କଟକ,୨୮/୦୪: ପ୍ରବଳ ଗ୍ରୀଷ୍ମ ପ୍ରବାହ ସାଙ୍ଗକୁ ଅସହ୍ୟ ଗୁଳୁଗୁଳି । ଦିନ ତାପମାତ୍ରା ପ୍ରାୟ ୫୦ ଡିଗ୍ରୀ ଭଳି ଅନୁଭୂତ ହେଉଛି । ଆଉ କଲବଲ କରୁଥିବା ଏହି ଟାଣ ଖରା ପାଇଁ ହଠାତ୍ ମଦ ଦୋକାନରେ ‘ବିୟର୍’ ବିକ୍ରି ବଢ଼ିଯାଇଛି । ଚିଲ୍ଡ୍ ବା ଥଣ୍ଡା ବିୟର୍ ପିଇବାକୁ ସବୁ ମଦ ଦୋକାନରେ ଗହଳି ବାର୍ରେ ବସିବାକୁ ଜାଗା ମିଳୁନି । କଟକ ସହର ଓ ଏହାର ଆଖପାଖରେ ଚାହିଦା ଅଧିକ ଥିବାରୁ ଡିପୋରେ ମଧ୍ୟ ପର୍ଯ୍ୟାପ୍ତ ଷ୍ଟକ୍ ରଖାଯାଉଛି । ଅବକାରୀ ବିଭାଗ ତଥ୍ୟ କହୁଛି, ମାର୍ଚ୍ଚ ମାସରୁ ଖରା ବଢ଼ିବା ପରେ ଇତିମଧ୍ୟରେ କଟକରେ ପ୍ରାୟ ୪୦ ଲକ୍ଷ ଲିଟର ବିୟର୍ ବିକ୍ରି ହୋଇଗଲାଣି । ଖାଲି ସେତିକି ନୁହେଁ, ଗତ ଆର୍ଥିକ ବର୍ଷରେ କଟକ ଜିଲ୍ଲାରେ ରେକର୍ଡ ପରିମାଣର ୧ କୋଟି ୩୧ ଲକ୍ଷ ଲିଟର ବିୟର୍ ପିଇଛନ୍ତି ଲୋକେ ।
ଗତ ଆର୍ଥିକ ବର୍ଷ ୨୦୨୪- ୨୫ରେ ସାଧାରଣ ନିର୍ବାଚନ ହୋଇଥିଲା । ଖରାରେ ଅର୍ଥାତ୍ ଏପ୍ରିଲ୍ ଓ ମେ’ ମାସରେ ଜିଲ୍ଲାରେ ନିର୍ବାଚନୀ ହାୱା ବହୁଥିଲା । ତେଣୁ ଉକ୍ତ ଦୁଇ ମାସରେ ପ୍ରାୟ ୩୦ ଲକ୍ଷ ଲିଟର ବିୟର୍ କଟକ ଜିଲ୍ଲାରେ ବିକ୍ରି ହୋଇଥିଲା । ତେବେ ଚଳିତ ବର୍ଷ ହେଉଥିବା ଖରାଠାରୁ ଗତବର୍ଷ ସାମାନ୍ୟ କମ୍ ଥିଲା । ତଥାପି ନିର୍ବାଚନ ବେଳେ ଲୋକ ଚଳପ୍ରଚଳ ଅଧିକ ଥିବାରୁ ବିୟର୍ ବିକ୍ରିର ମାତ୍ରା ମଧ୍ୟ ଅଧିକ ରହିଥିବା କୁହାଯାଉଛି । ପରେ ମେ’ ଓ ଜୁନ୍ରେ ମଧ୍ୟ ପ୍ରାୟ ୩୨ ଲକ୍ଷ ଲିଟର ବିୟର୍ ବିକ୍ରି ହୋଇଥିଲା । ଆଉ ଅବକାରୀ ବିଭାଗର ଆର୍ଥିକ ବର୍ଷ ତଥ୍ୟ କହୁଛି, ୨୦୨୪ ଏପ୍ରିଲ୍ ୧ ତାରିଖରୁ ୨୦୨୫ ମାର୍ଚ୍ଚ ୩୧ ତାରିଖ ମଧ୍ୟରେ ୧ କୋଟି ୩୧ ଲକ୍ଷ ୩୮ ହଜାର ୪୦୬ ଲିଟର ବିୟର୍ ବିକ୍ରି ହୋଇଛି । ଏହାକୁ ବୋତଲ ଓ ଟିଣ କେନ୍ରେ ହିସାବ କଲେ ପ୍ରାୟ ୨ କୋଟି ବୋତଲ ଓ ଟିଣ ପ୍ୟାକ୍ ବିକ୍ରି ହୋଇଥିବା ଅବକାରୀ ବିଭାଗ ସୂଚନା ଦେଇଛି ।
ଏପରିକି ଅଲମ୍ପିକ୍ ଖେଳରେ ସୁଇମିଂ ବା ପହଁରା ପାଇଁ ତିଆରି କରାଯାଉଥିବା ବଡ଼ ସୁଇମିଂ ପୁଲ୍ର ପାଣି ଧରିବା କ୍ଷମତା ପ୍ରାୟ ୨୫ ଲକ୍ଷ ଲିଟର । ଅର୍ଥାତ୍ ଗତ ଆର୍ଥିକ ବର୍ଷରେ ବିକ୍ରି ହୋଇଥିବା ବିୟର୍କୁ ଢାଳିଥିଲେ ଏଭଳି ୫ଟି ବଡ଼ ସୁଇମିଂ ପୁଲ୍ ଭର୍ତ୍ତି ହୋଇ ଆହୁରି ବଳିଥାନ୍ତା । ଅନ୍ୟପଟେ ଚଳିତ ଗ୍ରୀଷ୍ମ ଋତୁ ଆରମ୍ଭ ହେବା ଅର୍ଥାତ୍ ଗଲା ମାର୍ଚ୍ଚ ମାସରୁ ଏବେ ଶେଷ ହେବାକୁ ବସିଥିବା ଏପ୍ରିଲ୍ ମାସ ଭିତରେ କଟକରେ ପ୍ରାୟ ୪୦ ଲକ୍ଷ ଲିଟର ବିୟର୍ ବିକ୍ରି ହୋଇସାରିଲାଣି । ମାର୍ଚ୍ଚ ମାସରେ ୧୫ରୁ ୧୬ ଲକ୍ଷ ଲିଟର ବିୟର୍ ବିକ୍ରି ହୋଇଥିବା ବେଳେ ଚଳିତ ଏପ୍ରିଲ୍ରେ ପ୍ରାୟ ୨୪ରୁ ୨୫ ଲକ୍ଷ ଲିଟର ବିୟର୍ ବିକ୍ରି ହୋଇଛି । ଖରା ବଢ଼ିବାରୁ ବିୟର୍ ବିକ୍ରି ଓ କାରବାର ବଢ଼ୁଥିବା ଅବକାରୀ ବିଭାଗ କହୁଛି । ଏନେଇ ନିର୍ଗୁଣ୍ଡି ପାଖ ସରକାରୀ ଡିପୋରେ ପର୍ଯ୍ୟାପ୍ତ ବିୟର୍ ଷ୍ଟକ୍ ରହିଛି । ପ୍ରତିଦିନ ନୂଆ ଷ୍ଟକ୍ ଆସି ଭର୍ତ୍ତି ହେଉଛି ।
କଟକ ଜିଲ୍ଲାରେ ଏବେ ୧୧୮ଟି ଠିପି ବନ୍ଦ ମଦ ଦୋକାନ ଅଛି । ଅର୍ଥାତ୍ ଯେଉଁ ଦୋକାନରୁ କେବଳ ମଦ କିଣି ନେଇ ଅନ୍ୟତ୍ର ପିଇହେବ । ସେହିପରି ୮୦ଟି ଠିପି ଖୋଲା ମଦ ଦୋକାନ ବା ବାର୍ ରହିଛି । ଯେଉଁଠୁ ମଦ କିଣିବା ପରେ ସେହିଠାରେ ପିଇହେବ । ତେଣୁ ପ୍ରାୟ ୨ ଶହ ମଦ କାଉଣ୍ଟର୍ ପାଇଁ ପ୍ରତିଦିନ ଏବେ ୧ ଲକ୍ଷ ଲିଟରରୁ ଅଧିକ ବିୟର୍ ଆବଶ୍ୟକ ହେଉଛି । ଆଉ ଏହି ଡିମାଣ୍ଡ୍ ପୂରଣ ପାଇଁ ପ୍ୟାକିଂ କମ୍ପାନିରେ ମଧ୍ୟ ଦୁଇ ସିଫ୍ଟରେ କାମ ହେଉଥିବା ଅବକାରୀ ବିଭାଗ ପକ୍ଷରୁ ସୂଚନା ଦିଆଯାଇଛି । ଆଗକୁ ଖରା ଆଉ ଦୁଇ ମାସ ରହିଛି । ତେଣୁ ବର୍ତ୍ତମାନ ଭଳି ଏହି ଦୁଇ ମାସରେ ମଧ୍ୟ ସମାନ ସ୍ଥିତି ଲାଗି ରହିବା ଆଶା କରାଯାଉଛି ବୋଲି ଅବକାରୀ ଅଧୀକ୍ଷକ କରୁଣା ଶଙ୍କର ତିୱାରୀ ସୂଚନା ଦେଇଛନ୍ତି ।
