ୍ରଦର୍ଶନ ପରେ ବାଂଲାଦେଶର ତତ୍କାଳୀନ ପ୍ରଧାନମନ୍ତ୍ରୀ ଶେଖ ହାସିନାଙ୍କୁ ପଦଚ୍ୟୁତ କରାଯାଇଥିଲା। ଏହି ସମୟରେ ହୋଇଥିବା ହିଂସାରେ ୬୦୦ରୁ ଅଧିକ ଲୋକଙ୍କ ଜୀବନ ଯାଇଥିଲା।
୭୬ ବର୍ଷୀୟ ଶେଖ ହାସିନା ବାଂଲାଦେଶରୁ ପଳାୟନ କରି ଭାରତ ଚାଲିଆସିଥିଲେ। ନୋବେଲ ପୁରସ୍କାର ବିଜେତା ମହମ୍ମଦ ୟୁନୁସଙ୍କ ନେତୃତ୍ବରେ ବାଂଲାଦେଶରେ ଅନ୍ତରୀଣ ସରକାର ଗଠନ ହୋଇଥିଲା। ଶେଖ ହାସିନା ପୂର୍ବ ଦିନ ଗୁଡିକୁ ମନେପକାଇ କହିଛନ୍ତି ମାତେ ମାରିବାକୁ ବହୁବାର ଷଡଯନ୍ତ୍ର ହୋଇଥିଲା। ମୋତେ ଲାଗୁଛି ସବୁଥର ହତ୍ୟା ଷଡଯନ୍ତ୍ରରୁ ଆଲ୍ଲାହ ରକ୍ଷା କରିଛନ୍ତି। କାରଣ ସେ ଚାହାନ୍ତି ମୁଁ କିଛି କରେ। ତେବେ ମୁଁ ଏବେ ପୀହିତ। ନିଜ ଦେଶ ଓ ଘର ବିନା ବଞ୍ଚୁଛି। ସବୁକିଛି ଜଳିପୋଡ଼ି ଛାରଖାର ହୋଇଗଲା।’
ଉଲ୍ଲେଖନୀୟ ଯେ, ୨୧ ଅଗଷ୍ଟ ୨୦୦୪ ରେ ବଙ୍ଗବନ୍ଧୁ ଏଭିନ୍ୟୁରେ ଆବାମୀ ଲିଗ୍ ପକ୍ଷରୁ ଆୟୋଜିତ ଆତଙ୍କବାଦ ବିରୋଧି ରାଲିରେ ଗ୍ରେନେଡ୍ ବ୍ଲାଷ୍ଟ ହୋଇଥିଲା। ଏଥିରେ ୨୪ ଜଣଙ୍କର ମୃତ୍ୟୁ ହୋଇଥିଲା ଓ ୫୦୦ରୁ ଅଧିକ ଆହତ ହୋଇଥିଲେ। ଏହି ବିସ୍ଫୋରଣ ସନ୍ଧ୍ୟା ୫ଟା ୨୨ ମିନିଟ୍ରେ ହୋଇଥିଲା ଯେତେବେଳେ ତତ୍କାଳୀନ ବିରୋଧି ନେତା ଶେଖ ହାସିନା ଟ୍ରକ୍ ପଛରେ ୨୦,୦୦୦ ଲୋକଙ୍କ ଭିଡ଼କୁ ସମ୍ବୋଧିତ କରୁଥିଲେ। ଏହି ବିସ୍ଫୋରଣରେ ହାସିନା ଆହତ ହୋଇଥିଲେ। ସେଭଳି କୋଟଲିପାରା ବମ୍ ବିସ୍ଫୋରଣ ହାସିନାଙ୍କୁ ମାରିବାକୁ ଆଉ ଏକ ଷଡଯନ୍ତ୍ର ହୋଇଥିଲା।