ଧଉଳି,୨୬/୦୧: ବିନା ପାସ୍ପୋର୍ଟରେ ଅନୁପ୍ରବେଶ କରିଥିବା ଜଣେ ବାଂଲାଦେଶୀ ମହିଳାଙ୍କୁ ଧଉଳି ଥାନା ପୁଲିସ ଲିଙ୍ଗିପୁର ଅଞ୍ଚଳରୁ ଗିରଫ କରିଛି । ଗିରଫ ବାଂଲାଦେଶୀ ମହିଳା ଜଣଙ୍କ ହେଲେ ନୁପୁର ଶର୍ମା । ତାଙ୍କୁ କୋର୍ଟଚାଲାଣ କରାଯାଇଥିଲା । ଜାମିନ ନାମଞ୍ଜୁର ହେବାରୁ ଝାରପଡ଼ା ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି ।
ପୁଲିସ ସୂଚନା ଅନୁଯାୟୀ, ମହିଳାଙ୍କ ଆଧାର କାର୍ଡରେ ନାମ ସୁପି ବେଗମ ଥିବାବେଳେ ଘର ଠିକଣା ପଶ୍ଚିମବଙ୍ଗ ରହିଛି । ତେବେ ଏହି ଆଧାର କାର୍ଡ ନକଲି ବୋଲି ଜଣାପଡ଼ିଛି । ୨ ଜଣ ଦଲାଲଙ୍କ ସହଯୋଗରେ ସେ ବାଂଲାଦେଶରୁ ବିନା ପାସ୍ପୋର୍ଟରେ ଅନୁପ୍ରବେଶ କରି ପଶ୍ଚିମବଙ୍ଗରେ ପହଞ୍ଚି ଥିଲେ । ସେଠାରୁ ଭୁବନେଶ୍ୱରକୁ ଏକ ମସାଜ ସେଣ୍ଟରରେ କାମ କରିବାକୁ ଆସିଥିଲେ । ହେଲେ କୌଣସି ଏକ ମାମଲାରେ କଟକ ପୁଲିସ ରେଡ୍ କରିବା ସମୟରେ ମହିଳା ଜଣଙ୍କ ପୁଲିସ ହାବୁଡ଼ରେ ପଡିଯାଇଥିଲେ । ଉଦ୍ଧାର ବେଳେ ସେ ତାଙ୍କ ବାସସ୍ଥାନ ପ୍ରମାଣପତ୍ର ସ୍ୱରୂପ ଆଧାରକାର୍ଡ ଦେଖାଇଥିଲେ । ଆଧାରକାର୍ଡରେ ଥିବା ନାଁ ଓ ଠିକଣାକୁ ନେଇ ପୁଲିସର ସନ୍ଦେହ ହୋଇଥିଲା । ପୁଲିସ ଅଧିକ ତଥ୍ୟ ପାଇବା ନିମନ୍ତେ ତାଙ୍କୁ ପଚରାଉଚରା କରିଥିଲା । ପରେ ସେ ନକଲି ଆଧାର କାର୍ଡ ଓ ବିନା ପାସପୋର୍ଟରେ ବାଂଲାଦେଶରୁ ଭୁବନେଶ୍ୱର ଆସିଥିବା ଜଣାପଡ଼ିଥିଲା
