ନୂଆଦିଲ୍ଲୀ: ରବିବାର ବାଂଲାଦେଶ ହାଇକୋର୍ଟ ଏକ ଇଞ୍ଜିନିୟରିଂ ବିଶ୍ୱବିଦ୍ୟାଳୟର ୨୦ ଜଣ ଛାତ୍ରଙ୍କ ମୃତ୍ୟୁଦଣ୍ଡକୁ କାଏମ ରଖିଛନ୍ତି। ୨୦୧୯ ମସିହାରେ ଅନ୍ୟ ଜଣେ ଛାତ୍ରଙ୍କୁ ପିଟି ପିଟି ହତ୍ୟା କରିବା ମାମଲାରେ ଟ୍ରାଏଲ୍ କୋର୍ଟ ଅଭିଯୁକ୍ତ ଛାତ୍ର ମାନଙ୍କୁ ମୃତ୍ୟୁଦଣ୍ଡ ଦେଇଥିଲେ।

କୋର୍ଟ ଅଧିକାରୀ ମାନେ କହିଛନ୍ତି ଯେ, ବିଚାରପତି ଏକେଏମ୍ ଅସଦୁଜ୍ଜମାନ ଏବଂ ବିଚାରପତି ସୟଦ ଇନାୟତ ହୁସେନଙ୍କ ଖଣ୍ଡପୀଠ ମୃତ୍ୟୁଦଣ୍ଡର ବାଧ୍ୟତାମୂଳକ ନିଶ୍ଚିତକରଣ ଏବଂ ନିମ୍ନ ଅଦାଲତର ରାୟ ବିରୁଦ୍ଧରେ ଦୋଷୀଙ୍କ ଆବେଦନ ଉପରେ ଶୁଣାଣି ସମାପ୍ତ କରି ଏକତ୍ର ରାୟ ପ୍ରଦାନ କରିଛନ୍ତି। ସମସ୍ତ ଦୋଷୀ ବାଂଲାଦେଶ ୟୁନିଭରସିଟି ଅଫ୍ ଇଞ୍ଜିନିୟରିଂ ଆଣ୍ଡ୍ ଟେକ୍ନୋଲୋଜି (BUET)ର ଛାତ୍ର ଥିଲେ ଏବଂ ବାଂଲାଦେଶ ଛାତ୍ର ଲିଗ୍ (BCL) ସହିତ ଜଡିତ ଥିଲେ। ବିସିଏଲକୁ ଏବେ ଭାଙ୍ଗି ଦିଆଯାଇଛି। ଏହା ବହିଷ୍କୃତ ପ୍ରଧାନମନ୍ତ୍ରୀ ଶେଖ ହାସିନାଙ୍କ ଦଳ ଆୱାମୀ ଲିଗର ଛାତ୍ର ଶାଖା ଥିଲା।

ଅଭିଯୁକ୍ତ ମାନେ ୭ ଅକ୍ଟୋବର ୨୦୧୯ରେ ବିୟୁଇଟି ଇଲେକ୍ଟ୍ରିକାଲ୍ ଆଣ୍ଡ୍ ଇଲେକ୍ଟ୍ରୋନିକ୍ସ ବିଭାଗର ଦ୍ୱିତୀୟ ବର୍ଷର ଛାତ୍ର ଅବରାର ଫହାଦଙ୍କୁ ସରକାରଙ୍କୁ ସମାଲୋଚନା କରି ଏକ ଫେସବୁକ୍ ପୋଷ୍ଟକୁ ନେଇ ହତ୍ୟା କରିଥିଲେ। ତଦନ୍ତରୁ ଜଣାପଡିଛି ଯେ ତାଙ୍କୁ ୨୫ ଜଣ ସାଥୀ ଛାତ୍ର ପ୍ରାୟ ଛଅ ଘଣ୍ଟା ଧରି କ୍ରିକେଟ୍ ବ୍ୟାଟ୍ ଏବଂ ଅନ୍ୟାନ୍ୟ ଧାରୁଆ ଜିନିଷରେ ପିଟିଥିଲେ। ଫହାଦର ହତ୍ୟା ପରେ, BUET ଏବଂ BCL ଉଭୟ ଅଭିଯୁକ୍ତ ଛାତ୍ରମାନଙ୍କୁ ତୁରନ୍ତ ବହିଷ୍କାର କରିଥିଲେ। ଢାକାର ଏକ କୋର୍ଟ ଡିସେମ୍ବର ୮, ୨୦୨୧ରେ ୨୦ ଜଣ ଦୋଷୀଙ୍କୁ ମୃତ୍ୟୁଦଣ୍ଡ ଦେଇଥିଲା । ସେତେବେଳେ ଆୱାମୀ ଲିଗ୍ କ୍ଷମତାରେ ଥିଲା।